Трамптың ұлы миллиардер атанды: криптовалютадағы табысы отбасылық бизнесті басып озды
АҚШ президенті Дональд Трамптың ортаншы ұлы Эрик Трамп миллиардерлер қатарына қосылды деп хабарлады Forbes. Оның жеке байлығы American Bitcoin компаниясының биржадағы дебютінен кейін күрт өсті. Бұл компанияны ол ағасымен бірге негізін қалаған. Сауда кезінде American Bitcoin акцияларының бағасы екі еседен астам қымбаттады.
Егжей-тегжейі
Forbes дерегінше, American Bitcoin акцияларының алғашқы саудасынан кейін Эрик Трамптың байлығы кемінде 3,2 млрд доллар болып бағаланды. Құнды қағаздардың өсуі оның үлесін отбасының жылжымайтын мүлкінен де қымбат етті.
Дональд Трамптың жеке байлығын Forbes шамамен 6 млрд доллар деп есептейді. Оның көп бөлігі әлі де жылжымайтын мүлікке тиесілі, бірақ кейінгі жылдары пайыздық мөлшерлемелердің өсуінен бұл бизнес әлсіреп қалған.
Bloomberg дерегінше, Эрик Трамптың American Bitcoin компаниясындағы үлесі 7,5 пайызға жуық және 600 млн доллардан асады. Шілдеде АҚШ Бағалы қағаздар және биржалар комиссиясына берілген құжатта оның 367 млн-ға жуық акцияға иелік ететіні көрсетілген.
Эрик Трамп Forbes сауалына жауап бермеді.
Компания бизнесіне Дональд Трамптың үлкен ұлы кіші-Дональд Трамп та қатысады. Ол инвестор ретінде көрсетілгенімен, нақты үлесі ашылмаған.
American Bitcoin акцияларының өсуі
American Bitcoin-нің Nasdaq биржасындағы саудасы 3 қыркүйекте ABTC тикерімен басталды. Компания Gryphon Digital Mining фирмасымен бірігу арқылы ашық компания мәртебесіне ие болды.
Алғашқы сауда кезінде акциялар бағасы екі еседен артық өсіп, 14 долларға жетті. Кейін қарқыны бәсеңдеп, мәтін жарияланған сәтте шамамен 9,7 доллар болды. Бұл – 40 пайыздық өсім.
Эрик Трамп компания хабарламасында: «Nasdaq-тағы дебютіміз – биткоинді АҚШ капиталы нарығының орталығына енгізудегі тарихи кезең. Біз Америка жаһандық биткоин экономикасының даусыз көшбасшысына айналады деп сенеміз», – деді.
American Bitcoin туралы
American Bitcoin бастапқыда ашық майнинг-компания Hut 8-дің еншілес құрылымы ретінде құрылған. The Wall Street Journal дерегінше, Эрик пен кіші-Дональд Трамп және Hut 8 компанияның 98 пайызын иеленеді. Gryphon инвесторларына қалған 2 пайызы тиесілі.
Bloomberg хабарлауынша, American Bitcoin Hut 8-дің есептеу қуатын пайдаланып, биткоин жинауды жоспарлап отыр. Компания бәсекелестерінен өз артықшылығын «өз майнинг операциялары мен биткоинді іріктеп сатып алу» арқылы қалыптастырмақ.
American Bitcoin басқарма төрағасы әрі Hut 8 басшысы Ашер Генут: «Майнингті, нарықтағы сатып алуларды және Hut 8-дің энергетикалық әрі цифрлық инфрақұрылымын біріктіру арқылы біз әр акцияға шаққандағы биткоин көлемін жылдам арттыруға бағытталған құрал құрдық», – деді.
Компания шамамен 2443 биткоин жинады. Бұл Майкл Сэйлор насихаттаған «корпоративтік қазынашылық стратегиясына» сәйкес келеді.
Контекст
Yahoo Finance дерегінше, дүйсенбі күні Трамптармен байланысты World Liberty Financial компаниясының токені криптобиржаларда пайда болды. Бағасы алғашында күрт өсіп, кейін төмендеді. Сәрсенбіде ол шамамен 5 пайыз арзандап, капитализациясы бойынша 27-орында тұрды.
Жоба сайтында Дональд Трамп пен оның ұлдары кіші-Дональд, Эрик және Бэррон негізін қалаушылар ретінде көрсетілген. Бірақ президент қызметіне кіріскен соң Дональд Трамп бұл рөлден бас тартты. Yahoo Finance жазғандай, отбасы World Liberty токендерінің төрттен біріне жуық, яғни 22,5 млрд данасына иелік етеді. Бұл үлес DT Marks DEFI LLC арқылы бақыланады. Листингтен кейін олардың құны 5 млрд доллардан асты.
Соңғы бір жылда Трамптар отбасы жылжымайтын мүліктен цифрлық активтерге бет бұрды. Олар доллармен қамтамасыз етілген стейблкоин жобасынан бастап, Дональд Трамптың өзі шығарған мемкоинға дейін іске асырды. Бұған қоса, Truth Social әлеуметтік желісінің бас компаниясы да биткоин резервін жинай бастады.
Қоғамдық компаниялардың корпоративтік резерв ретінде биткоин жинауы 2025 жылы жаңа трендке айналды. Себебі ең ірі криптовалюта бағасы бірнеше рет рекорд жаңартып, күрт өсті. CoinGecko дерегінше, сәрсенбіде биткоин шамамен 1,5 пайыз қымбаттап, 112 500 доллар болды. Жыл басынан бері ол 19 пайызға өскен.
