Tesla жұмбақ анонс жасады, акциялары қымбаттады. Компания не көрсетпек?
Электромобиль өндірушісі Tesla әлеуметтік желі X (бұрынғы Twitter) парақшасында 7 қазанда өтетін маңызды жаңалыққа меңзейтін екі қысқа видео жариялады. Бірінші видеода айналып тұрған Tesla логотипі көрсетіліп, соңында «10/7» деген жазу пайда болады (АҚШ-та алдымен ай, кейін күн жазылады). Екіншісінде — қараңғылықта тек көліктің шамдары көрінеді. Екі ролик те ешқандай түсініктемесіз жарияланған.
Мерейтой ма, жаңа модель ме?
Reuters агенттігінің хабарлауынша Tesla осылайша 7 қазанда өтетін іс-шараға ишара жасаған болуы мүмкін. Инвесторлар мен сарапшылар бұл күні компания қолжетімді бағамен жаңа электромобиль моделін таныстырады деп күтуде. Мұндай модель сұранысты сақтап қалуға көмектеседі, деп жазады агенттік.
6 қазандағы пре-маркет саудасында Tesla акциялары 2%-ға жуық өсті.
Не белгілі
Reuters-тің мәліметінше Tesla бұған дейін АҚШ-та арзандатылған Model Y нұсқасын шығару жоспарын кейінге қалдырған. Маусым айында компания алғашқы үлгілер жиналғанын хабарлап, сатылымды тек төртінші тоқсанда бастайтынын және өндіріс көлемі бастапқы жоспардан баяу өсетінін айтқан болатын.
Дереккөздердің айтуынша, жеңілдетілген нұсқаның өндірісі ағымдағы Model Y моделінен шамамен 20%-ға арзан болады. Ал жылдық өндіріс көлемі 2026 жылға қарай АҚШ-та 250 мың бірлікке жетуі мүмкін.
Контекст
2 қазанда Tesla қыркүйекте аяқталған үш айда рекордтық жеткізілім көлеміне қол жеткізгенін хабарлады. Сатылым өсімі АҚШ-тағы $7500 мөлшеріндегі салықтық жеңілдіктің мерзімі аяқталуына дейінгі сұраныстың күрт артуымен байланысты.
Тизер-видеолар да дәл осы салықтық кредиттің күші жойылғаннан кейін бірден жарияланды. Reuters атап өткендей, бұл өзгеріс тұтынушылардың сатып алу мінез-құлқына әсер етіп, Tesla-ны баға саясатын қайта қарауға итермелеуі мүмкін.
Сарапшылар не дейді
MarketWatch дерегінше, Tesla акцияларын 50 аналитик бағалаған. Олардың ішінде 23-і сатып алуға (Buy, Overweight), 16-сы ұстауға (Hold), ал 11-і сатуға (Underweight, Sell) кеңес береді.
Консенсус бойынша мақсаттық баға — $351,96, бұл ағымдағы деңгейден шамамен 18%-ға төмен екенін білдіреді (3 қазан күнгі жабылу бағасы бойынша).
