Юань 2023 жылдан бері ең жоғары деңгейге көтерілді. Бұл АҚШ-тың мемлекеттік қарызымен қалай байланысты

Пекиннің қытайлық банктерден АҚШ мемлекеттік облигацияларына инвестицияларын азайтуды сұрағаны туралы хабарламалардан кейін юань 2023 жылғы мамырдан бергі ең жоғары деңгейге дейін нығайды. Қытай АҚШ мемлекеттік қарызына инвестиция салу тәуекелдеріне алаңдайтын жалғыз ел емес: сарапшылардың айтуынша, Еуропа мен басқа да Азия елдерінде де осындай күмән болуы мүмкін.

10 ақпан таңертең Trading Economics мәліметіне сәйкес қытай реттеушілері банктерді АҚШ мемлекеттік қарызына инвестицияларды шектеуге шақырғаны туралы жаңалықтан кейін юань долларға шаққанда 6,9-ға дейін өсіп, 34 айдағы ең жоғары деңгейге жақындады. Қытайдағы қаржы институттарына мемлекеттік қазынашылық портфельдерін қысқартып, жоғары тәуекелге ұшыраған позицияларды азайтуға кеңес беріліп отыр: реттеушілер мұны шоғырлану тәуекелі мен Вашингтонның белгісіз экономикалық саясатының салдарын азайту қажеттігімен түсіндіреді, деп хабарлайды Bloomberg дереккөздерге сілтеме жасап.

Бейжіңнің сұранысы қытай активтеріне капиталдың қайта оралуын жеделдетіп, юаньды қолдауға мүмкіндік береді, – деп атап өтті агенттік.

Bloomberg инвестициялық стратегі Марк Кранфилд тің айтуынша Қытай билігінің АҚШ мемлекеттік қарыз облигациялары туралы ескертуі Еуропа мен Азияның қаржылық орталарында әлдеқашан сыбыспен тарап жатқан көзқарастарды көрсетеді. Сарапшы бұл юань үшін оң фактор деп есептейді, себебі жаһандық инвесторлар өз инвестицияларын баламалы валюталарға әртараптандыруға ұмтылуда.

Pepperstone Group сарапшысы Крис Уэстонның айтуынша, қытай юанінің нығая беруі доллардың жаппай сатылуын күшейтіп отырған негізгі факторлардың бірі болып отыр. Сонымен қатар Қытайдың Халық банкі бұрынғыдай айырбас бағамын қатаң ұстап тұрудан бас тартып, юаннің күшеюіне көбірек жол беріп жатыр.

Reuters-тің хабарлауынша доллардың әлсіреуінің басты себебі қазір техникалық факторға байланысты болуда: инвесторлар жаппай түрде қатаң ақша-несие саясатына ставка жасап ашқан ұзын позицияларын жауып жатыр. Бұл пікірді Moneycorp стратегi Юджин Эпштейн айтты. Бұған дейін «қатаң саясатты жақтаушы» кандидат Кевин Уорштың АҚШ ФРЖ басшысы қызметіне ұсынылуы доллардың әлсіреу үрдісін тоқтатқан еді, алайда қазір нарық бұл қозғалысты кері қайтарып, «Уорш-трейдті» жабуда, деп түйіндеді Эпштейн.

2025 жылғы қыркүйектің соңынан бері юань шамамен 3%-ға өсіп, Bloomberg мәліметі бойынша Азиядағы ең жылдам өсіп келе жатқан үшінші валютаға айналды. Юаньның өсуінің басым бөлігі президент Дональд Трамп әкімшілігінің бюджеттік және сауда саясатына қатысты белгісіздік салдарынан доллардың әлсіреуіне байланысты. Агенттік атап өткендей, қытай валютасы сондай-ақ Қытай орталық банкінің юаньның нығаюына деген төзімділігінің артуы мен елге капитал ағынының күрт өсуі арқасында қолдау тапты.

Ақпан айының басында Bank of America юаньға қатысты болжамын жақсартты. BofA-ның жаңартылған бағалауына сәйкес, 2026 жылдың үшінші тоқсанының соңына қарай қытай валютасы долларға шаққанда бұрын күтілген 6,8 емес, 6,7 деңгейінде саудаланады. Goldman Sachs алдағы 6 айда юаньның долларға шаққанда 6,8-ге, ал 12 айда 6,7-ге дейін нығаятынын болжайды.