Structure Therapeutics акциялары бір күнде 100%-ға өсті
8 желтоқсанда Structure Therapeutics компаниясының бағамдары $70-қа жетіп, капитализациясы $4,2 млрд-тан асты. Өсімнің себебі — компанияның семіздікке қарсы таблеткасы Alenigripron клиникалық сынақтарда Eli Lilly әзірлеп жатқан таблеткадан да жақсы нәтиже көрсетуі. Сарапшылардың ойынша егер Structure-ді ірі фармкомпания сатып алуға қызықса, акциялар әлі де өсуі мүмкін.
Қалай құрылды?
Structure Therapeutics 2016 жылы ShouTi деген атаумен құрылған. Кейін атауын өзгертіп, Кайман аралдарына тіркелді. Негізін қалаған — құрылымдық биолог Рэймонд Стивенс және биотехнологияға арналған софт әзірлеуші Schrödinger компаниясы.
Стивенс бұған дейін де дәрі жасауға және биокомпаниялар ашуға қатысқан. Ал Schrödinger компьютерлік платформасы жаңа молекулаларды жылдам жобалауға мүмкіндік береді — Structure осы технологияны қолданады.
Компания алдымен жеке инвестициялармен жұмыс істеді. 2023 жылы Nasdaq-та IPO өткізіп, акцияларын $15-қа сатты. Бүгін олардың құны IPO бағасынан шамамен 5 есе жоғары. 8 желтоқсанда компания тағы $500 млн тартуды жоспарлайтынын жариялады.
Негізгі препарат және сынақ нәтижелері
Structure басталғаннан бері созылмалы ауруларға арналған дәрілер әзірлеп келеді. Ең басты жобасы — Alenigripron. Екінші фазаның соңғы нәтижелері бойынша пациенттер салмағын:ьең төмен дозада — 8,2%, ең жоғары дозада — 15,3% төмендеткен.
Салыстыру үшін: Eli Lilly әзірлеп жатқан таблетка ең жоғары дозада 12,4% нәтижесін көрсетті, әрі ол кейінгі сынақ кезеңінде болды.
Сарапшылар бұны Structure үшін үлкен серпіліс деп санайды. Компания енді үшінші, шешуші клиникалық фазаға өтуді жоспарлап отыр — ол 2026 жылға белгіленген.
Бұл неге маңызды?
Семіздікке қарсы дәрілер — қазіргі денсаулық сақтау саласындағы ең жылдам өсіп жатқан сегмент. Сарапшылар оларды медицинадағы революция деп атайды. Бұл препараттар жүрек ауруларына арналған статиндер немесе мәдени әсері бойынша Viagra деңгейіне салынып жатыр.
Бүгінде нарықты Novo Nordisk (Wegovy) және Eli Lilly (Zepbound) басқарып отыр. Екеуі бірге 95% үлеске ие. Бірақ олардың өнімдері инъекция түрінде, қымбат және пациенттер көбіне ұзақ қолдана алмайды — 85% екі жыл ішінде тоқтатады.
Сондықтан таблетка форматы — нарық үшін үлкен артықшылық.
Инвесторлар үшін не маңызды?
Уолл-стриттегі барлық 14 аналитик Structure бойынша «сатып алу» ұсынады. Орташа мақсатты баға — $78,4, яғни әлі 17,5% өсу потенциалы бар.
Дегенмен сарапшылардың айтуынша компания келесі үлкен жаңалықты тек 2027 жылы жариялайды. 2026 жылы акция динамикасы баяу болуы мүмкін. Бірақ Structure — сатып алынуы мүмкін компания, сондықтан инвесторлар қызығушылығы жоғары.
Сарапшылар Viking Therapeutics деген тағы бір таблетка жасаушы компанияға да назар аударуға болатынын айтады — бірақ ол әлі жанама әсерлер мәселесін шеше алмай жатыр.
