2024 жылы Nvidia-ны сатқан инвестор Big Tech-ке қайта оралды, не себепті?
Миллиардер Стэнли Дракенмиллер үшінші тоқсанда ірі технологиялық компанияларға инвестиция көлемін айтарлықтай ұлғайтты. Атап айтқанда, ол Amazon, Alphabet және Meta акцияларындағы үлесін көбейтті, сондай-ақ жақында биржаға шыққан стейблкоин эмитенті Figure Technology компаниясына жаңа ставка жасады.
Дракенмиллер Nvidia акцияларымен жасаған ерте мәмілелерімен танымал. Ол чип өндіруші компанияның қағаздарын алғаш рет 2016 жылы сатып алған, ал 2022 жылы жасанды интеллект төңкерісін күтумен ірі позиция ашты. 2024 жылдың үшінші тоқсанында акциялардың серпінді өсімінен кейін инвестор Nvidia-дан толық шығып, бұл шешімді кейін «үлкен қателік» деп атады. Алайда жасанды интеллект индустриясынан ол толық кеткен жоқ. Оның портфелінде Taiwan Semiconductor Manufacturing мен Microsoft қағаздары сақталған.
Big Tech-тегі ұстанымдары
Үшінші тоқсанда Дракенмиллердің активтерін басқаратын Duquesne Family Office «Керемет жетіліктің» үш компаниясында жаңа позициялар ашты. Қор Amazon-ның 437 мың акциясын, Meta Platforms-тың 76,1 мың акциясын және Alphabet-тің 102,2 мың акциясын сатып алып, осы үш компанияға жалпы $176 млн инвестиция салды. Бұл компаниялар бұған дейін де түрлі жылдары Дракенмиллер портфеліне кірген: мысалы, 2014 жылдан бері ол Meta Platforms қағаздарымен 37 рет мәміле жасаған — 16 рет сатып алып, 21 рет сатқан.
Дракенмиллер «оппортунистік ротация» тактикасын қолданады: сұранысқа, нарық фазасына және ықтимал қызып кетуге қарай Big Tech-тен кіріп-шығып отырады. Гиперскейлер компаниялардың акцияларын 2025 жылдың үшінші тоқсанында сатып алуы инвестордың жасанды интеллектке байланысты инфрақұрылым сұранысының өсе беретініне сенетінін білдіреді, деп жазады CMC Markets.
Жаңа буын финтехіне ставка
Үшінші тоқсандағы ең елеулі сатып алу — Figure Technology компаниясы болды: Duquesne бұл компанияның 2,1 млн-нан астам акциясын шамамен $77 млн-ға сатып алды. Енді бұл позиция оның портфелінің 1,9%-ын құрайды.
Figure Technology тұтынушылық кредиттерге маманданады және бұл салада автоматтандыруды, алгоритмдерді және блокчейн технологияларын қолданады. Компанияның бизнесі тұрғын үй кепілдігімен берілетін кредиттер мен басқа да тұтынушылық займдарды өңдеуге негізделген, мұның бәрі өзінің цифрлық платформалары арқылы жүзеге асады. Кейбір мәмілелер банк пен кредиторларды қарыз алушылармен байланыстыратын, өтінімдерді автоматты түрде бөлетін Figure Connect платформасы арқылы өтеді. Компания қыркүйекте Nasdaq-қа шықты. Бұған қоса, Figure активтердің токенизациясын дамытып, қазынашылық облигациялармен қамтамасыз етілген YLDS стейблкоинін іске қосты және AAA рейтингті блокчейнде секьюритизация жасады.
Үшінші тоқсан қорытындысы бойынша компанияның табысы жылдық өлшемде 55%-ға өсіп, $156,4 млн-ға жетті, ал пайда 220%-ға ұлғайып, $89,8 млн болды. EBITDA маржасы бір жылда 44,9%-дан 55,4%-ға дейін көтерілді. Берілген кредиттердің жалпы көлемі 70%-ға өсіп, $2,5 млрд-қа жетті, оның 46%-ы Figure Connect арқылы өтті. Дракенмиллердің позициясы жария болғаннан кейін, 17 қарашадағы сауда қорытындысы бойынша Figure акциялары шамамен 5%-ға қымбаттады. Piper Sandler және Mizuho аналитиктері компанияның мақсатты бағаларын тиісінше $50-ден $55-ке және $47-ден $56-ға көтеріп, 12 ай ішінде 30% өсу әлеуетін болжайды.
Дракенмиллер портфеліндегі басқа өзгерістер
Duquesne Израильдің ірі дженерик өндірушілерінің бірі — Teva Pharmaceutical Industries компаниясындағы үлесін 3,9%-ға арттырды. Компанияның фэмили-офис портфеліндегі үлесі 8,5%-ға жетті. Teva-мен қатар, қордың ірі позициялары арасында жоғары дәлдіктегі генетикалық тест әзірлеуші Natera және сирек ауруларды емдеуге маманданған биофармацевтикалық компания Insmed бар. Бұл үш эмитент Duquesne портфелінің 30% астамын құрайды.
Bank of America-дегі позиция шамамен үш есеге (+189%) өсті — бұл АҚШ-тағы активтер көлемі бойынша екінші банк, оның қызметі классикалық бөлшек банкингті инвестициялық және басқарушылық шешімдермен біріктіреді. Үшінші тоқсан соңында Дракенмиллер портфелінде банктың 989 мың акциясы болды.
Duquesne дамушы нарықтарға да ставка жасап, $101 млн-нан астам қаржыны iShares MSCI Emerging Markets (EEM) ETF-іне салды. Бұл позиция қордың алғашқы он ірі активінің қатарына енді. Жыл басынан бері EEM қағаздары шамамен 30% өсті.
Энергетика секторында Дракенмиллер АҚШ-тың ірі газ өндірушілерінің бірі EQT компаниясындағы үлесті 28,6%-ға азайтып, 895 мың акцияға дейін түсірді. Сонымен қатар, дәстүрлі және жаңартылатын генерацияға арналған технологиялар мен жабдықтар жеткізетін GE Vernova компаниясында жаңа позиция ашты — 77 мың акция, құны $47,5 млн.
Қор кейбір компаниялардың қағаздарын толығымен сатты. Duquesne Microsoft және диабет пен онкологияны емдеуге бағытталған әзірлемелерімен танымал Eli Lilly компанияларынан толық шығып кетті. Сондай-ақ, темекі өндіруші Philip Morris International және жартылай өткізгіштерге арналған материалдар мен жабдық өндірушілері Entegris пен Coherent позициялары да жабылды.
