UBS «сатып алуға» ұсынған өнеркәсіп секторының 11 акциясын атады
UBS сарапшылары 11 өнеркәсіптік компанияны бөліп көрсетіп, оларды «сатып алуға ұсынылған ең қызықты инвестициялық идеялар» деп атады, деп жазады Business Insider. Басылым өнеркәсіп секторын нарықтың бағаланбаған бөлігі санайды. Биыл бұл сектор қаңтардан бері 15,2% өсіп, S&P 500 индексінің өсімін басып озды.
UBS тізіміне сарапшылардың пікірі нарықтағы консенсустен ерекшеленетін немесе банктің ерекше деректерге сүйеніп берген ұсынысы бар компаниялар енді.
UBS қай акцияларды ұсынады?
— Woodward — аэроғарыш және энергетика салаларына басқару жүйелері мен компоненттер өндіруші. UBS пікірінше, компания табыс деңгейінің артуы, бос ақша ағымының екі есе көбеюі және өнеркәсіп сегментіндегі өсу арқасында мықты позицияда тұр. 2026 жылға банк болжамдары табыс пен ақша ағымы бойынша Уолл-стрит консенсусынан 3%, 6% және 11%-ға жоғары. Жыл басынан бері акциялары 44%-ға қымбаттады.
— Alaska Air Group — әуе тасымалдаушы. UBS оның ұзақмерзімді әлеуетін премиум орындар үлесінің 27%-дан 29%-ға артуымен, адалдық бағдарламасының дамуы және жаһандық кеңеюімен түсіндіреді. Сарапшылар қысқа мерзімде де тәуекелдердің азайғанын атап өтті. Жыл басынан бері компания құны 11%-дан астам төмендеді. Дегенмен Уолл-стритте 17 сарапшының 16-сы акцияны сатып алуға кеңес береді.
— CSX Corporation — теміржол операторы. UBS болжамынша, 2025–2026 жылдары компанияның бір акцияға шаққандағы табысы өседі. Тәуекелдер аз, өйткені M&A мәмілелері бойынша күтілімдер төмен, ал P/E мультипликаторы 17-де тұр (бес жылдық орташа — 18). 2026 жылы екі ірі құрылыс жобасының аяқталуы шығындарды $100 млн-ға қысқартып, жаңа қуат қосады. 2025 жылы акция бағасы 3,6% өсті.
— TE Connectivity — Швейцарияның электронды компоненттер өндірушісі. UBS үш оң факторды атайды: AI секторындағы үлесі, Industrial Solutions бөлімшесінің тұрақтануы және жаңа бағыттарға — дата-орталықтар, энергетика, автоматтандыру шешімдеріне шығуы. Жыл басынан бері акциялары 52% өсті.
— Comfort Systems USA — HVAC (жылыту, желдету, салқындату) жүйелерін орнатушы және қызмет көрсетуші. UBS дерегінше, компания дата-орталықтар мен өнеркәсіп нысандарынан тұрақты сұраныс көруде. Бұл кірісті арттырады, ал маман тапшылығы жоғары маржаны ұстап тұруға мүмкіндік береді. Жыл басынан бері акциялары 88,5% қымбаттады.
— DuPont — өнеркәсіпке, электроника мен биотехнологияға арналған материалдар өндіруші. UBS компания алдағы екі айда бизнесін бөледі (1 қарашаға жоспарланған) және жаңа құрылымды таныстырады деп жазады. Бұл акция бағасының қайта бағалануына түрткі болуы мүмкін. Жыл басынан бері акциялары 2,4% өсті.
— Johnson Controls International — ғимараттарға арналған жылыту, салқындату, желдету және қауіпсіздік жүйелерін өндіруші. UBS 2025–2028 жылдары компания пайдасының 60%-ға дейін өсуі мүмкін деп есептейді. Жыл басынан бері акциялары 37,4%-ға қымбаттады.
— Advanced Drainage Systems — дренаждық құбырлар мен су бұру жүйелерін өндіруші. UBS компанияны құрылыс материалдары секторындағы басты инвестициялық мүмкіндік деп санайды. 2027 жылға банк болжамы бойынша кіріс өсімі 8%, ал нарық консенсусында — 5,7%. Жыл басынан бері акциялары 25% өсті.
— Quanta Services — энергетикалық инфрақұрылым мен байланыс желілерін салушы. UBS 2024–2029 жылдары бір акцияға шаққандағы табыс жылына 13% өседі деп болжайды. Негізгі факторлар — электр желілері мен жаңартылатын энергетикаға инвестициялар, қосымша драйвер — телеком және жер асты инфрақұрылымдық жобалары. Жыл басынан бері акциялары 23,6% қымбаттады.
— Sealed Air Corp — тамақ өнеркәсібі мен логистикаға арналған қаптама материалдарын өндіруші. UBS оны қағаз және орау секторының ең үздік таңдауы деп атады. Банк 2025 соңына қарай сатылымдардың құлдырауы бәсеңдеп, кейін жылдық өсім 1,6% болады деп күтеді. Жыл басынан бері акциялары 1,6% қымбаттады.
— Zebra Technologies — штрих-код сканерлері, деректер жинау терминалдары мен логистика автоматтандыру шешімдерін өндіруші. UBS пікірінше, 2025 жылдың екінші жартысынан бастап және 2026 жылы сұраныстың артуы акциялардың өсуіне ықпал етеді. Қосымша фактор — Elo компаниясымен келісім (сенсорлық экрандар өндірушісі). Жыл басынан бері акциялары 16,4% арзандады.
