ЖИ софт өндірушілерін жұтып жатыр: трейдерлер акцияларын құлатты
Бағдарламалық жасақтама (БЖ) әзірлеушілердің акциялары израильдік Monday.com компаниясының депозитарлық қолхаттарының күрт төмендеуінен кейін құлдырады. Бұл компания бұлтты БЖ-мен айналысады. Оның тоқсандық нәтижелері Уолл-стрит консенсусынан асып түскенмен, трейдерлердің тым жоғары күткенін ақтамады. Соның салдарынан SAP және Sage Group сияқты өзге де БЖ өндірушілерінің бағамдары қысымның астында қалды. Сала биылдың өзінде техсектордағы ең нашар динамиканы көрсетіп отыр. Талдаушылар мұндай компаниялардың акциялары жасанды интеллекттің (ЖИ) нарықтағы үлесіне қауіп төндіруіне байланысты әлі де құлдырауы мүмкін екенін ескертеді.
Егжей-тегжейлі
12 тамыздағы Мюнхен саудасында Monday.com депозитарлық қолхаттары 32%-дан астамға арзандады. Нью-Йоркте дүйсенбі күні олар 30%-дан артық төмендеді. Компанияның тоқсандық нәтижелері көңіл көншітпеді. Көрсеткіштер консенсустан жоғары болғанымен, трейдерлер күткен деңгейге жетпеді. Бұған қоса, компания қазіргі тоқсанға қатысты Уолл-стрит бағаларынан сәл төмен, сақтықпен жасалған болжам ұсынды, деп хабарлады Barron’s.
Бұл бүкіл сектор бойынша бағамдардың одан әрі төмендеуіне түрткі болды. Мысалы, Еуропадағы нарықтық капитализациясы ең ірі SAP акциялары 12 тамызда Франкфуртта 7%-ға арзандап, шамамен €22 млрд капитализациясын жоғалтты, деп жазады Bloomberg. Ұлыбританиялық Sage Group пен француздық Dassault Systemes акциялары тиісінше 4,7% және 1,2%-ға түсті.
Жалпы алғанда, БЖ секторы биыл технологиялық акциялардың арасында ең нашар нәтижелердің бірін көрсетіп отыр. Мәселен, Salesforce акциялары жыл басынан бері 30%-дан астам, ал Adobe 24%-ға арзандады. Bloomberg қадағалайтын софт өндірушілердің индексі чипмейкерлер индексіне қарағанда қаңтардағы минимумға жақын саудалануда.
Нарық неден қауіптеніп отыр
Bloomberg жазғандай, кей сарапшылар БЖ өндірушілер акцияларының құлдырауын Monday.com нәтижелерінің кейбір бағалаулардан төмен болуымен ғана емес, трейдерлердің ЖИ тарапынан ұзақ мерзімді бәсеке қаупіне алаңдауымен байланыстырады. Егер ЖИ құралдары қосымшаларды әлдеқайда жылдам әрі арзан жасай алса, дәстүрлі софт компаниялар қысымға түсуі ықтимал. Тамыздың басында OpenAI бас директоры Сэм Альтман индустрия «өте жақын арада» «жылдам сән дәуіріне» енуі мүмкін екенін ескертті — мұнда ЖИ өнімдерді жылдам әрі ең төмен шығынмен өндіруге мүмкіндік береді.
Jefferies талдаушысы Брент Тилл CNBC арнасына берген сұхбатында инвесторлар ЖИ софт өндірушілерін «жұтып қойып», олардың бағалау мультипликаторларын құлатады деп қауіптенетінін айтты. Оның пікірінше бұл қорқыныш тым асыра айтылған, бірақ қазіргі нарықта инвесторлар бұл секторға немқұрайлы қарап отыр.
Melius Research талдаушысы Бен Рейтзес те «дүние ЖИ бағдарламалық жасақтаманы жұтып жатқанының шындығын түсіне бастады» деген пікірде. Оның айтуынша ЖИ дамыған сайын БЖ әзірлеушілер өз бәсекелестеріне — автономды агенттерге арналған инфрақұрылым жасайтындарға — жол беруі мүмкін. Зиян шегуі ықтималдар қатарында SaaS (қызмет ретінде БЖ) ойыншылары: Adobe, Salesforce, Workday.
Инвесторлар не істеуі керек
RBC талдаушысы Мэттью Хедберг Bloomberg-ке берген түсініктемесінде «ЖИ әсерінен софттың өлімі» жайлы нарративке байланысты софт өндірушілердің бағалаулары қысымда қалып отырғанын, бұл жақын мерзімде құбылмалылықтың сақталуына әкелетінін айтты.
Melius Research-тен Рейтзес те БЖ компанияларының акциялары әлі де құлдырау қаупінде деп санайды. Ол тіпті Adobe рейтингін төмендетіп, бұл қағаздарды сатуды ұсынды.
Дегенмен кейбір аналитиктер Monday.com акцияларының құлдырауын сатып алу мүмкіндігі деп бағалап отыр. Мысалы, Morgan Stanley сарапшысы Джош Баер сейсенбі күні израильдік компанияның рейтингін Equal Weight (нарықпен тең) деңгейінен Overweight (нарықтан жоғары) деңгейіне көтерді, деп хабарлады Bloomberg. Баердің айтуынша акциялардың арзандауы ЖИ-дің іздеу жарнамасы мен performance-маркетинг бизнесіне төндіруі мүмкін барлық тәуекелдерді «толық ескеріп қойған».
