Alphabet-тің тоқсандық табысы алғаш рет $100 млрд-тан асты. Акциялар 6%-ке өсті
Google-дың бас компаниясы Alphabet үшінші тоқсанда табыс пен кіріс бойынша сарапшылар болжамынан асып түсті. Бұл жолы сатылым алғаш рет $100 миллиардтан асты. Компанияның негізгі бағыттарының бәрінде, соның ішінде жарнама құралдары мен бұлтты қызметтерде өсім байқалды. Сонымен бірге, Alphabet жыл ішінде екінші рет Google Cloud-ты кеңейтуге жұмсалатын күрделі шығындар жоспарын арттырды.
Егжей-тегжейі
2025 қаржы жылының үшінші тоқсанындағы табыс $102,35 миллиард болды — бұл өткен жылмен салыстырғанда 16%-ке көп. LSEG сарапшылары $99,89 миллиард күткен еді, деп хабарлады CNBC.
FactSet дерегінше, бір акцияға пайда (EPS) $2,87 болды. Бұл Уолл-стрит күткен $2,12-ден әлдеқайда жоғары, деп жазды MarketWatch. Таза пайда 33%-ке өсіп, $34,98 миллиардты құрады. Қыркүйекте компанияға Еурокомиссия жарнама саласындағы әділетсіз әрекеттері үшін $3,45 миллиард айыппұл салды, бұл таза пайдаға әсер етті, деп жазды CNBC.
Alphabet 2025 жылға арналған күрделі шығын жоспарын да қайта қарады. «Бизнесіміздің өсуіне және бұлтты қызметтерге сұраныстың артуына байланысты біз 2025 жылғы күрделі шығындарды $91–93 миллиард аралығында болады деп күтеміз», — делінген есепте. Бұған дейін бұл жоспар $75 миллиардтан $85 миллиардқа дейін артқан болатын. Бұл қаражат негізінен деректерді өңдеу орталықтары секілді техникалық инфрақұрылымды дамытуға жұмсалады.
Alphabet-тің A және C класындағы акциялары 29 қазанда есеп жарияланғаннан кейін кеңейтілген саудада 6%-тен аса өсті. Негізгі сауда сессиясы A акциялары үшін 2,65%-ке, ал C акциялары үшін 2,51%-ке өсумен аяқталды. Күн ішінде акциялар бағасы жаңа рекорд орнатты.
Бұлтты қызмет нәтижелері
Alphabet-тің Google Cloud бағытындағы бұлтты қызметтерден түскен табысы $15,15 миллиард болды. Бұл өткен жылмен салыстырғанда 33%-ке көп. Сарапшылар $14,74 миллиард болады деп болжаған, деп жазды CNBC StreetAccount деректеріне сүйеніп. Салыстыру үшін айтқанда, Microsoft-тың бұлтты бизнесі дәл осы кезеңде 40%-ке өсті.
Google Cloud $3,59 миллиард пайда тапты, ал сарапшылар $3 миллиард көлемінде операциялық пайда күтті, деп жазды Bloomberg. Бұл бөлім Alphabet-тің ең жылдам дамып жатқан бағыты және жасанды интеллект бумының компания сатылымына оң әсер етіп жатқанының айқын көрінісі.
Google-дың соңғы қаржылық нәтижелері жасанды интеллект қызметтеріне сұраныс артқанын көрсетіп отыр. Компания инфрақұрылымды кеңейтуге көбірек қаржы салып жатыр, өйткені клиенттердің сұранысы көбейген. Google Cloud ЖИ стартаптарымен ірі келісімшарттарға отырды, оның ішінде Claud чат-ботын жасаушы Anthropic компаниясына арнап арнайы ЖИ чиптер жеткізу туралы көп миллиардтық келісім бар. Дегенмен, бұл бөлім әлі де Amazon Web Services пен Microsoft Azure-ден кейінгі орында. Сондықтан болашақта оның қарқынды өсуі күтіледі, деп жазды Bloomberg.
«Біз жаңа бизнес бағыттарын сенімді түрде дамытып келеміз. Google Cloud тоқсанды $155 миллиардқа тең келісімшарттар портфелімен аяқтады», — деді бас директор Сундар Пичаи есеп барысында.
Есептегі басқа нәтижелер
Бұлтты қызметтерден бөлек, компанияның басқа негізгі бағыттары: Google Search & Other, YouTube жарнамасы, жазылымдар мен құрылғылар — барлығы да екі таңбалы өсім көрсетті, делінген есепте.
Google-дың іздеу қызметі $56,56 миллиард табыс әкелді, бұл өткен жылмен салыстырғанда 15%-ке көп. Сарапшылар $55 миллиард күткен еді, деп жазды Bloomberg. Бұл бөлім әзірге ЖИ чат-боттардың күшейіп келе жатқан бәсекесіне төтеп беріп отыр.
YouTube жарнамасынан түскен табыс $10,26 миллиард болды. Уолл-стрит сарапшылары $10,01 миллиард деп болжаған еді.
Жалпы Alphabet-тің жарнамадан түскен табысы 12,6%-ке өсіп, $74,18 миллиардқа жетті.
Тек Other Bets деп аталатын бөлімнің табысы 11,3%-ке төмендеп, $344 миллион болды. Бұл бөлімге Verily биотехнологиялық компаниясы мен Waymo автономды көліктерді жасаушы енеді. Бұл бөлімнің шығыны $1,42 миллиард болды, ал былтыр ол $1,12 миллиард болған. Сарапшылар $1,2 миллиард шығын күткен.
Сарапшылар не дейді?
Alphabet-тің A класындағы акциялары бойынша 75 сараптамалық рейтинг бар. Олардың 53-і «сатып алуға», 10-ы «артық салмақ» (Overweight) деп бағалағанын MarketWatch жазады. Қалған 12 сарапшы «ұстау» (Hold) деп кеңес береді. Орташа мақсатты баға — $265,57, бұл 29 қазандағы постмаркеттегі 6%-тен астам өсімді есепке алмағанда, қазіргі бағадан төмен.
