SoftBank OpenAI-ға 40 млрд доллар салды. Ол Nvidia-дағы үлесін сатты
Жапониялық SoftBank Group ChatGPT әзірлеушісі OpenAI-ға 40 млрд доллар көлемінде инвестиция салу бойынша міндеттемелерін толық орындады, деп хабарлады CNBC дереккөздеріне сүйеніп. Телеарнамен сөйлескен адамдардың айтуынша, өткен аптада инвестициялық алпауыт соңғы төлемді 22 млрд доллардан 22,5 млрд долларға дейінгі мөлшерде аударған.
Стартапты 300 млрд долларға бағалап, OpenAI-ға 40 млрд долларға дейін қаржы салу ниеті сәуір айында айтылған. Оның бір бөлігін жапон тобы бірден жіберді. Жапондар мұны тікелей де, басқа бірлескен инвесторлармен бірге де жүзеге асырған. Қалған сома OpenAI-дың коммерциялық формаға өтуіне байланысты болды, мұны қазан айында іске асыра алды. Бұл қаржының бір бөлігі Stargate жобасы аясында OpenAI-дың ЖИ инфрақұрылымын қолдауға арналған. Бұл жобаға OpenAI-дан бөлек SoftBank және бұлтты қызмет алыбы Oracle да қатысады.
Осы мәміле нәтижесінде SoftBank-тың ЖИ стартаптағы үлесі 10%-дан асты.
SoftBank-қа бұл не үшін керек?
SoftBank басшысы, миллиардер Масаёси Сон топтың әлемдік ЖИ көшбасшылары жарысындағы орнын күшейткісі келеді. OpenAI-ға инвестиция салуға ақша тарту және оны қаржыландыру үшін жапон компаниясы Nvidia чип өндірушісіндегі бүкіл үлесін 5,8 млрд долларға сатты. Сондай-ақ Reuters дереккөздерінің мәліметінше, ол T-Mobile US мобильді байланыс операторының үлесін 4,8 млрд долларға қысқартқан және қызметкерлер санын азайтқан. Агенттікпен сөйлескендер SoftBank жыл соңына дейін 22,5 млрд доллар қаржыландыру міндеттемесін орындауға асықты деп түсіндірген.
Сәуірден бері OpenAI бағасы қатты өсті. Компания Amazon-ды қоса алғанда инвесторлармен келіссөз жүргізіп жатыр және капитализациясын шамамен 900 млрд долларға дейін көтеруі мүмкін, деді Reuters дереккөздерінің бірі. Оның айтуынша, мәміле жабылғаннан кейін бұл SoftBank-қа едәуір қағаз жүзіндегі пайда әкелуі мүмкін.
29 желтоқсанда жапон конгломераты дата-орталықтар саласындағы DigitalBridge инвестициялық компаниясы үшін 4 млрд доллар төлеуге де келіскен. CNBC мұны SoftBank-тың ЖИ бағытындағы позициясын күшейту қадамы деп жазады.
