TSMC жасанды интеллект чиптеріне сұраныстың артуы есебінен рекордтық табыс тапты
Әлемдегі ең ірі келісімшарттық чип өндіруші Taiwan Semiconductor Manufacturing Co. (TSMC) 2025 жылдың үшінші тоқсанында рекордтық сатылым мен пайдаға қол жеткізді. Компанияның жоғары көрсеткіштеріне жасанды интеллект (ЖИ) секторындағы бум мен Apple өнімдерінің жаңа буыны ықпал етті.
Егжей-тегжейлі
TSMC-тің мәліметінше, таза пайдасы шілде–қыркүйек айларында жылдық есепте 39,1%-ға өсіп, 452,3 млрд тайвань долларына (шамамен $15,1 млрд) жетті. Түсім 30%-ға артып, 989,9 млрд тайвань долларын ($32,3 млрд) құрады — бұл компания тарихындағы ең жоғары көрсеткіштер.
LSEG консенсус-болжамы таза пайданың 417,7 млрд тайвань долларын ($13,6 млрд), ал түсімнің 977,5 млрд тайвань долларын ($31,9 млрд) құрайды деп күткен еді, деп хабарлайды CNBC.
Есеп Тайбэй биржасындағы сауда аяқталғаннан кейін жарияланды. АҚШ-тағы Blue Ocean ATS алаңындағы сауда кезінде TSMC акциялары шамамен 3%-ға қымбаттады.
Аналитиктер не дейді
Macquarie сарапшысы Артур Лайдың айтуынша, сауда кедергілері мен экономикалық баяулаудың ықтимал теріс әсері әзірге байқалмай отыр, бұл TSMC-тің қысқа мерзімді тұрақтылығын және сыртқы тәуекелдердің бақыланатын деңгейін көрсетеді.
Оның пікірінше, клиенттердің заманауи өндіріс техпроцестеріне көшуі компанияға өнім бағасын қымбаттатуға мүмкіндік береді, бұл болашақ табысты арттырады.
FactSet деректері бойынша, Уолл-стрит сарапшыларының басым бөлігі TSMC акцияларын “сатып алуға” кеңес береді — 47 талдаушының 45-і “Buy” немесе “Overweight” рейтингін берген.
Контекст
2025 жылы TSMC акциялары 50%-дан астам өсті, себебі инвесторлар компания өнімдеріне сұраныс жоғары болады деп күтуде. Негізгі клиенттері — Nvidia, AMD және Broadcom — OpenAI мен Oracle секілді ірі ЖИ-сервис жеткізушілерімен деректер орталықтарының қуатын кеңейту жөнінде ұзақмерзімді келісімдер жасасты.
Сонымен қатар, Apple өнімдерінің жаңартылған желісі де тапсырыстар көлемін арттырды. iPhone, iPad және MacBook жаңа модельдері үшін чиптерге сұраныс күшейді, деп жазады Nikkei Asia.
Ал чип өндіру жабдықтарын жасайтын америкалық Applied Materials компаниясы ЖИ-ға байланысты сұраныстың бәсеңдеу белгілері байқалмайтынын мәлімдеді.
Еуропалық ASML компаниясы да 15 қазандағы есебінде Қытайдағы сұраныс төмендегеніне қарамастан, 2026 жылы кіріс төмендемейді деп болжап отыр.
