Трамп Иранмен соғыстың екі-үш аптаның ішінде аяқталуы мүмкін екенін айтты.

АҚШ Президенті Дональд Трамп АҚШ-тың Иранмен соғысты екі-үш апта ішінде аяқтай алатынын айтты.

«Меніңше, екі аптаның ішінде — бәлкім екі, бәлкім үш. Біз әскерімізді шығарамыз, өйткені біздің онда болуға ешқандай себебіміз жоқ», — деді Трамп Ақ үйде тілшілерге (Bloombergсілтемесі бойынша).

Bloomberg АҚШ президентіне сілтеме жасап, Вашингтон мен Тегеран арасында белгіленген мерзімде келісімге қол жеткізу мүмкін екенін хабарлайды. «Біз [Ираннан] өте жақында кетеміз», – деді Трамп CNBC -ге берген сұхбатында. Трамптың айтуынша, АҚШ Иранға қарсы ауыр соққылар жасап жатыр, нәтижесінде «бәрі тоз-тозы шыққан».

31 наурызда газет жариялаған New York Post-пен сұхбатынан үзінділерде Трамп АҚШ «Орта Шығыста ұзақ қалмайтынын» және жаһандық мұнай мен газ жеткізімі үшін аса маңызды Ормуз бұғазын ашуда басқа елдер алға шығуы тиіс екенін айтты.

Сонымен бірге, ирандық БАҚ хабарлауынша, Иран президенті Масуд Пезешкиан белгілі бір кепілдіктер болған жағдайда – соның ішінде Иранға болашақта тағы шабуыл жасалмайтынына кепілдік берілсе – соғысты аяқтауға дайын екенін білдірді.

Инвесторлардың соғыстың тез аяқталуына деген үміті АҚШ қор нарығында ралли тудырды: 31 наурызда негізгі индекстер 2025 жылғы мамырдан бері ең ірі бір күндік өсімді тіркеді. Осы аралықта мамыр айына арналған Brent маркалы шикі мұнай фьючерстері 5%-ға өсіп, $118,37-ге жетті, ал маусым айына арналған фьючерстер керісінше 3,6%-ға төмендеді.

Axios есептегендей, Трамп өткен ай ішінде соғыстың жақын арада аяқталатынын кем дегенде 12 рет айтқан. Басылым атап өткендей, қақтығыс қазір бесінші аптаға өтті, ал Ақ үй бұған дейін оны төрт-тен алты апта аралығында аяқталады деп мәлімдеген.