Зеленский: Украина бойынша бейбітшілік жоспары 90% келісілді
АҚШ пен Украина президенттері Ресеймен бейбіт реттеу жөніндегі құжаттағы қалған 10%-ды келісу үшін келіссөз өткізеді. Бұл туралы Владимир Зеленскийдің мәлімдемесіне сүйене отырып Strana.ua басылымы хабарлады. Bloomberg дерегінше, кездесу 28 желтоқсанда өтуі мүмкін. Украина басшысы талқыланатын негізгі тақырыптардың қатарында қауіпсіздік кепілдіктері, аумақ мәселелері және соғыстан кейінгі қалпына келтіру мәселелерін атады. Оның айтуынша, 20 тармақтан тұратын бейбіт жоспардың 90%-ы делегациялар деңгейінде әлдеқашан мақұлданған. Зеленский Telegram-арнасында: «Жаңа жылға дейін көп нәрсе шешілуі мүмкін», – деп жазды.
Егжей-тегжейі
Axios басылымы аты-жөні аталмаған америкалық және украиналық шенеуніктерге сілтеме жасап, Киевтің Вашингтон мен Брюссельден алатын қауіпсіздік кепілдіктері бойынша келісім жасалғанын хабарлады. Басылым дереккөздерінің бірі бұл құжаттың НАТО Жарғысының 5-бабына (ұжымдық қауіпсіздік қағидаты) негізделгенін және АҚШ оны Сенатта ратификациялауға жіберуге дайын екенін растаған.
Axios-пен әңгімесінде АҚШ-тың жоғары лауазымды шенеунігі Мәскеумен келіссөздерді «оң және конструктивті» деп сипаттаған. Оның сөзінше: «Біз ресейліктермен және украиндармен барынша жұмыс істедік. Соңғы екі аптада өткен жыл бойына қарағанда көбірек прогреске қол жеткіздік», – деп келтіреді басылым.
АҚШ пен Украина президенттерінің кездесуі Флоридадағы Дональд Трамптың Мар-а-Лаго резиденциясында өтуі ықтимал. Ақ үй Зеленскиймен ықтимал келіссөздерге қатысты әзірге пікір білдірген жоқ.
Мұнай нарығы қалай әсер етті?
Brent маркалы мұнай бағасы жұма күні, 26 желтоқсанда, шамамен 1% арзандап, баррелі $61,65 деңгейіне түсті. Солтүстік америкалық WTI бағасы 0,8% төмендеп, баррелі $57,9 болды.
CNBC мәліметінше, мұнай бағасы 2020 жылдан бергі ең қатты жылдық төмендеу бағытында келеді: ОПЕК+ елдері де, картельге кірмейтін мемлекеттер де өндіру көлемін арттырғандықтан, келесі жылы нарықта ұсыныстың артық болуы мүмкін деген алаңдаушылық күшейген. Телеарна инвесторлар Ресей мен Украина арасындағы бейбіт үдерістің дамуын да мұқият бақылап отырғанын атап өтеді, өйткені келісім жасалса, бұл Ресейдің мұнай секторына қатысты халықаралық санкциялардың жеңілдеуіне немесе алынуына алып келуі ықтимал.
