«Жасырын інжу-маржан»: Уолл-стрит ұсынған алты өнеркәсіптік акция
Жасанды интеллекттің (AI) қарқынды дамуы мен инфрақұрылымға сұраныстың артуы өнеркәсіп секторын биылғы жылы S&P 500 индексінде көшбасшылардың біріне айналдырды — акциялар 15%-ға өсті, бұл көрсеткіш IT секторынан сәл ғана төмен. Осы жағдайға байланысты Barron’s соңғы айда сарапшылар рейтингін бір немесе бірнеше рет көтерген көлік, логистика, инжиниринг және өндіріс саласындағы алты компанияны іріктеді. Басылым олардың барлығы бірдей жақсы динамика көрсетпегенін және Уолл-стритте кеңінен танымал еместігін мойындайды, алайда терең талдау жүргізуге дайын инвесторлар үшін олардың арасында «жасырын інжу-маржандар» болуы мүмкін.
Тізімге енгендер
— Лифт өндіруші Otis.
Соңғы айда компания екі жағымды баға алды: JPMorgan рейтингін Neutral-ден Overweight-ке көтеріп, инвесторларға сатып алуды ұсынды, ал Wolfe Research бағасын Underperform-нан Peer perform-ға өзгертті. JPMorgan сарапшыларының пікірінше компания үшін ең қиын кезең артта қалуы мүмкін және Дональд Трамп енгізген тарифтерден кейінгі құлдыраудан соң акциялар раллиге дайын. Жыл басынан бері Otis акциялары шамамен 5%-ға арзандады, ал 2026 жылға арналған баға/табыс коэффициенті 19,7-ні құрап отыр — бұл S&P 500 орташа көрсеткішінен (21,4) және компанияның тарихи деңгейінен (шамамен 22) төмен.
— Теміржол компаниясы CSX.
Соңғы айда ол да екі оң баға алды. Deutsche Bank және TD Cowen рейтингін «ұстап тұрудан» «сатып алуға» өзгертті. Бұған АҚШ-тың екі ірі теміржол операторы — Union Pacific пен Norfolk Southern-ның бірігу жоспары себеп болды. Егер мәмілені реттеушілер мақұлдаса, теміржол саласында ірі келісімдерге жол ашылып, CSX те бірігу немесе сатып алу нысанына айналуы мүмкін. Жыл басынан бері CSX нарықтық құны 11%-ға өсті, бұл S&P 500 индексінен 1,5 пайыздық тармаққа артық.
— Жүк көліктерін өндіруші Paccar.
2025 жылы түсімі шамамен $27 млрд болады деп күтілуде (өткен жылғы $32 млрд-тан төмен), бірақ 2026 жылы $29 млрд-қа қайта көтеріледі деген болжам бар. Vertical Research Partners және Argus сарапшылары соңғы уақытта Paccar рейтингін «ұстап тұрудан» «сатып алуға» көтерді. Олардың айтуынша жыл басынан бергі 5%-дық құлдырау компания сатылым циклінің «төменгі шегіне» толық сәйкес келеді және сатып алу мүмкіндігін береді.
— Инжиниринг компаниясы Jacobs Solutions.
KeyBanc сарапшысы Сангита Джайн компания акцияларының бағасын Hold-тан Overweight-ке көтерді. Оның айтуынша 2024 жылдың соңында мемлекеттік қызмет бөлімшесін бөліп шығару және қайта құрылымдау Jacobs бизнесін инвесторлар үшін тартымды еткен. 2024 жылдың басынан бері акциялары 13,5%-ға қымбаттады.
— Логистикалық компания Old Dominion Freight Line.
Іскерлік белсенділіктің төмендеуі көптеген логистикалық операторлардың акцияларына кері әсер етті. Тасымал көлемінің қысқаруы баға мен табыстылықты төмендетті. Жыл басынан бері Old Dominion акциялары 15%-дан астам жоғалтты. Дегенмен Vertical Research Partners сарапшысы Джеффри Кауффман бұл құлдырауды кіріс нүктесі ретінде бағалап, рейтингін «ұстап тұрудан» «сатып алуға» көтерді.
— Өнеркәсіптік дистрибьютор Fastenal.
Baird сарапшысы Дэйв Мантхи де Fastenal акцияларының бағасын «ұстап тұрудан» «сатып алуға» көтерді. Оның айтуынша тарихи тұрғыда дистрибьютор акцияларын сатып алуға ең қолайлы уақыт — іскерлік белсенділік индексі (PMI) 50-ден төмен түскен кез. Шілдеде индекс 49-дан 48-ге төмендеді. Жыл басынан бері Fastenal акциялары 30%-дан астамға қымбаттады, ал Baird-тің мақсатты бағасы — акциясына $55, бұл 12 тамыздағы жабылу бағасынан тағы 13,5%-ға өсу мүмкіндігін білдіреді.
