«Сатқанда жыладым»: SoftBank басшысы алғаш рет Nvidia-дан шығуы туралы пікір білдірді
Жапониялық SoftBank негізін қалаушысы Масайоси Сонның мәлімдеуінше, егер OpenAI-ға ірі инвестиция жасауға оның қаржысы жеткілікті болғанда, Nvidia акциясын сатпас еді, деп жазды Bloomberg.
«Мен бір де бір акцияны сатқым келмеді. Маған OpenAI мен басқа жобаларға инвестиция салу үшін қаражат қажет болды. Nvidia акциясын сатқанда жыладым», — деді Сон FII Priority Asia форумында күтпеген мәміле туралы алғаш рет пікір білдіріп.
Ол сондай-ақ ЖИ-ге инвестиция салуда «көпіршік бар» деген пікірлермен келіспейді. SoftBank бас директорының айтуынша, жасанды интеллектке инвестиция айналасында «көпіршік бар» дейтін адамдардың ақылы жеткіліксіз. Егер ЖИ ұзақ мерзімді перспективада әлемдік ЖІӨ-нің 10%-ын қамтамасыз ете алса, онда триллиондаған долларлық инвестициялар толық өтеледі, деді ол. «Қай жерінен көпіршік көріп тұрсыз?» — деп атап өтті Сон.
SoftBank қазанда Nvidia-дағы 32,1 млн акцияны $5,8 млрд-қа сатып, ЖИ жобаларына жаңа инвестицияларды қаржыландырды. Атап айтқанда, компания сәуірде OpenAI-ға $7,5 млрд құйды және желтоқсанда стартапқа тағы $22,5 млрд салуды жоспарлап отыр. SoftBank сондай-ақ Ampere чип әзірлеушісін $6,5 млрд-қа сатып алмақ.
Nvidia акциясының сатылғаны белгілі болғаннан кейін SoftBank котировкасы 10% құлады. Компания әлемдегі ең қымбат компанияның капиталынан шығып, Meta Platforms, Google және басқа да алпауыттардың ЖИ-ге құйып жатқан миллиардтаған қаражаттың тиісті қайтарым берері-бермесіне қатысты инвесторлар күмәні күшейген тұста бұл қадамға барған.
