Tesla акциялары бір жылда алғаш рет рекорд жаңартты
16 желтоқсанда сауда барысында Tesla акциялары соңғы бір жылда алғаш рет жаңа тарихи максимумға жетті. Сауда жабылғанда акциялар 3,07%-ға өсіп, $489,88 болды, ал күн ішіндегі ең жоғары деңгейі $491,5-ке жетті.
Егжей-тегжейлі
Қазір Tesla-ның нарықтық бағасы $1,63 трлн-ды құрайды. Осылайша компания чип өндіруші Broadcom-ды басып озып, АҚШ-тағы нарықтық құны ең жоғары жетінші компания атанды. Алда тек Nvidia, Apple, Alphabet, Microsoft, Amazon және Meta бар. MarketWatch атап өткендей, 29 мамырдан бері алғаш рет АҚШ-тың ең ірі 7 компаниясының бәрі «Жетілік алыпқа» (Magnificent Seven) кірді.
Акциялардың өсуі Tesla бас директоры Илон Масктың байлығын бір күнде $8,2 млрд-қа арттырды. Forbes дерегі бойынша оның қазіргі байлығы $684,2 млрд-қа жетті. Бұл екінші орында тұрған Google-дың негізін қалаушы Ларри Пейдждің байлығынан $432,2 млрд-қа көп.
Аналитиктер не дейді?
Mizuho аналитигі Виджай Ракеш Tesla акциялары бойынша мақсатты бағаны $475-тен $530-ға дейін көтеріп, «сатып алу» (Buy) ұсынымын растады. Оның айтуынша, Full Self-Driving жүйесінің жетілуі Остин мен Сан-Францискода роботакси паркін тезірек кеңейтуге және бақылаушы адамның қажеттілігін ертерек алып тастауға мүмкіндік беруі мүмкін.
Ракеш Tesla-ның прогресін Alphabet-тің Waymo жобасымен салыстырады. Қазір Waymo аптасына шамамен 450 мың толық автономды сапар жасайды, ал сәуірде бұл көрсеткіш 250 мың болған. Компания 2026 жылдың соңына қарай аптасына 1 млн сапарға жетуді көздеп отыр.
Ал Barclays аналитигі Дэн Леви Tesla акциялары бойынша «ұстап тұру» (Hold) рейтингін және $350 мақсатты бағасын өзгертпеді. Оның пікірінше, әр штаттағы талаптардың әртүрлі болуы роботакси сервисін кеңейтуге кедергі келтіруі мүмкін. Дегенмен, Tesla автономды көліктері мен роботакси тақырыбына қызығушылық артып келе жатқанын, әсіресе бақылаушы жүргізушіден біртіндеп бас тарта бастаған соң, атап өтті. Бірақ ол роботаксиді нақты қашан және қандай көлемде іске қосатыны әлі белгісіз дейді.
Жалпы, аналитиктердің пікірі екіге бөлінген: шамамен 20 сарапшы акцияны сатып алуға, 18-і ұстап тұруға кеңес береді, ал 12-і сатуды жөн көреді. Уолл-стриттің орташа мақсатты бағасы — $408, бұл қазіргі бағадан шамамен 17% төмен.
Акциялар неге өсті?
Акциялардың өсуіне 15 желтоқсанда Илон Масктың Tesla «адамсыз роботаксиді» сынақтан өткізіп жатқанын айтуы түрткі болды. Компания маусым айында Остинде жасанды интеллектке негізделген роботакси сервисін іске қосты, бірақ әзірге алдыңғы орындықта бақылаушы адам отырады. Маск бұған дейін жыл соңына дейін бақылаушыларды алып тастауды жоспарлап отырғанын айтқан.
Қысым сақталып тұр
Соған қарамастан, Tesla бизнесі бірқатар қиындықтарға тап болып отыр: АҚШ-та электромобильдерге берілетін субсидиялардың қысқаруы, Илон Масктың тұлғасына байланысты имидждік тәуекелдер және Қытайдың BYD мен Xiaomi, сондай-ақ Еуропаның Volkswagen компаниялары тарапынан бәсекенің күшеюі.
Қазан айында Tesla Model Y кроссовері мен Model 3 седанының арзанырақ нұсқаларын ұсынды. Алайда бұл АҚШ пен Еуропадағы сатылымды әлі көтере алмады. Cox Automotive дерегінше, АҚШ-та арзандаған нұсқалар қымбат модельдерге деген сұранысты «жеп қойды», ал қарашада Tesla сатылымы соңғы төрт жылдағы ең төмен деңгейге түсті.
