Валюта, акциялар, қарыздық қағаздар: трейдерлер 2025 жылы неден ұтты, неден қателесті
Әскери қақтығыстар мен Дональд Трамптың күтпеген сауда саясаты АҚШ экономикасының күшіне деген қалыптасқан түсінікті бұзып, қаржы нарығында күтпеген бенефициарлардың пайда болуына себеп болды. Көпшілік доллар — «америкалық ерекшеліктің» символы күрт әлсірейді, басты америкалық индекс S&P 500 әуелі құлдырап, кейін рекорд жаңартады, ал бұрын артта қалған еуропалық акциялар кенеттен міндетті инвестицияға айналады деп күтпеді.
Bloomberg 2025 жылдың алғашқы алты айында кәсіби инвесторлар қай жерде қателесіп, қай жерде дәл болжағанын анықтады.
Доллар
Нарық АҚШ президенті Дональд Трамптың салықтарды төмендетіп, баж салығын көтеруі инфляцияны күшейтіп, ФРЖ-ны мөлшерлемелерді жоғары ұстап тұруға мәжбүр етеді деп күтті — бұл долларды қолдауы керек сияқты еді. Алайда басты резервтік валютаның индексі соңғы 20 жылдағы ең нашар жыл басын көрсетті, деп жазады Bloomberg. Financial Times деректеріне сүйенсек, доллар үшін 1973 жылдан бергі ең нашар алғашқы жарты жылдық болды. Әсіресе сәуірдегі «Бостандық күні» кезінде енгізілген баждардың көлемі мен агрессивтілігі рецессия қаупін күшейтіп, Ақ үй әдейі долларды әлсіретіп, экспортты қолдап жатыр деген пікірлер туғызды.
JPMorgan, Morgan Stanley және Societe Generale сарапшылары доллардың позициясын осылай тез жоғалтады деп күтпеді — олардың сценариінде доллар біртіндеп әлсіреуі керек еді, деп атап өтті Bloomberg. Енді JPMorgan доллар бағамы, пайыздық мөлшерлемелер мен қор нарығы арасындағы айырмашылық құрылымдық әлсіздіктің куәгері болуы мүмкін дейді. Уолл-стриттің ірі банкі 2025 жылдың соңына дейін доллар тағы 2% арзандайды деп болжайды.
АҚШ акциялары
Инвесторлар 2025 жылды АҚШ акцияларына рекордтық үлеспен бастады — олар күшті экономика мен жасанды интеллектке деген қызығушылыққа сенді. Бірақ көктемге қарай бұл оптимизм жойылды. Алдымен Қытайдың жасанды интеллект саласындағы DeepSeek стартапы АҚШ-тың технологиялық алыптарына көшбасшылыққа бәсекеге түсті. Кейін Трамптың баж салығы рецессияға әкелуі мүмкін деген қорқыныш пайда болды.
Ақпаннан сәуірге дейін АҚШ акциялар нарығы шамамен $7 трлн капитализациядан айырылды, әсіресе технология секторы қатты зардап шекті. Наурызда Bank of America сауалнамасы америкалық акциялардан рекордтық қаржы ағыны кеткенін көрсетті. Сәуірге қарай Уолл-стриттегі «бұқалық» көңіл күйі толықтай жоғалды. Бірақ Трамп баж салығын енгізуді тоқтатқан кезде оптимизм қайта оралды: маусым айының соңында S&P 500 рекорд жаңартты, ал америкалық технологиялық алыптар нарықтың басты фаворитіне айналды.
Мемлекеттік облигациялар
Инвесткомпаниялар қысқа мерзімді бондтар орталық банктер мөлшерлемелерді төмендеткенде ұтады деп күтті. Ал ұзақ мерзімді мемлекеттік облигациялар қарыздың өсуі мен мемлекеттік шығындардың артуынан зардап шегуі керек еді. Дәл солай болды, әсіресе АҚШ-та, онда нарықтар салық-бюджет саясатын жіті бақылап отыр, деп жазады Bloomberg. Pimco мен Allspring Global Investments қысқа және ұзақ мерзімді облигациялардың кірістілігі тарайтынын дәл болжады, ал BlackRock ұзақ мерзімді бондтардың үлесін дер кезінде азайтты.
Еуропалық акциялар мен еуро
Жыл басында еуропалық акцияларға сенетін инвесторды табу қиын еді — тіпті олардың америкалық акциялардан озып кетеді деп сенетіндер мүлде болған жоқ. Бірақ жағдай бірден өзгерді: Германия Трамптың «Еуропа өз қауіпсіздігі үшін өзі төлеуі керек» деген талабына жауап ретінде рекордтық қорғаныс шығынын жариялады. Соның нәтижесінде еуропалық Stoxx Europe 600 индексі өткен аптаның соңына қарай S&P 500-ден 16 пайыздық пунктке артық өсіп, 2006 жылдан бергі рекордтық айырмашылықты көрсетті. Еуро $1,17-ге дейін қымбаттады, ал 2025 жылдың басында валюта сарапшылары паритет болады деп, доллардың күшеюін күткен еді.
Дамушы нарықтардың жандануы
2017 жылдан бері дамушы елдердің акциялары америкалық акциялардан қалып келе жатқан еді. 2025 жылдың басында Morgan Stanley бұл үрдіс өзгереді деп сенімді болды. Солай болды да: Тайвань, Оңтүстік Корея және Қытайдағы ЖИ компанияларының өркендеуі индекс өсуіне серпін берді. Дамушы нарықтардың капитализациясы $1,8 трлн өсіп, рекордтық $29 трлн-ға жетті. InTouch Capital Markets сарапшысы Бернд Бергтің пікірінше, қалыпты инфляция мен тұрақты өсімнің арқасында инвестиция ағыны жалғасады.
