Tesla акциясы қыркүйекте 33% өсті. Сарапшы неге өсімнің жалғасуын күтеді?
Canaccord Genuity сарапшысы Tesla акциясының мақсатты бағасын көтеріп, олардың тағы 10%-дан астам қымбаттай алатынын білдірді. Ал қыркүйектің басынан бері компания акциясы 33% қымбаттап, өткен жылғы президенттік сайлаудан бергі ең жақсы кірістілікті көрсетті. Алайда, Уолл-стритте АҚШ-тағы салықтық жеңілдіктер аяқталғаннан кейін Tesla сатылымы азайса, котировкамен не болатыны туралы сұрақтар туындап жатыр.
Егжей-тегжейлі
Canaccord сарапшысы Джордж Джианарикас Tesla акциясының мақсатты бағасын $333-дан $490-ға дейін көтерді, деп жазады Barron’s. Жаңа таргет 29 қыркүйектегі сауда жабылу бағасынан 10,5% жоғары. Сарапшы Tesla қағазын сатып алу ұсынысын сақтады, бірақ оның айтуынша, бұған дейін рейтингті төмендету мүмкіндігін қарастырған.
«Қаңтар айының басында біз рейтингті төмендету сценарийін қарастырған аналитикалық жазба шығардық және өз ішіміздегі күдіктерді де атап өттік… Соңында біз «сатып алу» рейтингін сақтадық. Сол уақыттан бергі құбылмалылыққа қарамастан, біз осы шешімге қуаныштымыз», — деп жазды Джианарикас өз жазбасында.
Сарапшы акцияға қатысты оң көзқарасын сақтап отыр, себебі, үшінші тоқсанда мықты жеткізілімдерді күтуде. Сондай-ақ, ол жаңа электромобиль модельдерінің шығуын, энергия сақтау бизнесінің дамуын және Tesla-ның жасанды интеллекттегі болашағын — робот-такси мен гуманоид роботтарды атап өтті.
Акцияның ахуалы
FactSet дерегінше, қазір сарапшылардың Tesla акциясына орташа мақсатты бағасы шамамен $347 құрайды — бұл бір ай бұрынғыдан $33 жоғары. Дегенмен, бұл әлі де ағымдағы нарықтық бағадан төмен, бірақ Tesla үшін бұл қалыпты жағдай: тарихи тұрғыда оның акциясы жиі сарапшылардың орташа бағалауынан жоғары саудаланған, деп жазады Barron’s.
Қыркүйек басында котировка орташа мақсатты бағамен шамалас болды, бірақ кейін күрт өсті. Осы айда акция 33% қымбаттап, 2024 жылдың қарашасынан бергі ең жақсы нәтиже болды. Ол кезде Дональд Трамп президент болып сайланған соң, Tesla акциясы күрт өсті, өйткені инвесторлар Илон Масктің Трамптың сайлауалды науқанына қатысуы компанияға пайда әкеледі деп күткен.
Нәтижесінде, қыркүйек Tesla акциясы тарихындағы ең үздік он айдың қатарына енуі мүмкін. Ол үшін сейсенбі күні акция сауданы $461,24-дан жоғары деңгейде жабуы керек, деп есептейді Barron’s. Материал жарияланған сәтте акция осы деңгейден шамамен 4% төмен саудаланып жатты.
Tesla үшін ең үздік ай болып 2013 жылдың мамыры саналады, ол кезде акция 81% қымбаттаған.
Басқа да сарапшылар пікірі
Tesla осы аптада үшінші тоқсандағы сатылым туралы есеп береді. Уолл-стритте қыркүйектің 30-ына дейін АҚШ-тағы сатып алушылар электромобиль алғаны үшін $7500-ға дейінгі салықтық жеңілдікті пайдалана алды, сондықтан, сатылым күрт өседі деп күтілуде. Бірақ бұдан кейін электромобиль сатылымы айтарлықтай қысқарады, деп жазады Bloomberg.
«Tesla акциясы шектен тыс мультипликатормен саудалануда, ал оның пайдасы электромобильдерге сұраныстың әлсіреуі және қатаң бәсекелестік аясында қысқарып жатыр. Сонымен қатар, электромобильдерге берілетін салықтық жеңілдіктер де таяуда аяқталады, бұл сатылымға қосымша соққы болады», — деді Bloomberg-ке BCA Research компаниясының АҚШ акциялар нарығы бойынша бас стратегi Айрин Танкл. Оның айтуынша, акция раллиі «инерциямен» жалғасуы мүмкін, бірақ әзірге жекелеген инвесторлар Маск «сататын» роботтар мен робот-таксилер әлеміне деген «армандарды» сатып алып жатыр.
«Tesla-ның негізгі бизнесі бір акция үшін $150 тұрады, — деп келісті Tesla-ның ұзақ жылдардан бергі инвесторы әрі Gerber Kawasaki Wealth & Investment Management бас директоры Росс Гербер. — Инвесторлар осы сомадан артық төлейтін нәрсе — робот-такси мен роботтарға қатысты «Илон гиперболасы» ғана».
