Трамп Пауэллге қарсы сот ісін қарастыруда
АҚШ президенті Дональд Трамп ФРЖ төрағасы Джером Пауэллге қарсы сотқа жүгіну мүмкіндігін қарастырып отырғанын мәлімдеді. Америкалық көшбасшы реттеушінің пайыздық мөлшерлемені төмендетуден бас тартуын жиі сынға алады. Ал шілдеден бастап оған тағы бір себеп қосылды — Федералдық резерв жүйесінің штаб-пәтерін қайта құруға жұмсалған шығындар.
«Мен Пауэллге қарсы ФРЖ ғимараттарын салу жобасын басқарудағы қорқынышты әрі өрескел біліксіз жұмысы үшін ірі сот ісін бастау туралы ойлап жүрмін. 50 млн доллар тұруы тиіс жобаға 3 млрд доллар жұмсалды. Бұл — сұмдық!» — деп жазды Трамп Truth Social әлеуметтік желісіндегі парақшасында.
12 тамызда Ақ үйдің баспасөз хатшысы Каролин Левитт бұл ақпаратты растап, Barron's басылымына: «Президент ФРЖ-ға қарсы сот ісін қозғау мүмкіндігін зерттеп жатыр, бұдан артық түсініктеме бермеймін», — деді.
ФРЖ ғимараттарын қайта құру жобасы 2017 жылы мақұлданған. Бастапқыда оның құны шамамен 1,9 млрд доллар деп бағаланған, алайда кейін шығындар 2,5 млрд долларға дейін өсті. Шілде айының соңында Трамп Пауэллдің ілесуімен ФРЖ-ны өзі барып аралап, жүргізіліп жатқан жөндеу жұмыстарын көрді. Сол кезде ол алғаш рет шығын көлемін 3,1 млрд доллар деп атады. Алайда реттеушінің басшысы бұл сомаға басқа бір ғимаратқа жұмсалған шығын да кіретінін, ал ол жерде жөндеу жұмыстары бес жыл бұрын аяқталғанын нақтылады.
Пауэллдің ФРЖ төрағасы ретіндегі өкілеттігі 2026 жылдың мамырында аяқталады. Заң бойынша Трамп оны тек «салмақты себептер» — мысалы, анықталған немқұрайлылық немесе лауазымдық қылмыс болған жағдайда ғана қызметінен босата алады. Шілде ортасында президент: Пауэллді мерзімінен бұрын жұмыстан босату «аса екіталай, егер ол алаяқтық жасамаса» деген болатын.
Трамптың сот ісі мүмкіндігі туралы мәлімдемесіне қаржы нарығы салқынқанды қарады. Негізгі қор индекстері инфляция бойынша жігерлендіретін деректер жарияланғаннан кейін сақтап қана қоймай, өсуін де жалғастырды.
