2026 жылы люкс нарығынан раллидің жалғасы күтіледі. Қай компанияларға сенеміз?
Еуропаның люкс секторындағы оптимизм күшейіп барады: сарапшылардың көбі 2025 жылдың екінші жартысында басталған ралли 2026 жылы да жалғасуы мүмкін деп есептейді. Нарықтың қалпына келуіне люкс өндірушілерінің мықты тоқсандық есептері, Қытайдағы сұраныстың жандана бастауы және сән үйлеріндегі креативтік командалардың жаңаруы дәлел болуда. LVMH пен Richemont сияқты негізгі ойыншылар екі жылдық құлдыраудан кейін қайта өсім белгілерін көрсете бастады.
Егжей-тегжейлі
Сарапшылар арасында Еуропаның люкс тауарлар секторындағы ралли алдағы жыл да жалғасады деген оптимизм күшейіп барады. Өйткені сектордың перспективасы жақсарғанын көрсететін сигналдар көп, деп жазды Bloomberg. Компаниялардың үшінші тоқсандағы мықты нәтижелері, Қытайдағы сұраныстың қалпына келуі және жетекші сән үйлеріне жаңа креативтік директорлардың келуі сарапшылардың пандемиядан кейінгі тоқыраудың аяқталуына деген сенімін нығайтты. Осы факторлар соңғы аптада көптеген сарапшының болжамдарын жақсартуына себеп болды, деп жазды агенттік.
«Біз 2026 жылына ең қиын кезең артта қалды деген үмітпен қадам басамыз. Қалпына келу әлі ерте сатыда болғанымен, Қытайдағы сұраныстың жандануы және индустриядағы креатив деңгейінің өсуі — сатып алушыларды дүкендерге қайта тартатын факторлар», — деді UBS Group AG сарапшысы Зузанна Пуш. Оның айтуынша, люкс өндірушілерінің органикалық сатылымы келесі жылы қайта өсімге шығып, шамамен 5% артуы мүмкін. Люкс тауарларының жиынтық табысының төрттен бірінен астамын қамтамасыз ететін қытайлық тұтынушылар шығыны 2026 жылы шамамен 6% өседі деп күтіледі. Бұл — 2025 жылғы 5%-дық төмендеуден кейінгі қайта серпілу.
JPMorgan Chase сарапшысы Чиара Баттистини де екі жылдан бері алғаш рет люкс сегментіндегі сатылым өседі деп күтеді. HSBC сарапшылары Эрван Рамбург пен Анн-Лор Бисмут та индустрияның «толыққанды өсуге қайта оралуын» болжайды.
Oddo BHF стратегиясы Томас Зловодзки осы аптада Еуропаның тұтынушылық секторындағы компанияларға берген рейтингін underweight деңгейінен (яғни қағаздарды сату жөніндегі ұсынымнан) neutral деңгейіне көтерді. Ол мұны люкс сегментінің перспективаларына қатысты оң көзқарасымен түсіндірді.
Сектордың көшбасшысы кім болмақ?
Жоғары нәтижелер көрсетуі мүмкін компаниялардың ішінде сарапшылар Cartier және Van Cleef & Arpels брендтерінің иесі швейцариялық Richemont тобын ерекше атап өтеді. UBS, JPMorgan, HSBC және Deutsche Bank бұл компанияны өздерінің үздік таңдауы деп атады. Олардың бағалауынша, Richemont құлдырауды бәсекелестерінің басым бөлігінен жақсы өткерді. Соңғы тоқсанда оның қағазы қос таңбалы өсім көрсетіп, Еуропаның люкс алпауыттары арасында үздік нәтиже көрсетті — тіпті Gucci мен Balenciaga иесі Kering-ті және қалпына келуін инвесторлар жіті қадағалап отырған Burberry-ді де басып озды.
«Біздің бағалауымызша, LVMH, Richemont, Hermès және Prada Қытайдың люкс нарығында табыс пен пайданы арттыруда көшбасшы болады және оларды 2026 жылы 4–6% өсіреді. Екі жылдық құлдыраудан кейін тоқсандық динамика жақсарып келеді. Ал Moncler мен Tapestry ең тұрақты компаниялар ретінде көрінеді — бұл қалпына келтіру драйверлерінің кеңейіп жатқанын және келесі жылы сектордың сенімді өсіміне негіз қаланып жатқанын көрсетеді», — деп жазды Bloomberg Intelligence сарапшылары Дебора Эйткен және Андреа Фердинандо Леджери.
Сектордың басты оптимизмі — LVMH флагманы қайта өседі деген үміт. Люкс-гиганттың қағазы биыл шамамен 2% минуста тұр, бірақ соңғы үш айда 25% қымбаттады. Компания үшінші тоқсанда күтпеген жерден өсімге қайта шықты, оның ішінде Қытай нарығында да — дәл сол кезде Шанхайда кеме пішініндегі ауқымды Louis Vuitton бутигі ашылып, үлкен қызығушылық тудырды.
«Жазда [LVMH] қағазы компания ешқашан қалпына келмейтіндей өте төмен мультипликатормен сатылды — мен оны абсурд деп санадым. LVMH-та әлі де бәрі керемет емес, бірақ олар не істеу керегін біледі және оны орындауға қажетті дағдылары толығымен бар», — деді швейцариялық инвестициялық фирма GAM сарапшысы Флавио Череда. Ол маусым айында өз портфеліндегі люкс компаниясының үлесін екі есе арттырған.
Акция ахуалы
Goldman Sachs жасаған еуропалық люкс компаниялар корзинасы алғашқы жартыжылдықта Трамптың ықтимал тарифтері мен Қытайдағы сұраныстың баяулауына байланысты 9% төмендеді, бірақ кейін 12% қайта өсті, деп жазады Bloomberg.
Мұнымен бірге, оң күтулердің едәуір бөлігі қазірдің өзінде бағаларға енгізілген, сондықтан инвесторлардың қызығушылығын сақтау үшін компаниялар бұл үмітті нақты нәтижелермен растауы тиіс, деп ескертті агенттік. Сектордың мультипликаторы — бағасының болжамды пайдаға қатынасын көрсететін көрсеткіш қайтадан 30 деңгейіне жақындады. Бұл — соңғы төрт жылдағы максимум. Тарихи шекті мәннен төмен болғанымен, бұл коэффициент жалпы нарықтағы деңгейден шамамен екі есе жоғары, деп атап өтті Bloomberg.
