«Скептицизм басым»: Трамп пен Путин саммиті мұнай нарығына қалай әсер етуі мүмкін
15 тамызда Аляскада өтетін АҚШ пен Ресей президенттерінің кездесуі Украинадағы соғысқа байланысты АҚШ санкция саясаты мен ресейлік мұнай жеткізілімдеріне ықпал етуі мүмкін. Сарапшылар үш негізгі сценарийді қарастырып отыр: келісімге келу, шиеленісу немесе статус-кво.
Егжей-тегжейлі
Келісім болса: АҚШ санкцияларды жұмсартуы ықтимал, бұл мұнай ұсынысын арттыруға деген күтуге байланысты бағаларды төмендетпек. Дегенмен, OPEC+ квоталары, өндіріс инвестициясының аздығы және күшті рубль ірі көлемде экспорттың тез артуына жол бермейді (Capital.com, Goldman Sachs).
Эскалация болса: Келіссөздер сәтсіз аяқталса, жаңа санкциялар енгізілуі мүмкін, оның ішінде Ресеймен сауда жасайтын елдерге (мысалы, Үндістанға) қатысты шектеулер қойылуы ықтимал. Бұл мұнай бағасының күрт өсуіне әкелуі мүмкін, бірақ Ресей мұнайды жеңілдікпен сатып, Қытай мен Үндістанға жеткізуді жалғастырады деп болжануда.
Статус-кво: Елеулі өзгеріс болмаған жағдайда, нарық қазіргі траекторияда қалады — ұзақмерзімді белгісіздік сақталып, бірақ қысқа мерзімде айтарлықтай серпілістер болмады.
Нарықтың көңіл-күйі
ClearView Energy Partners сарапшысы Кевин Бук Ресейдің бұрынғы мұнай нарықтарын қайтару келісіміне жету қиын екенін айтады. Еуропа бұл процеске ықпал етіп отыр және бұл оған «келіссөз үстелінде билет» берvtr. Ол сондай-ақ, Трамп қажет болған жағдайда жаңа шектеулер енгізуі мүмкін екенін, оның ішінде «көлеңкелі флотқа» (батыс санкцияларын айналып өтетін танкерлер) қарсы шаралар барын атап өтті.
Сарапшылар қазір геосаяси жаңалықтардың мұнай бағасын ұзақ уақыт бойы ұстап тұруы қиындағанын айтады. Соңғы жылдары нарық геосаяси тәуекелдерге жиі жауап беріп, кейін тез басылды. Буктың пікірінше нақты жеткізілімдерге әсер ететін оқиғалар болмаса, бағада ірі ауытқулар болмайды.
PVM талдаушысы Джон Эванс Трамптың мұнай жеткізілімін елеулі бұзатын қадамға баруы екіталай деп есептейді, өйткені бұл АҚШ әкімшілігінің өзіне соққы болар еді. «Мұны Мәскеу жақсы түсінеді», — дейді ол.
Бағалар
14 тамыздағы саудада қазан айына Brent фьючерстері 1,3%-ға қымбаттап, баррелі $66,5 болды. WTI бағасы $63,3-ке дейін көтерілді.
Контекст
Бұл — екі ел басшыларының соңғы алты жылдағы алғашқы жеке кездесуі. Трамп бастапқыда Украина президенті Владимир Зеленскийсіз кездеспейтінін айтқан, бірақ кейін екіжақты форматқа келісті. Егер алғашқы келіссөздер сәтті өтсе, ол Зеленский мен еуропалық көшбасшылар қатысатын екінші саммит өткізуді жоспарлап отыр. Ал егер Ресей шабуылдарын тоқтатудан бас тартса, «оның салдары өте ауыр» болуы мүмкін екенін ескертті.
