Танымал кеңсе тауарларын жеткізуші иесін ауыстырмақ. Инвесторлар үшін неге маңызды
Office Depot және OfficeMax кеңсе тауарлары желілері тиесілі The ODP Corporation компаниясының акциялары 22 қыркүйекте күрт өсіп, үштен бірге артты. Бұл жаңалық компанияны Atlas Holdings инвестициялық компаниясы сатып алатыны хабарланғаннан кейін шықты. Noble брокерлік-дилерлік компаниясы бұл мәміле ODP акционерлеріне қосымша табыс әкеліп қана қоймай, кеңсе тауарларын тарату саласындағы бәсекелестік жағдайды да өзгертуі мүмкін екенін айтады.
Егжей-тегжейлі
22 қыркүйек, дүйсенбі күні The ODP Corporation акциялары 33%-ға өсіп, $27,68 деңгейіне жетті. Бұл — 2024 жылдың соңынан бергі ең жоғары көрсеткіш. Инвесторлар кеңсе тауарларын жеткізуші компанияны Atlas Holdings жеке инвестициялық компаниясы сатып алмақ деген жаңалыққа оң көзқарас білдірді. Бұл компания қаржылық қиындыққа тап болған кәсіпорындарға инвестиция салуға маманданған.
Мәміле шартына сай, Atlas ODP компаниясын шамамен $1 млрд-қа немесе әр акцияға $28 бағамен сатып алады. Бұл — 19 қыркүйекте, яғни мәміле жарияланғанға дейінгі жабылу бағасынан 34% жоғары.
ODP директорлар кеңесі бұл келісімді бекітті, енді оны акционерлер мен реттеуші органдар мақұлдауы керек. Мәміле 2025 жылдың соңына дейін аяқталады деп жоспарланып отыр, содан кейін ODP акциялары биржада саудаланбайды.
Инвесторлар үшін бұл нені білдіреді?
Компанияның бас директоры Джерри П. Смиттің айтуынша мәміле ODP акционерлеріне жоғары табыс әкеліп қана қоймай, компанияның өсуінің жаңа кезеңінде жағдайын жақсартуға көмектеседі.
Noble Capital Markets сарапшыларының айтуынша Atlas портфеліне қосылу компанияға акционерлер қысымынан тыс икемді жұмыс істеуге мүмкіндік береді. Олар мәміле қаржылық және операциялық қолдау беріп, компанияның нарықтағы орнын күшейтеді деп есептейді.
«Егер мәміле жүзеге асса, бұл Atlas Holdings үшін соңғы жылдардағы ең ірі қадамдардың бірі болады және Солтүстік Америкадағы B2B қызметтері мен кеңсе тауарларын дистрибуциялау саласындағы бәсекелестік ортаға өзгеріс әкелуі мүмкін», — дейді Noble сарапшылары.
Алайда жеке инвесторлардың құқықтарын қорғауға маманданған Ademi заң фирмасы бұл мәміле бойынша ODP әрекеттеріне қатысты тергеу бастағанын мәлімдеді. Олар бұл келісім ODP компаниясының басқа бәсекелес ұсыныстарды қабылдауына шектеу қойып, айыппұл қаупін тудырып отырғанын алға тартады.
ODP бұл мәмілені не үшін жасады?
The ODP Corporation 1986 жылы Office Depot атауымен құрылып, екі жылдан кейін Nasdaq биржасына шыққан. Алғашқыда АҚШ пен шетелде қарқынды дамыған компанияның бағытын электрондық сауда платформалары, әсіресе Amazon өзгертіп жіберді, деп жазады Seeking Alpha.
Office Depot жағдайды түзету үшін Staples компаниясымен бірігуді жоспарлаған, бірақ бұл мәмілені реттеуші органдар бәсекелестікті шектейді деп, блоктаған (Reuters).
2013 жылы Office Depot OfficeMax-пен бірікті. Екі жылдан кейін Staples-пен қайта бірігуге келіскенімен, тағы да сәтсіздікке ұшырады. 2017 жылы CompuCom Systems компаниясын сатып алып, IT-қызметтер бағытына бет бұрды.
2020 жылы компания атауын ODP Corporation деп өзгертіп, B2B-сатылымға басымдық бере бастады. Бір жылдан кейін Staples оны $2,1 млрд-қа сатып алуға тағы ұсыныс білдірді, бірақ бұл жолы ODP өзі бас тартты.
Reuters агенттігінің мәліметінше соңғы жылдары компания AREX Capital хедж-қорының қысымында болды. Қор ODP-ны балама сатып алушыларды тым баяу іздеді деп айыптады.
2025 жылдың екінші тоқсанында компанияның табысы жылдық есеп бойынша 7,6%-ға азайып, $1,59 млрд болды. Дегенмен, компания нөлдік залал деңгейіне жетіп, бір акцияға таза табыс көрсеткіші бойынша оң нәтижеге қол жеткізді. Ал 2024 жылдың дәл осы кезеңінде 0,12 доллар шығын тіркелген болатын.
