Таңғы шолу: Трамп баж салығын күшейтпек, банктер стейблкоинға бет бұрды
Дональд Трамп фармацевтикалық өнімдерге осы айдың соңына дейін, ал артынан жартылай өткізгіштерге де баж салығын енгізетінін мәлімдеді. Бұл мәлімдеме АҚШ-тың сауда саясатында жаңа кезеңнің басталатынын аңғартады. Қаржы әлемінің алпауыттары — JPMorgan Chase басшысы Джейми Даймон мен Citigroup жетекшісі Джейн Фрейзер — өз банктерінің стейблкоиндар әзірлеу жобаларына қатысатынын ресми түрде растады. Бұл Уолл-стриттің криптовалюта нарығына бет бұрғанын нақты көрсетеді. Мұнай бағасы қайта өсіп, Brent және WTI фьючерстері қымбаттады — бұл АҚШ пен Қытай тарапынан артқан сұраныстың нәтижесі. Осы жағдай аясында алтын да басты назарға шықты: өндіруші елдердің орталық банктері жергілікті шахталардан алтын сатып алуды күшейтіп жатыр. Осы және басқа да маңызды жаңалықтар — таңғы шолуда.
Трамп фармацевтика мен чиптерге жаңа баж салығын енгізбек
Дональд Трамп осы айдың соңына қарай дәрі-дәрмектерге, ал артынша жартылай өткізгіштерге де баж салығын енгізуі мүмкін екенін мәлімдеді, деп хабарлайды Bloomberg. Бұл шаралар 1 тамызда күшіне енуі тиіс кең ауқымды «өзара» баж салығы пакетімен қатар жүруі ықтимал.
«Айдың соңына қарай бастаймыз. Алдымен төмен мөлшерден бастаймыз, фармкомпанияларға бейімделуге бір жылдай уақыт береміз, сосын баж салықтарын өте жоғары деңгейге жеткіземіз», — деді Трамп Питтсбургте өткен жасанды интеллект саммитінен кейін Вашингтонға оралғанда.
Оның айтуынша жартылай өткізгіштерге де сондай кесте қарастырылуда. Бұл шараны іске асыру жеңілірек, бірақ нақты мәліметтерді жарияламады.
Айдың басында Министрлер кабинетінің отырысында Трамп мысқа 50%-дық баж салығын енгізуді көздеп отырғанын мәлімдеген болатын. Сонымен қатар, фармацевтикалық өнімдерге баж салығын 200%-ға дейін өсуі мүмкін екенін айтты. Бұл — өндірушілерге өндірісті АҚШ-қа көшіру үшін бір жыл уақыт берілгеннен кейінгі жоспар. Ол 1962 жылғы Сауда кеңейту туралы заңның 232-бөліміне сәйкес дәрі-дәрмек импортына ұлттық қауіпсіздікке қатер ретінде тергеу бастағанын да мәлімдеді.
Жаңа баж салықтары шетелде өндіріс жүргізетін Eli Lilly, Merck және Pfizer сынды фармкомпанияларға әсер етуі мүмкін. Бұл АҚШ-тағы тұтынушылар үшін бағаның өсуіне әкелуі ықтимал. Ұқсас әсерді жартылай өткізгіштерге де қатысты күтуге болады — бұл чиптермен қатар Apple мен Samsung секілді компаниялардың ноутбук, смартфон тәрізді құрылғыларына да ықпал етеді.
Орталық банктер жергілікті алтын өндірушілерден алтын сатып алуды жиілетті
Орталық банктер алтын қорын ұлғайтуға ұмтылып отыр және бұл үшін өз юрисдикцияларындағы шахталардан тікелей алтын сатып ала бастады, деп хабарлайды CNBC Дүниежүзілік алтын кеңесінің (World Gold Council, WGC) баяндамасына сілтеме жасап. Сарапшылардың айтуынша бұл әдіс арзанырақ қана емес, сонымен қатар ұлттық тау-кен өнеркәсібін қолдайды және валюта резервтеріне қысым жасамайды.
Филиппин мен Эквадор бұл тәсілді бұрыннан қолданып келеді. Қазір өз жерінде алтын кеніштері бар басқа елдердің де орталық банктері осы жолға бет бұрған немесе мұндай мүмкіндікке қызығушылық танытуда.
WGC-ның соңғы сауалнамасы көрсеткендей, 36 орталық банктің 19-ы алтынды жергілікті ұсақ өндірушілерден сатып алып, төлемді ұлттық валютада жүзеге асырып жатқанын мәлімдеген. Тағы 4 банк осындай тәжірибені енгізуді қарастырып жатыр. Былтыр мұндай сатып алу жайлы 57 банктің тек 14-і ғана хабарлаған болатын.
«Біз әсіресе Африка мен Латын Америкасындағы кейбір орталық банктердің жергілікті ұсақ шахталардан алтын сатып ала бастағанын байқап отырмыз — бұл үрдіс алтын бағасының өсуі аясында күшейе түсті», — деді WGC орталық банктермен жұмыс жөніндегі басшысы Шаокай Фань.
