«ЖИ көпіршігі басылып жатыр...»: АҚШ-тың негізгі индекстері жұма күні күрт төмендеді
АҚШ акциялары жұма күні, 12 желтоқсанда, ЖИ-мен байланысты қағаздардың жаппай сатылуы жалғасқандықтан күрт арзандады. Сектордың құлдырауына негізгі түрткі болғандар — ЖИ саласындағы бумның өзіндік көрсеткішіне айналған Oracle және Nvidia-мен бәсекелес чип өндіруші Broadcom. Broadcom-ның тапсырыс көлемі кей инвесторлар күткеннен нашар шықты. Екі компанияның болашағына күмән технолог алпауыттардың бағасына қатысты алаңдаушылықты қайта күшейтті.
Егжей-тегжейі
— Кең нарықты қамтитын S&P 500 индексі 12 желтоқсанда бір күн бұрын тарихи максимумды жаңартқаннан кейін 1,1%-ға түсті. Апта қорытындысында индекс 0,6% жоғалтты.
— Технологиялық сектордың Nasdaq Composite индексі 1,7%-ға құлап, қатарынан екінші күн ең әлсіз индекс болды. Broadcom, AMD, Palantir, Micron, сондай-ақ Alphabet, Nvidia және Oracle бағамдарының төмендеуі жекелеген қағаздардың өсуінен келген позитивті басып кетті. Апта қорытындысында Nasdaq Composite 1,6% жоғалтты.
— «Көгілдір фишкалар» индексі Dow Jones Industrial Average жұма күні 0,5%-ға төмендеді. Оған қаржы, өнеркәсіп және медицина секторындағы компаниялар акцияларына қызығушылық қолдау көрсетті. Олардың ішінде Visa, UnitedHealth және Nike бар. Бұл ЖИ қағаздарынан капиталдың ауысуымен байланысты. Dow осы аптада плюста қалды — шамамен 1,1%.
— Шағын капитализациялы компаниялар индексі Russell 2000 1,5%-ға төмендеді. Жұмадағы құлдырауға қарамастан, апта қорытындысында 1,2% қосып, нарықты басып озды.
Акцияларға не әсер етті?
Bloomberg есептеуінше, S&P 500 мен Nasdaq Composite индекстеріне Broadcom акцияларының төмендеуі қысым жасады: тоқсандық есеп жарияланғаннан кейін олар 11%-дан аса арзандап, қаңтардан бергі ең нашар бір күндік құлдырауды көрсетті. Компанияның нәтижелері мен болжамы жақсы болғанымен, инвесторлар тапсырыс портфелінің көлемінен көңілі қалды, деп жазды агенттік. CNBC түсіндіруінше, кей аналитиктер сатылымды Broadcom маржасының қысқаруы мүмкін деген қауіппен байланыстырды.
Сонымен қатар бұлтты қызмет жеткізуші Oracle акциялары да жұма күні арзандады. Оның екіұшты есебінен кейін болған құлдырау бейсенбі күні ЖИ секторынан капиталдың ауысуына себеп болған еді. Нарық Bloomberg дереккөздерінің Oracle OpenAI үшін дата-орталықтар құрылысын бұрын жоспарланған 2027 жылдың орнына 2028 жылы аяқтауды көздеп отыр деген хабарына реакция берді. Осы жарияланымнан кейін Oracle акциялары 6,5%-ға түсіп, компанияны мұны жоққа шығаратын мәлімдеме жасауға мәжбүр етті. Баға төмендеуі баяулап, сессия 4,5% минуспен аяқталды.
Осылайша, жұмадағы сауда бейсенбі күнгі үрдісті жалғастырды: CNBC жазуынша, инвесторлар АҚШ ФРЖ мөлшерлемені түсіргеннен кейін экономика жағдайына көбірек тәуелді циклдік акцияларға белсенді ауысып, бір мезетте ЖИ қағаздарындағы пайданы бекітті.
Аналитиктер не дейді?
— «Бұл күні құнды акциялар өсім акцияларын басып озды», — деді CNBC-ке Argent Capital Management портфель менеджері Джед Эллербрук. Оның айтуынша, ЖИ туралы сөз болғанда инвесторлар анық қобалжиды: «Олар ашық түрде пессимист емес, бірақ меніңше, сақ, ширығып отыр және шешім қабылдауда екіұдай күйде».
— Navellier & Associates компаниясының бас инвестициялық директоры Луис Навелье бейсенбі күні S&P 500 мен Dow Jones максимумды жаңартқаннан кейін жұмадағы пайданы бекіту күтпеген жағдай емес дейді. Bloomberg оның «ЖИ айналасындағы көпіршік басылып жатыр, бірақ жарылған жоқ» деген сөзін келтіреді. Оның ойынша, OpenAI келісімдерімен байланысты алаң күшеюі нарықтың әрі қарай өсуін қиындатуы мүмкін.
— Charles Schwab компаниясының сауда операцияларының жетекшісі әрі деривативтер стратегi Джо Маццола агенттікке Уолл-стритте «соңғы қызу қарқыннан кейін» кідіріс болуы мүмкін екенін ескерткен. Оның айтуынша, ірі есептер мен макродеректер аз, алда демалыс, әрі инвесторлар сейсенбіде шығатын еңбек нарығы есебіне көбірек көз тігіп отыр.
— «Күнтізбеде жағымсыз түрткілер болмаса, көпшілік рождестволық раллиге үміт артады», — деді Париждегі Ecofi Investissements қорының басқарушысы Карен Жорж. Оның сөзінше, инвесторлар жыл бойы артта қалған қағаздарға жиі қарай бастады: «Бұл портфельді әртараптандыруға жақсы уақыт», — деп атап өтті ол.
