SoftBank Nvidia компаниясындағы үлесін сатты: бұл қарапайым инвестор үшін үлгі ме?
SoftBank бұған дейін де, 2019 жылы, Nvidia-дағы үлесін сатқан болатын. Бұл шешім кейіннен ең сәтсіз инвестициялық шешімдердің бірі болып шықты, өйткені қазір сол үлестің құны 150 миллиард доллардан асатын еді.
2025 жылдың қазан айында жапондық инвестициялық алып SoftBank Nvidia-дағы 32,1 миллион акциясын 5,83 миллиард долларға сатып, үлесінен толықтай шыққаны белгілі болды. Oninvest бұл әрекетті жеке инвесторлар үшін үлгі бола ма деген сұрақты Freedom Broker-дің аға талдаушысы Егор Толмачевке қойды.
OpenAI үшін барлығын сату
SoftBank соңғы жылдардағы ең ірі активтерді сатуды жүзеге асырды: T-Mobile, Deutsche Telekom компанияларындағы және Nvidia-дағы үлестерін сатып, OpenAI-ға инвестиция үшін капитал босатты. Компанияның қаржы директоры Ёсимицу Готоның айтуынша, бұл — SoftBank инвестициялық портфелін түбегейлі өзгерту жоспары.
Оның сөзінше, OpenAI-ға инвестиция көлемі өте үлкен — 30 миллиард доллардан астам қаражат керек. Сондықтан портфельдегі кейбір активтерді сату қажеттілігі туындады. Бұл шешімнің нақты қазан айында іске асуы жай ғана сәйкестік, Nvidia-мен тікелей байланысы жоқ.
2025 жылдың наурызында SoftBank OpenAI-ға 40 миллиард долларға дейін инвестиция салуға келісті. Оның 10 миллиарды сәуірде енгізілді, ал 22,5 миллиарды желтоқсанда салынады. Бұл келісімді нарық жасанды интеллект саласындағы жаңа кезеңнің басталғанының белгісі ретінде қабылдады. SoftBank негізін қалаушы Масайоши Сон бұл жолы «құрал-саймандарды» емес, «кен орнын» таңдады: яғни, Nvidia — ЖИ құруға арналған құрал шығарса, ал OpenAI — сол құралмен жасалатын өнімнің өзіне жауапты.
ЖИ саласындағы тәуекелдер
SoftBank-тың Nvidia-дан шығуы жасанды интеллект нарығындағы «көпіршіктің» пайда болуы туралы пікірталастармен тұспа-тұс келді. 2008 жылғы дағдарысты болжаған Майкл Бьюрри Nvidia және Palantir-ге қарсы қысқа позициялар ашты. Ол компаниялардың чиптерді ұзақ қызмет етеді деп көрсетіп, ескі жабдықтардың құнын төмендетіп отырғанын айтты.
Инвестор Марк Мобиус ЖИ компанияларының құны асыра бағаланғанын айтып, акциялар 30-40%-ға құлдырауы мүмкін деп ескертті.
Meta компаниясының есеп беруі кезінде артық дата-орталықтар туралы сұраққа компания оларды қажет болса сата алатынын айтқанда, инвесторлар керісінше реакция танытып, акциялар бір күнде 9%-ға төмендеді. Жоғары инфрақұрылымдық шығындар амортизациялық қысымды арттыра түсті.
ЖИ саласындағы инвестициялар, технологиялар және капитал OpenAI, Nvidia және Oracle үштігі арасында айналып жүр. Венчурлық инвестициялардың 53%-ы ЖИ стартаптарына тиесілі. Microsoft, Google, Amazon және Meta ірі инвесторлар қатарында. Бірақ компаниялардың өздері инвестициялаған стартаптардан өз өнімдері мен қызметтерін сатып алуы инвесторлар тарапынан күмән туғызуда.
SoftBank тәуекелге барды: бұл не білдіреді?
Қызығы — Nvidia акциялары емес, SoftBank акциялары теріс әсерге ұшырады. Nvidia үлесін сату туралы ақпарат шыққан соң, Токио биржасында SoftBank акциялары 10%-ға дейін төмендеп, кейіннен 3,5%-ға қайта көтерілді.
Бұл жағдайға қарамастан, компания екінші тоқсанда таза пайда ретінде 16,2 миллиард доллар көрсетті. Бұл сарапшылардың күткенінен бес есе көп. Nvidia акциялары сол күні 3%-ға ғана төмендеді. Жалпы алғанда, SoftBank-тың бұл мәмілесі ЖИ инвестицияларына деген сенімсіздікті азайтты: сатудан түскен қаржы дата-орталықтар мен жабдықтар алуға жұмсалады.
Алайда, инвесторлар мұны тұрақты және табысты активтен шығып, OpenAI-ға тәуекелді ставка қою деп бағалады. Бұл SoftBank-тың Nvidia-дан екінші рет толық шығуы. Алғаш 2019 жылы үлесін 3,6 миллиард долларға сатып, кейін өкінген еді. Сол акциялар қазір 150 миллиардқа бағаланар еді. 2020 жылы қайтадан Nvidia-ға инвестиция салды.
SoftBank WeWork-пен 14,3 миллиард доллар шығын көріп, уақытша сақтық танытқанымен, 2023 жылдың соңында Масайоши Сон ЖИ тақырыбына қайтадан батыл кірісті. Бұл оның стиліне сай — технологиялық болашаққа ірі әрі батыл инвестициялар жасап, қажет болса, бағытты күрт өзгертуге дайын болу.
Жеке инвесторға қандай сабақ бар?
Vanda Research деректеріне сүйенсек, 2024 жылдың соңында Nvidia — Tesla-дан кейінгі АҚШ-тағы жеке инвесторлар портфеліндегі екінші ең ірі позицияға айналды. Қаңтарда DeepSeek моделінің жетістігінен кейін, бір күн ішінде Nvidia акциялары 562 миллион долларға сатып алынды. Бұл рекорд.
SoftBank мәмілесі жеке инвесторларға бағаны, тәуекелдерді, әсіресе ЖИ саласындағы капиталдың шоғырлануын сын көзбен бағалау керектігін еске салады. Диверсификация, негізді көрсеткіштер және ұзақмерзімді стратегия маңызды. ЖИ дәуірі де өткен технологиялық толқындарға ұқсайды: кім ұзақмерзімді трендтерді көре алса, сол ұтады.
Қазір Nvidia акцияларын бақылап отырған 66 аналитиктің 60-ы оларды сатып алуды ұсынады. Біздің де көзқарасымыз өзгерген жоқ: 12 ай ішінде мақсатты баға — $210, бұл 14 қарашадағы жабылу бағасынан 10,4%-ға жоғары.