WGC Колумбия, Танзания, Гана, Замбия, Моңғолия және Филиппин елдерін белсенді түрде жергілікті алтын сатып алушылардың қатарына қосады.
Геосаяси тұрақсыздық пен дәстүрлі қорғаныс активтеріне сенімнің төмендеуі алтын бағасын рекордтық деңгейге жеткізді. LSEG деректері бойынша, бір унция алтынның спот бағасы $3328,3-ке жетіп, жыл басымен салыстырғанда шамамен 27%-ға өсті.
Жергілікті шахталардан сатып алу банктік және делдалдық төлемдерден құтылып, тасымалдау шығындарын азайтады.
JPMorgan мен Citigroup стейблкоин шығаруға дайындалуда
JPMorgan Chase бас директоры Джейми Даймон мен Citigroup басшысы Джейн Фрейзер өз банктерінің стейблкоин әзірлеуге қатысу ниеті барын айтты, деп жазады Yahoo Finance. Бұл — Уолл-стриттің криптовалюта индустриясына бет бұра бастауының тағы бір дәлелі, әсіресе Конгрессте цифрлық активтерге қолайлы заң жобалары талқыланып жатқан тұста.
«Біз Citi-дің өзінің стейблкоинін шығару мүмкіндігін қарастырып жатырмыз», — деді Фрейзер сарапшыларға. «Цифрлық активтерге банктердің қол жеткізуін жеңілдетуге бағытталған әкімшілік бастамаларды шын жүректен қолдаймыз», — деп толықтырды ол.
Алайда, криптовалюта бойынша заң жобаларын Конгрессте алға жылжыту әрекеті сейсенбіде кедергіге тап болды: 13 республикалық конгрессмен демократтармен бірігіп, заң жобаларын жеке-жеке дауысқа салуға жол ашатын процедуралық қадамға қарсы дауыс берді.
Республикалықтар қабылдауды көздеген үш заң жобасы криптоактивтерге кең ауқымды реттеу жүйесін құрып, орталық банктердің цифрлық валюталарын шығаруға тыйым салып, стейблкоиндарға алғашқы федералдық ережелерді енгізуі тиіс болатын. Бірақ бірқатар республикашылдар бұл жобаларды жеке емес, бір пакет ретінде қарау қажет деп есептейді.
Соған қарамастан, АҚШ үкіметінің стейблкоиндарды кең қолдануға рұқсат беруі мүмкін деген үмітпен ірі банктер дайындықты жалғастыруда. Бұл — әдетте АҚШ долларымен қамтамасыз етілетін криптовалюта түрі.
Криптовалюталарды жиі сынап келген Даймоннің өзі банктің бәсекеге қабілетті болуы үшін стейблкоиндарды игеруі қажет екенін мойындады. Өткен айда JPMorgan JPMD деп аталатын депозиттік токенін іске қосу жоспарын жариялады — бұл институционалдық клиенттерге арналған стейблкоин аналогы. «Біз JPMorgan Deposit Coin жобасына да, жалпы стейблкоиндармен жұмысқа да қатысамыз — технологияны түсініп, осы салада көшбасшы болу үшін», — деді Даймон.
Мұнай бағасы АҚШ пен Қытай тарапынан тұрақты сұранысқа үмітпен өсті
Сәрсенбі күні мұнай бағасы өсті — бұл АҚШ пен Қытай тарапынан тұрақты сұранысқа деген үмітпен байланысты, деп жазады Reuters. Бұл екі ел — әлемдегі ең ірі мұнай тұтынушылары.
Brent маркалы мұнай фьючерстері 0,4%-ға қымбаттап, барреліне $69-ға жетті (01:05 GMT). West Texas Intermediate (WTI) мұнайы 0,6%-ға көтеріліп, $66,9 болды.
Екі күн қатарынан төмендеген бағалар Трамптың Ресейден мұнай импортына баж салығын енгізу қаупін елемей, қайта өсуге бет алды.
Бағалар шектеулі дәлізде тербелуде: бір жағынан — жазғы маусымда солтүстік жартышарда сапарлардың көбеюіне байланысты сұраныс артып отыр, екінші жағынан — жаңа баж салықтарының экономикалық өсім мен отын тұтынуына кері әсер ету қаупі сақталуда.
Нарықтағы жағдай
Азия қор нарықтары сәрсенбі күнгі сауда сессиясын төмендеумен бастады.
Жапондық Nikkei 225 индексі ашылу кезінде айтарлықтай өзгермеді, ал Topix 0,1%-ға төмендеді (жергілікті уақытпен 8:04, АҚШ-тың шығыс уақытымен сейсенбі 20:04).
Оңтүстік Кореяның Kospi индексі 0,5%-ға, ал шағын капиталды Kosdaq 0,6%-ға төмендеді.
Австралиялық S&P/ASX 200 — 0,8%-ға құлдырады.
Dow Jones Industrial Average, S&P 500 және Nasdaq 100 индексіне арналған фьючерстер 0,1%-ға төмендеді — инвесторлар жаңа корпоративтік есептер мен инфляциялық деректерді күтуде.
