Таңғы шолу: Alphabet пен Microsoft рекорд орнатты, АҚШ пен Қытай келісімге келді
Қытай мен АҚШ бірқатар баж салығын азайтуды қамтитын сауда келісіміне жасасты. Alphabet 102,4 млрд долларлық рекордтық табыс туралы жариялады, ал Google Cloud бөлімшесінің табысы 34%-ға өсіп, ЖИ-бумының басты бенефициарына айналды. ChatGPT әзірлеушісі OpenAI компаниясының IPO-сы 2026 жылы өтіп, оны 1 трлн долларға дейін бағалауға әкелуі мүмкін. Осы және басқа да маңызды жаңалықтар — 30 қазан таңындағы негізгі шолуда.
Трамп пен Си сирек металдар мен баж салығын төмендету жөнінде келісімге келді
АҚШ президенті Дональд Трамп CNBC-дің хабарлауынша Оңтүстік Кореяда ҚХР төрағасы Си Цзиньпинмен өткен кездесуде тараптар сирек және стратегиялық минералдардың экспортын тағы бір жылға жалғастыруға және фентанил жеткізілімдеріне байланысты енгізілген баж салығын 20%-дан 10%-ға дейін төмендетуге келіскенін мәлімдеді. Осылайша Қытай тауарларына салынатын жалпы сауда алымы 47%-ға дейін қысқарады. Өз кезегінде Бейжің «фентанилмен белсенді күрес жүргізуге» және АҚШ-тың соя мен ауылшаруашылық өнімдерін қайта сатып алуға уәде берді.
Трамптың айтуынша келісім жыл сайын қайта қаралады, ал кездесу «өте жақсы өтті». Сондай-ақ Nvidia чиптерінің жеткізілімі талқыланған, бірақ Трамп атап өткендей, ең жаңа Blackwell үлгілері сөз болмаған.
OpenAI 1 трлн доллар бағамен IPO-ға дайындалуда
ChatGPT әзірлеушісі OpenAI IPO өткізуге дайындықты бастады, деп хабарлайды Reuters дереккөздері. Компания бағасы 1 трлн долларға дейін жетуі мүмкін. Ақпарат көздерінің айтуынша, орналастыру 2026 жылдың соңында немесе 2027 жылы өтуі ықтимал. The Wall Street Journal басылымы 29 қазан күнгі мақаласында тек 2027 жылды атаған.
Reuters-тің мәліметінше OpenAI кемінде 60 млрд доллар тартуды жоспарлап отыр.
Компания өкілдері «IPO басты басымдық емес» десе де, шешім ЖИ-инфрақұрылымын дамыту үшін триллион долларлық ауқымды қаржыландыру қажеттілігімен байланысты, деп жазады агенттік. Дереккөздерге сүйенсек, OpenAI-дың жылдық табысы 20 млрд долларға дейін жетуі мүмкін, бірақ шығындар да артып келеді. Ішкі қайта құрылымдаудан кейін компания Microsoft-қа тәуелділікті азайтып, 26% акцияға ие OpenAI Foundation коммерциялық емес құрылымының бақылауын сақтап қалды.
Alphabet рекордтық сатылымдар көрсетті
Alphabet табысы мен пайдасы бойынша үшінші тоқсанда сарапшылардың болжамдарынан асып түсті, деп жазады Yahoo Finance. Компанияның табысы өткен жылғы 88,3 млрд доллардан 102,4 млрд долларға дейін өсіп, болжанған 99,85 млрд доллардан жоғары болды. Бір акцияға шаққандағы пайда 2,87 долларды құрап, Уолл-стриттің 2,27 долларлық күткенінен жоғары шықты.
Негізгі өсім драйвері — Google Cloud, оның табысы өткен жылмен салыстырғанда 34%-ға артып, 15,2 млрд долларға жетті, ал болашақ келісімдер көлемі 155 млрд долларға дейін ұлғайды. Alphabet басшысы Сундар Пичаи 2025 жылы 1 млрд доллардан асатын келісімдердің саны соңғы екі жылдың жиынтық көрсеткішінен асып түскенін айтты. Компания капиталдық шығындар болжамын 92 млрд долларға дейін арттырды, себебі ЖИ-инфрақұрылымға сұраныс ұсыныстан асып түскенін атап өтті.
