Унциясы $100? Рекордтық раллиден кейін күмістен өсім күтіледі
10 желтоқсанда күміс тарихи максимумды жаңартып, $62-дан асқаннан кейін сарапшылар оның бағасы унциясына $100-ға жетеді деген болжамды растады, деп жазды CNBC.
Егжей-тегжейлі
Сәрсенбі, 10 желтоқсанда күмістің спот бағасы тарихи максимумды жаңартып, унциясына $62,88 деңгейіне жетті. Одан бір күн бұрын күміс алғаш рет $60 белгісінен асқан еді. Жыл басынан бері металдың құны 114,6% өсті.
Күміс фьючерстері де күрт қымбаттады: 2025 жылы 113% өсіп, осы аптада алғаш рет $61-ден жоғарылады. Ұсыныстың шектелуі, қорғаныс активтеріне сұраныстың артуы және күмістің маңызды өнеркәсіптік металл ретіндегі рөлі раллиді күшейтіп, нәтижесінде күміс биыл алтыннан озып шықты.
Күміс инвесторларға несімен тартымды?
CNBC-ге берген түсініктемесінде Solomon Global компаниясының басқарушы директоры Пол Уильямс күміске деген қызығушылықтың артуын оның негізгі өнеркәсіптік секторларда рөлінің кеңеюімен байланыстырды. Ол сондай-ақ, күмістің инвесторлар үшін «түсініксіздік пен құбылмалылық жағдайында құнды сақтау құралы» болатынын атап өтті.
«Күмістің қос табиғаты — бір жағынан маңызды өнеркәсіптік ресурс, екінші жағынан құнды сақтау құралы — оны әрі бөлшек, әрі институционалдық инвесторлар үшін тартымды етіп отыр. Алтын бағасы қолжетімсіз болып бара жатыр деп ойлайтын, бірақ бағалы металдар бумына қатысқысы келетіндер үшін күміс қазір де, болашақта да сенімді балама болады деп есептеймін», — деді сарапшы. Ол «күмісті қолдайтын негізгі факторлардың барлығы сақталып отыр» деп қосты. Сонымен бірге Уильямс күміс нарығында құбылмалылықтың жоғары болуы мүмкін екенін ескертті.
Күміс — өнеркәсіптің негізгі компоненті: оны электр қосқыштарында, күн панельдерінде, мобильді телефондарда, сондай-ақ жасанды интеллектті дамытуға қажет жабдықтар мен инфрақұрылымда қолданады, деді CNBC. «Нәтижесінде күміске деген әлемдік өнеркәсіптік сұраныс өсуді жалғастырады, өйткені жетекші технологиялық салалардың қажеттілігі алдағы бес жылда жеделдей түседі», — деп жазылған CNBC келтірген Silver Institute есебінде. Металл қаңтардан бері бағасын екі еседен астам өсірді: көп жылдық ұсыныс тапшылығы, оған өнеркәсіп пен инвесторлар тарапынан жоғары сұраныстың қосылуы күмістің жетіспеуіне және қазан айында өткір тапшылыққа әкелді, деді Financial Time.
Сарапшылар пікірі
Уильямстың айтуынша, металдың бағасына сұраныс пен ұсыныс арасындағы теңгерімсіздік те әсер етеді, ал «сайтан металл» атанған күміске қатысты ұзақмерзімді фундаменталдық факторлар одан сайын күшейіп келеді.
Уильямс күмістің бағасы $100-ға дейін өседі деген болжамын алғаш рет қазанда айтқан, ол кезде металл $50 деңгейіне жақындап қалған еді. Сол кезде сарапшы бұл бағалы металдың құны 2026 жылдың соңына қарай екі еседен астам өсуі тиіс деп есептейтінін мәлімдеген. Сол уақыттан бері оның пікірі өзгермеген: «2026 жылға арналған күміске қатысты болжам оң. Нарықтағы құрылымдық тапшылықты ескерсек, кез келген қысқа мерзімді төмендеу — трендтің бұзылуы емес, уақытша пауза ғана болуы мүмкін», — деп түсіндірді сарапшы.
BNP Paribas Fortis стратегия жөніндегі директоры Филипп Гейсельс те күміске қатысты оң көзқараста. «Бағаланбай тұрған актив, жылдарға созылған тапшылық және жаңа өнеркәсіптік революция тоғысқанда, нарықта кереметтер болуы мүмкін», — деді ол CNBC арнасына. Алайда сарапшының айтуынша, келесі жылы бағалы металдар нарығы құбылмалы болуы ықтимал: инвесторлардың пайда фиксациясы күмістің унциясы $100-ға жетпей тұрып-ақ «күрт төмендеулерге» әкелуі мүмкін. «Біз біраз уақыт бұрын күмісті шикізат нарығындағы “ұйқыдағы ару” деп атағанбыз: ол көп жыл бойы тапшылықта болды және ақыры оянып, ондаған жыл сақталған $50 деңгейінен екі есе өсті», — деді ол.
Standard Chartered сарапшысы Суки Купердің пікірінше, күмістің қазіргі бағасының өсуіне негізгі себеп — нарық бес жылдан бері ұсыныс тапшылығын сезініп отыр, ал аймақтық қор теңгерімсіздігі де сақталып келеді. Бұл пікірді Financial Times келтірді.
Газеттің жазуынша, алтыннан айырмашылығы, күміс көбіне басқа минералдарды өндіру кезінде қосалқы өнім ретінде алынады. Сондықтан соңғы жылдары тау-кен компаниялары сұраныстың жедел өсуіне тез жауап бере алмады. Осы жағдай АҚШ-та соңғы айларда күмістің үлкен қорларының жиналуына әкелді — Вашингтонның күміске баж енгізуі мүмкін деген қауіп инвесторларды алдын ала әрекет етуге итермеледі; ал бұл шара қабылданса, басқа елдердегі тапшылық одан әрі күшеймек.
