Tesla-ға қарсы позиция ұстайтын инвесторлардың бірі компания акцияларын сату жөніндегі кеңесінен бас тартты. Не өзгерді?

UBS сарапшысы Джозеф Спак Tesla акциялары бойынша рейтингті «Сату» деңгейінен «Сақтап тұру» деңгейіне көтерді, деп хабарлады Barron's. Сонымен бірге Спак мақсатты бағасын өзгеріссіз $352 деңгейінде қалдырды. Бұл 14 сәуір сейсенбі күні жабылу бағасынан 3%-ға төмен.

UBS талдаушысының айтуынша қазіргі акция бағасы қысқа мерзімді сұраныс мәселелерін «дәлірек» көрсетеді, соның ішінде робот-таксиді іске қосу мен роботтарды дамытуға байланысты шығындардың өсуі мен электр көліктері сатылымдарының төмендеуі ескерілген. Ұзақмерзімді перспективада Спак жасанды интеллект саласында, соның ішінде робот-такси мен роботтарды әзірлеу және енгізу бойынша прогресті күтеді және шығарылуы мүмкін барлық акцияларды ескере отырып, компанияның құнын шамамен 1,6 трлн долларға бағалап отыр. Tesla-ның қазіргі нарықтық капитализациясы 1,36 трлн долларды құрайды.

Barron's-тың пікірінше UBS-тің рейтингі әлі «сатып алу» ұсынысы болмаса да, Tesla үшін оң белгі болып табылады. Сейсенбі күні сауда кезінде Tesla акциялары 3,3%-ға өсіп, $364,2-ге жетті. Алайда олар жыл басымен салыстырғанда әлі де 19%-ға төмен. Қаңтардың соңында жарияланған төртінші тоқсан есебінен бері акциялар құны шамамен бестен бірге жуық төмендеді. Пайда болжамдарының төмендеуі мен капиталдық шығындардың өсуі инвесторлардың көңіл-күйіне кері әсер етіп отыр, деп түсіндіреді Barron's. Компания маусым айында іске қосылған робо-такси қызметін біртіндеп кеңейтіп жатыр. Бас директор Илон Маск Tesla-ның робот-таксилері 2026 жылға қарай ондаған қалада қолжетімді болады деп күтеді, дегенмен қазіргі уақытта коммерциялық қызметтер тек Остин қаласымен шектелген, деп жазады басылым.

Компанияның бірінші тоқсан нәтижелері 22 сәуірде жарияланады. Уолл-стрит акцияға түсетін табысты 0,38 АҚШ доллары деңгейінде күтеді, ал бір жыл бұрынғы көрсеткіш 0,27 АҚШ долларын құраған. Пайданың өсуінің бір себебі жеткізу көлемінің артуы болуы мүмкін: 2025 жылдың бірінші тоқсанында Tesla шамамен 358 000 автокөлік жеткізді, ал бір жыл бұрын бұл көрсеткіш 337 000 болған, деп жазады Barron's.

FactSe-тіңt мәліметі бойынша Tesla акцияларын қарастыратын талдаушылардың 46%-ы оларды сатып алуды ұсынады. Barron's атап өткендей, S&P 500 компаниялары үшін бұл көрсеткіш әдетте 55–60% аралығында болады. Қазіргі уақытта талдаушылардың шамамен 15%-ы Tesla акцияларын сатуды ұсынады — бұл S&P 500 компанияларының орташа көрсеткішінен шамамен екі есе көп, деп атап көрсетеді басылым. Tesla акцияларының орташа мақсатты бағасы шамамен 405 АҚШ долларын құрайды, бұл қазіргі акция бағасынан 11%-ға жоғары.