Tesla акционерлері Маскқа $1 трлн бонус төлеуге қарсы шықты
Tesla компаниясының бірқатар акционерлері директорлар кеңесін қайта сайлауға және Илон Маскқа ұсынылған рекордтық $1 трлн көлеміндегі компенсациялық пакетке қарсы шықты. Бұл мәселе 6 қарашада өтетін акционерлердің жылдық жиналысында шешіледі.
Алайда тіпті бонус бекітілсе де, Маск оны алу үшін бірқатар шарттарды орындауы тиіс. Атап айтқанда, Tesla-ның нарықтық капитализациясы $8,5 трлн-ға жетуі керек. Қыркүйек айында компания акциялары үштен біріне қымбаттады, бірақ сарапшылар әлі де абайлап қарайды.
Акционерлер не дейді?
Нью-Йорк зейнетақы қорлары бастаған акционерлер тобы АҚШ-тың Бағалы қағаздар және биржа жөніндегі комиссиясына (SEC) хат жолдап, басқа инвесторларды директорлар кеңесін қайта сайлауға және Маскқа арналған $1 трлн бонусты қолдамауға шақырды.
Олардың пікірінше кеңестің Маскты толыққанды жұмысқа тартудағы әлсіздігі және оның тарихтағы ең жоғары ақы алатын CEO болуы компанияның басқару құрылымының тым тәуелді екенін көрсетеді.
«Гендиректорды қалайда сақтап қалуға тырысу компания беделіне зиян келтірді, бұрын-соңды болмаған өтемақыларға жол ашты және толық автономды жүргізу сияқты негізгі мақсаттарға жетуді тежеді», — делінген хатта.
Акционерлер кеңестегі кей кандидаттарды қайта сайламауға шақырып, Tesla-ға шынымен тәуелсіз директорлар қажет екенін атап өтті.
Бонус жайлы толығырақ
Tesla директорлар кеңесі қыркүйекте Маскқа келесі 10 жылға арналған $1 трлн құрайтын жаңа өтемақы пакетін ұсынған.
Бұл кезеңде Маск жалақы да, сыйақы да алмайды. Оның орнына ол белгілі мақсаттарға қол жеткізген сайын 35 млн акциядан тұратын 12 пакетке үміт арта алады. Мақсаттар қатарында: компанияның нарықтық құнын $8,5 трлн-ға дейін ұлғайту; пайданың 24 есеге өсуі; 12 млн электромобиль, 1 млн роботакси және 1 млн жасанды интеллектке негізделген робот сату міндеті бар.
Financial Times бұл көрсеткіштерді қазіргі жағдайда тым реалистік емес деп бағалайды.
Айта кетерлігі, бұл ұсыныс Масктың 2018 жылы мақұлданған $56 млрд көлеміндегі бонусына қатысты сот процестері жүріп жатқан тұста жасалды. Ол кезде де шарттар орындалмайды деген болжам болған, бірақ нәтиже толық жүзеге асып, Маск тарихтағы ең ірі сыйақыны алған еді.
Tesla акциялары қалай өзгуде?
2 қазанда Tesla акциялары 5%-дан астам арзандады, компания сол күні рекордтық жеткізілімдер туралы хабарлағанына қарамастан. Өткен тоқсанда Tesla алғаш рет үш тоқсандық төмендеуден кейін өсім көрсетті — 497 099 көлік жеткізіліп, Уолл-стрит болжамынан асып түсті.
3 қазан күні премаркет саудасында бағамдар 1,6%-ға көтерілді.
Қыркүйекте Tesla-ның нарықтық құны 33%-ға өсті, бұл жыл басындағы құлдырауды жаба отырып, 2025 жылғы ең үздік айлық нәтиже болды. Дегенмен, сарапшылар әлі де сақтық танытады:
46% аналитик акцияны сатып алуды (Buy/Overweight) ұсынады;
32% — ұстап тұруды (Hold);
24% — сатуды (Sell/Underweight) жөн көреді.
Bloomberg-тің мәліметінше консенсус-баға — $347, бұл компанияның нарықтық құны соңғы жабылудан есептегенде шамамен 20,4%-ға төмендеуі мүмкін дегенді білдіреді.
