Uber мен Lyft Baidu-мен Лондонда роботакси сынағын өткізуге келісті. Акциялар өсті
АҚШ-тағы такси шақыру сервистері Uber мен Lyft Қытайдың Baidu компаниясымен бөлек-бөлек серіктестік жариялады. Мақсат — 2026 жылы Ұлыбританияда жүргізушісіз такси қызметін іске қосу, деп хабарлады Reuters. 22 желтоқсандағы саудада екі компанияның акциясы бірнеше пайызға көтерілді.
Егжей-тегжейі
Келісім шарттарына сай, 2026 жылы Лондонда Uber мен Lyft желілерінде Baidu-дың Apollo Go RT6 көліктері сынақ үшін пайда болады. Reuters мұны Еуропа астанасында америкалық және қытайлық алыптардың тікелей бәсекеге түсуінің алғашқы мысалы деп атап өтті. Бұл әсіресе Google-дың еншілес компаниясы Waymo жүргізушісіз көліктерін сынақ сапарларына шығарғаннан кейін маңызды болып отыр.
Дүйсенбідегі саудада Uber акциясы бір сәтте 3,7% қымбаттап, бағасы $82,25-ке жетті. Lyft қағаздары одан да жылдам өсті: бір сәтте $20,52-ге дейін көтерілді, бұл алдыңғы күнгі жабылудан 5,7% жоғары.
Бұл нені білдіреді?
Reuters жазуынша, Lyft үшін Лондонда жүргізушісіз таксиді сынау — $200 млн-ға еуропалық FreeNow такси қосымшасын сатып алғаннан кейін халықаралық кеңеюге негіз болуы мүмкін.
Сонымен бірге роботаксидің бизнес-моделі қаншалықты табысты болатыны әзірге анық емес, деп жазады Bloomberg. Бұл саладағы Pony AI және WeRide сияқты жария компаниялар әлі де шығынмен жұмыс істеп отыр: олар қаражат тарту үшін IPO кезінде акция сатқан, дейді агенттік. Reuters мәліметінше, талдаушылар автономды көліктер паркінің қымбат болуы Uber мен Lyft сияқты платформалардың пайда маржасын төмендетуі мүмкін деп ескертеді. Ең өміршең үлгі ретінде талдаушылар аралас жүйені атайды: сұраныс пен баға шарықтайтын кезде роботаксиға қоса адам жүргізушілер де жұмыс істейді.
Reuters тағы бір үрдісті атап өтеді: Baidu мен WeRide Таяу Шығыс пен Швейцарияда жұмысын кеңейтіп жатыр. Ал АҚШ-тағы Остин мен Сан-Франциско, БАӘ-дегі Абу-Даби және Қытайдағы Ухань роботакси қызметінің ірі орталықтарына айналған.
Аналитиктер не ұсынады?
Uber акциясы 2025 жылы шамамен 35% қымбаттады. MarketWatch дерегіне сай, талдаушылар көбіне сатып алуға кеңес береді: 42 Buy және алты Overweight (“нарықтан жоғары”) рейтингі бар, ал 11 Hold (“ұстау”) бар. Сатуға кеңес жоқ. Орташа мақсатты баға $112,4 — бұл соңғы жабылудан 42% жоғары.
Lyft акциясы қаңтардан бері 56% өсті. Бірақ Уолл-стриттегі пікір біркелкі емес: ең жиі ұсыныс — ұстау (33 Hold). Сатып алуға 15 кеңес бар (14 Buy және бір Overweight), сатуға екі кеңес бар (бір Sell және бір Underweight). Орташа есеппен бағаның өсу әлеуеті 26% деп бағаланады.
Контекст
Bloomberg жазуынша, Uber 2020 жылы автономды жүргізу технологиясын әзірлейтін өз бөлімшесінен бас тартып, оны Aurora стартапына сатқан. Қазір компания әртүрлі роботакси жасаушылармен серіктестікке сүйенеді. Uber басшысы Дара Хосровшахи Bloomberg Television-ға берген сұхбатында сервистің келесі жылдың соңына қарай оннан аса қалада жүргізушісіз сапарларды іске қосуды жоспарлап отырғанын айтқан.
Bloomberg дерегінше, Uber бәсекелестері де ұқсас жолды таңдаған: Lyft Еуропада роботакси іске қосу бойынша Baidu-мен бөлек келісім жасаған, ал Оңтүстік-Шығыс Азиядағы Grab қытайлық WeRide және Momenta компанияларымен жұмыс істейді.
