Wells Fargo Reddit акцияларына қызығушылығын жоғалтты: ЖИ қатысымға кері әсер етті
Wells Fargo компаниясы Reddit әлеуметтік желісінің иесіне тиесілі компания акцияларының рейтингін төмендетіп, оларды енді сатып алмауға кеңес береді. Банк сонымен қатар қағаздардың мақсатты бағасын да түсірді. Сарапшылардың пікірінше, адамдар ақпаратты жиі жасанды интеллект арқылы іздей бастағандықтан, интернет-форумға іздеу жүйелері арқылы келушілерді тарту қиындауы мүмкін. Ал қатысым жарнамалық табысқа тікелей әсер етеді. Wells Fargo бұл мәселелер уақытша емес, ұзақ мерзімді сипатқа ие болуы мүмкін екенін және мұндай қиындықтар тек Reddit-пен шектелмейтінін ескертті.
Егжей-тегжейлі
Wells Fargo сарапшысы Кен Гаврелски Reddit акцияларының рейтингін «нарықтан жоғары» (Overweight) деңгейінен «нарыққа тең» (Equal Weight) деңгейіне дейін төмендетіп, оларды сатып алуға берген ұсынымынан бас тартып, енді жай ғана ұстауға кеңес беруде. Сонымен қатар, ол акциялардың мақсатты бағасын $168-ден $115-ке дейін түсірді — бұл 16 мамыр, жұма күнгі жабылу бағасынан небәрі 1,5% ғана жоғары болды.
19 мамыр, дүйсенбі күнгі сауда барысында Reddit акциялары бір сәтте соңғы екі аптадағы ең төменгі көрсеткішті көрсетті: 7,4%-ға арзандап, $104,8-ге дейін түсті.
Сарапшының шешіміне не әсер етті?
Wells Fargo Reddit платформасының қатысымына алаңдаушылық білдіріп отыр, деп хабарлайды TipRanks. Бұрыннан сайтқа Google арқылы келген қолданушылар саны азайып жатыр: қазір көп адам іздеген сұрағына ЖИ-дің жауабымен шектеліп, бастапқы дереккөздерге өтпейді. Reddit былтырғы жылдың төртінші тоқсанында трафиктің төмендегенін тіркеген. Биылғы алғашқы тоқсанда жағдай жақсарғанымен, компания бұл құбылыс қайта қайталануы мүмкін екенін ескертті.
Бұл Reddit үшін уақытша емес, тұрақты мәселеге айналды, деп есептейді Гаврелски. Google алдағы уақытта ЖИ-ді іздеу жүйесіне толық біріктіруі мүмкін. Осыған байланысты сарапшы Reddit-ке тіркелмеген қолданушылар саны одан әрі азаяды деп болжайды.
Гаврелскидің пікірінше, бұл қауіп тек Reddit-ке ғана емес, іздеу жүйелерінен келетін трафикке тәуелді барлық компанияларға қатысты.
Контекст
Reddit 2024 жылдың төртінші тоқсанында Google алгоритміндегі өзгерістерге байланысты пайдаланушылар санының өсуі уақытша баяулағанын хабарлаған еді. Алайда 2025 жылдың бірінші тоқсанында жағдай түзеліп, платформаның күнделікті бірегей белсенді қолданушылар саны (DAUq) былтырғы кезеңмен салыстырғанда 31% артты. Ал тіркелмеген пайдаланушылар саны 38% өсіп, 59,4 млн-ды құрады (бұл топқа Google секілді сыртқы көздерден келгендер жатады).
Дегенмен 1 мамырда инвесторлармен өткен қоңырау кезінде Reddit бас директоры Стив Хаффман алдағы уақытта Google-ден келетін трафик тұрақсыз болуы мүмкін екенін ескертті. Оның айтуынша, «іздеу экожүйесінде ауқымды өзгерістер болып жатыр», бірақ бұл уақытша құбылыстар компанияның ұзақ мерзімді стратегиясына әсер етпейді.
Ол онлайн-іздеу нарығына OpenAI-дың ChatGPT және Perplexity секілді ірі тілдік модельдердің (LLM) ықпал етіп жатқанын атады. Бұл платформалар интернеттен ақпаратты ЖИ арқылы жинап, пайдаланушыларға дайын жауап береді. Соның салдарынан қолданушылар бастапқы дереккөздерге өтпей, сайттарға трафик азаяды. Мұндай үрдіс Google-дің өзінде де байқалады: ол да жауапты бірден ұсынады, ал сілтемелер төменгі бөлікте ғана беріледі.
Reddit бұл өзгерістерге жауап ретінде өз ЖИ-сервисі — Reddit Answers-ті дамытып жатыр. Қазір бұл платформаның апталық бірегей белсенді қолданушыларының саны 1 млн.
Сарапшылар пікірі
Жыл басынан бері Reddit әлеуметтік желісінің нарықтық капитализациясы шамамен үштен біріне қысқарды. Marketscreener дерегінше, Reddit акцияларын 25 сарапшының 15-і сатып алуға кеңес береді (оның ішінде 10 — «Buy», бесеуі — «Overweight»). Қағаздарды портфельде ұстап тұруды (Hold) ұсынады — 9 , ал тек біреуі ғана оларды сатуға (Sell) шақырған.
Уолл-стриттегі консенсус-болжам бойынша әлеуметтік желі иесінің акцияларының әділ бағасы $156,8 шамасында. Бұл соңғы жабылу бағасынан 38,5% жоғары.
