Uber-дің табысы өсті. Бірақ неге оның акциялары арзандап кетті?
Такси шақыру сервисі Uber үшінші тоқсандағы жақсы табыс есебіне қарамастан, акцияларын шамамен 7%-ға арзандатып алды. Инвесторларды компанияның нақты операциялық табысы болжамнан төмен болғаны ренжіткен болуы мүмкін. Дегенмен, Уолл-стриттегі сарапшылардың 80%-ы Uber акцияларын сатып алуға кеңес береді. Биыл бұл акциялар 65%-ға қымбаттаған.
Uber есебінде не айтылды?
– Компанияның операциялық табысы (бір реттік салықтық және инвестициялық жеңілдіктерді есептемегенде) $1,1 млрд болды. Сарапшылар $1,6 млрд болады деп күткен. Barron’s басылымы мұны жалпы және әкімшілік шығындардың артуымен түсіндіреді.
– Түсім $13,5 млрд-қа жетті. Бұл өткен жылмен салыстырғанда 19%-ға артық (тұрақты валюта есебімен). Бұл көрсеткіш сарапшылар болжаған $13,3 млрд-тан жоғары болды.
– Бір акцияға шаққандағы пайда (EPS) $1,2 болды — бұл Barron’s келтірген орташа болжам ($0,69) көрсеткішінен әлдеқайда жоғары. Компанияның таза табысы $6,6 млрд-ты құрады, бірақ оның ішінде $4,9 млрд салықтық жеңілдік пен басқа жобалардағы үлестерді қайта бағалаудан түскен $1,5 млрд кіріс бар екенін Uber нақтылады.
– Жалпы тапсырыс көлемі (Gross Bookings) $49,7 млрд-қа дейін өсті. Бұл нәтиже жолаушылар тасымалы мен Uber Eats қызметі бойынша жақсы көрсеткіштердің арқасында болжамнан жоғары болды. Платформадағы ай сайынғы белсенді қолданушылар саны 17%-ға өсіп, 189 млн-ға жетті. Ал сапарлар саны 3,5 млрд болды. Бұл былтырғыдан 22% көп.
– Төртінші тоқсанда Uber жалпы тапсырыс көлемі $52,25–53,75 млрд болады деп күтуде. Бұл да Уолл-стриттің орташа болжамынан сәл жоғары, деп жазады Yahoo Finance.
Сарапшылар не дейді?
Uber акциялары биыл 65%-ға өскеніне қарамастан, сарапшылардың 80%-ы оларды сатып алуға кеңес береді. Қалған 20%-ы бейтарап көзқараста. Орташа мақсатты баға акциялардың тағы 10%-ға өсу мүмкіндігі барын көрсетеді, ал ең жоғары болжам 50%-ға дейін өсуі мүмкін дейді.