Alphabet өсімі ЖИ-бум мен Gemini моделінің жетістіктері, сондай-ақ OpenAI, Meta және Anthropic компанияларымен Google Cloud қолдану туралы келісімдер аясында күшейді. ChatGPT Atlas-пен бәсекелестікке байланысты іздеу бизнесіне тәуекелдер туындағанымен, іздеу табыстары да 56,6 млрд долларға дейін өсті. Пичаи: «Жасанды интеллект іздеу мүмкіндіктерін кеңейтіп, бизнесті өсіруге серпін беріп отыр», — деді.
Microsoft табыс және кіріс бойынша болжамнан асып түсті
Microsoft бірінші тоқсан бойынша күткеннен жоғары нәтижелер көрсетті: бір акцияға пайда — 3,72 доллар, табыс — 77,7 млрд доллар (болжам: 3,68 және 75,5 млрд доллар), деп жазады Yahoo Finance. Бұлтты қызметтерден түскен табыс 26%-ға өсіп, 49,1 млрд долларға жетті. Капиталдық шығындар 74%-ға артып, 34,9 млрд долларға дейін жетті, оның жартысы Azure үшін GPU және CPU сатып алуға жұмсалды.
Meta табыс болжамын асырса да, пайдасы құлдырады
Meta үшінші тоқсанда табысты өсіріп, Уолл-стрит болжамынан асып түсті, бірақ бір акцияға пайда салықтық біржолғы төлемдер мен ЖИ-инфрақұрылымға инвестициялардың көбеюіне байланысты төмен болды, деп жазады Yahoo Finance.
Компания ЖИ-ге белсенді инвестиция салуда: Scale AI-ға 14,3 млрд доллар, Техаста деректер орталығын салуға 1,5 млрд доллар және Луизианада Hyperion мегаорталығын қаржыландыру үшін Blue Owl Capital-пен 27 млрд долларлық мәміле жасады. Meta 2025 жылға арналған капиталдық шығындар болжамын 70–72 млрд долларға дейін көтеріп, 2026 жылы да олардың өсуін күтуде. Қаржы директоры Сьюзан Лидің айтуынша, негізгі шығын драйверлері — инфрақұрылым мен ИИ-мамандардың жалақысының артуы.
ФРЖ мөлшерлемені екінші рет қатарынан төмендетті
АҚШ Федералдық резерв жүйесі негізгі мөлшерлемені қатарынан екінші рет 0,25 п.п.-ға төмендетіп, 3,75–4,00% диапазонына жеткізді. Шешім бірауыздан қабылданған жоқ: ФРЖ жаңа мүшесі Стивен Миран мөлшерлемені 0,5 п.п.-ға бірден азайтуды қолдаса, Канзас-Сити ФРБ басшысы Джефф Шмид оны өзгертпеуді ұсынды. Екіжақты келіспеушілік соңғы рет 2019 жылы тіркелген еді, деп еске салады Yahoo Finance.
Реттеуші 1 қазаннан бері жалғасып келе жатқан «шатдаун» салдарынан еңбек нарығы мен инфляция бойынша негізгі макродеректерсіз қалғанын мойындады. Дегенмен, ФРЖ «қолжетімді индикаторларға сүйене отырып экономикалық тәуекелдерді бағалайтынын» және жұмыспен қамтылуға байланысты тәуекелдердің күшейгенін атап өтті.
1 желтоқсаннан бастап ФРЖ өтімділік тапшылығын болдырмау үшін баланс қысқартуды тоқтатады — бұл 2019 жылғы ақша нарығындағы дағдарысқа ұқсас жағдайдың алдын алуға бағытталған шара.
ФРЖ төрағасы Джером Пауэлл желтоқсандағы мөлшерлеме төмендеуі «алдын ала шешілген мәселе емес» екенін айтты. Ол комитет ішіндегі келіспеушіліктер мен деректердің жоқтығы аясында сақтық таныту қажет екенін атап өтті. «Тұманды жерде жүргенде – жылдамдықты азайту керек», — деді ол. Нарық деректері бойынша, желтоқсанда тағы бір төмендету ықтималдығы 87%-дан 56%-ға түсті.
Нарықтағы ахуал
— Жапонияның кең ауқымды Topix индексі 0,7%-ға өсті, Nikkei 225 — 0,25%-ға артты.
— Гонконгтың Hang Seng индексі 0,2%-ға төмендеді, Қытайдың құрлықтық CSI 300 индексі өзгеріссіз қалды.
— Оңтүстік Кореяда Kospi 0,4%-ға көтерілді, ал Kosdaq 1,1%-ға төмендеді.
— Австралияның S&P/ASX 200 индексі 0,5%-ға төмендеді.
— S&P 500, Nasdaq 100 және Dow Jones Industrial Average индекстерінің фьючерстері айтарлықтай өзгеріссіз қалды.
