Трамп пен Путиннің кездесуі 15 тамызда Аляскада өтеді
АҚШ президенті Дональд Трамп Ресей президенті Владимир Путинмен келіссөздері жұма күні, 15 тамызда, Аляска штатында өтетінін мәлімдеді. Бұған дейін Bloomberg пен The New York Times дереккөздері Трамп алдымен Путинмен жеке жүздесіп, содан кейін Украина президенті Владимир Зеленскийдің қатысуымен үшжақты келіссөз өткізуді қалағанын хабарлаған еді. Алайда Трамп кейінірек Ресей жағына ондай шарт қоймағанын айтты.
Егжей-тегжейлі
«АҚШ президенті мен Ресей президенті Владимир Путин арасындағы аса күтілетін кездесу келесі жұмада, 15 тамызда, ұлы Аляска штатында өтеді. Толық мәлімет кейін жарияланады. Бұл мәселеге назар аударғандарыңыз үшін рақмет!», – деп жазды Трамп Truth Social желісінде.
Кремль 15 тамызда Аляскада келіссөз өткізу туралы келісімге келгенін растады. Ресей жағының айтуынша кездесу «Украина дағдарысын ұзақ мерзімді бейбіт жолмен реттеу нұсқаларын талқылауға» арналмақ.
Президенттер не талқылауы мүмкін
The Wall Street Journal дереккөздерінің мәліметінше осы аптада Путин АҚШ-тың арнайы өкілі Стив Уиткоффқа Украинадағы атысты тоқтату жоспарын ұсынған. Ол Киевтің белгілі бір аумақтық жеңілдіктер жасауын көздейді. Газет сұхбаттасқан еуропалық және украиналық шенеуніктердің аты-жөнін жарияламады. WSJ ақпараты бойынша Путин атысты толық тоқтатуға келісетінін, бірақ ол үшін Ресейдің Қырымнан бөлек Донецк пен Луганск облыстарын толық бақылауға алуы керегін айтқан.
Bloomberg-тің дереккөздері Мәскеу мен Вашингтон Ресейдің соғыс барысында басып алған аумақтарды бақылауда қалдыруға мүмкіндік беретін келісім туралы талқылағанын хабарлады.
Ақ үйдің баспасөз хатшысы Кэролайн Ливитт WSJ-ға берген түсініктемесінде, Трамп пен оның ұлттық қауіпсіздік жөніндегі командасы Уиткоффтың Путинмен кездесуінен кейін украиналық және еуропалық әріптестерімен «бейбітшілікке жетудің ықтимал жолдарын» талқылап жатқанын айтты. «Ресеймен, Украинамен және еуропалық одақтастарымызбен жүргізіліп жатқан сыпайы дипломатиялық келіссөздерімізді құрметтей отырып, Ақ үй БАҚ-тағы болжамдарға түсініктеме бермейді», – деді ол.
Трамп осыған дейін тараптардың бейбіт келісімге жақындап қалғанын айтқан. Ал Украина президенті Владимир Зеленский бұған дейін бірнеше рет Киевтің Ресейге ешқандай аумақтық жеңілдіктер бермейтінін мәлімдеген. Bloomberg-тің пікірінше бейбіт келісімге делдал болу Трамп үшін ірі саяси жеңіс болар еді. Алайда Зеленский мен оның еуропалық одақтастары Путин АҚШ президентін бейбітшілік үшін шамадан тыс жеңілдіктер жасауға көндіре алады деп қауіптенеді.
Контекст
Трамп пен Путиннің жеке кездесуі 2019 жылдан бері алғаш рет өтеді. Трамптың Путинмен жақын арада кездесуге ниетті екені алғаш рет 6 тамызда, Уиткоффтың Мәскеудегі келіссөздерінен кейін белгілі болды. Сол кезде The New York Times дереккөздері Трамп алдымен Путинмен, содан кейін Зеленскиймен үшжақты кездесу өткізуді ойлағанын жазған. Ал Кремль Уиткоффпен келіссөздер барысында «мұндай нұсқаны мүлде түсіндірмегенін» мәлімдеді.
Трамп 7 тамызда Путин мен Зеленскийдің келіссөздері оның Путинмен кездесуінің шарты еместігін айтты.
