«Жағдай нашарлағанда»: Apollo турбуленттілікке дайындалып, тәуекелді азайтып жаты
Apollo Global Management нарықта тұрақсыздық болуы мүмкін деп, тәуекелді азайту режиміне өтті және қолма-қол ақшаның үлесін көбейтіп жатыр. Әлемдегі ең ықпалды инвестициялық компаниялардың бірінің басшысы Марк Роуэн нарықтар қызып кеткен деп санайды және геосаяси әрі жүйелік қатерлердің күшейіп келе жатқанын ескертеді.
Егжей-тегжейлі
Әлемдегі альтернативті активтер саласындағы ең ірі инвестициялық компаниялардың бірі — Apollo Global Management — нарықтағы ықтимал турбуленттілікке дайындалып, қолма-қол ақшаны көбейтіп, қарыз жүктемесін азайтып және қарыз нарығының тәуекелі жоғары сегменттерінен шығып жатыр. Бұл туралы желтоқсан айының ортасында өткен Goldman Sachs конференциясына қатысқан адамдарға сілтеме жасап, Financial Times (FT) газеті хабарлайды.
FT дерегінше Apollo компаниясының басшысы әрі негізін қалаушылардың бірі Марк Роуэн бұл жоспарларымен инвесторлармен өткен жабық кездесулерде бөліскен. Газет атап өткендей, оның бұл пікірлері Роуэннің қарқынды өсіп жатқан қаржы нарықтарының көптеген сегменттері «қызып кеткені» туралы бұрыннан айтқан ашық ескертулерімен үндеседі.
Тұрақсыздықты күткен Apollo, атап айтқанда, сақтандыру бағытындағы еншілес компаниясы Athene-дегі өтімділік деңгейін арттырып, ондаған миллиард долларды АҚШ қазынашылық облигацияларына салды. Сонымен қатар компания инвестиция көлемін ұлғайту үшін қарыз қаражатын пайдаланатын левереджді кредиттердегі үлесін қысқартты. Бұдан бөлек, Athene құрылымдалған қарыз құралдарына (CLO) салған инвестицияларын шамамен екі есе азайтып, $20 млрд-қа дейін түсіріп жатыр. Бұл ақпаратты компания бұған дейін ашық түрде растаған.
Сонымен қатар, FT жазуынша, Apollo жасанды интеллекттің дамуына байланысты болуы мүмкін «технологиялық соққыларға» осал салалардағы тәуекелді де азайтып жатыр. Өткен аптада газет Apollo-ның ЖИ кең таралуы салдарынан қиындыққа тап болуы мүмкін деп есептелетін софтвер компанияларына берілген кредиттер портфелін жедел қысқартып жатқанын хабарлаған.
Сонымен бірге Apollo-ның бәсекелестері компанияның нарықтан толық кетіп жатқанын байқамай отырғандарын айтады, деп жазады FT. Мысал ретінде олар Apollo-ның Paramount компаниясының Warner Bros Discovery-ді $108 млрд-қа сатып алу өтінімін қаржыландыру үшін қарыз беруге дайын екенін келтіреді.
Бұл неге маңызды
FT атап өткендей, Apollo стратегиясындағы бұл өзгерістер бір жылдан бері жалғасып келеді және компанияның нарыққа ықпалы зор болғандықтан, инвесторлар бұл қадамдарды мұқият бақылап отыр. Атап айтқанда, Apollo бұрын Intel үшін стандарттан тыс қаржыландыру схемаларын және Илон Масктің xAI компаниясымен байланысты күрделі қарыз мәмілелерін қоса алғанда, ең қиын келісімдердің бірқатарына қатысқан.
Роуэннің пікірінше, қорғанысқа негізделген стратегия Apollo-ны кредит және акция нарықтарындағы күрделірек жағдайға дайындайды әрі кез келген күйзеліс кезінде капиталды тиімдірек инвестициялауға мүмкіндік береді, деп жазады FT. Оның айтуынша, «ең басты міндеті» — компанияның балансы барынша мықты болуы, сонда Apollo «бірдеңе жаман болған кезде» де тиімді жұмыс істеп, табыс таба алады. «Біз бағалар жоғары деп есептейміз, ұзақ мерзімді мөлшерлемелердің күрт төмендеуі екіталай және геосаяси тәуекелдер күшейді. Компания ретінде біз тәуекелді азайту режиміндеміз», — деген Роуэн бұл сөздерді жабық кездесулерде айтқан.
Apollo бұл тақырыпқа қатысты пікір беруден бас тартты.
Желтоқсан айының басында өткен ішкі жиналыста Apollo басшылығы да инвестициялауда қорғаныс тәсілін ұстанатынын атап өткенін FT жазады. Газет дерегінше сол кезде компания жетекшілерінің бірі: «Мұнда отырғандардың бәрі келесі құлдырауды немесе нарықтағы үлкен бір күйзелісті күткендей әсер бар», — деп айтқан.
Бұған дейін Роуэн сақтандыру нарығының кейбір сегменттерінде «жұқпалы тәуекел» бар екенін де ескерткен. Оның айтуынша жеке капитал бұл салада реттеуші бақылау әлсіз жағдайда тым жылдам өсті. Ол офшор аймақ — Кайман аралдарына активтерді көшірген жеке капиталға тиесілі сақтандыру компаниялары банкротқа ұшырауы мүмкін екенін айтқан. «Адамдар бизнесті ережелер мен капитал талаптары аз жерлерге — Кайман аралдарына көшіріп жатыр... Біз Кайманда үш банкроттықты көрдік. Әлі де болады. Алдағы 24 айда Кайман АҚШ үшін өміршең юрисдикция болып қалады деп сенбеймін», — деп Роуэн Goldman Sachs конференциясында бұл пікірін тағы да қайталағанын FT дереккөздері хабарлайды.
Apollo-ның бағалауынша сақтандыру саласында дефолттар тізбекті сипат алуы мүмкін. Себебі шетелге шығарылған активтерді бастапқыда америкалық сақтандыру компаниялары берген, ал соңында олар федералдық қорғанысы болмағандықтан, шығынды өздері жабуға мәжбүр болады, деп жазады Financial Times.
Контекст
Биыл Apollo өзгермелі пайыздық мөлшерлемесі бар қарыз құралдары бойынша хеджирлеу көлемін арттырды. Компания АҚШ Федералдық резерв жүйесі президент Дональд Трамптың қысымымен пайыздық мөлшерлемелерді одан әрі төмендете береді деп есептейді. FT-тың мәліметінше бұл қадамдар қысқа мерзімді мөлшерлемелер төмендеген жағдайда сақтандыру бағыты — Athene бөлімшесінің табысын қорғауға бағытталған. Қазір компанияда өзгермелі мөлшерлемемен алынған қарыз портфелі шамамен $50 млрд құрайды.
Сонымен қатар Apollo көлемі $23 млрд болатын Apollo Debt Solutions жеке кредит қорының басқарушысы. Бұл қорда бәсекелестермен салыстырғанда қарыз иінтірегі төмен. FT дереккөздерінің айтуынша, Apollo басшылығы мұны өздерінің сақ әрі консервативті тәсілінің белгісі деп санайды.
