Small-cap — үлкен мүмкіндіктер: Қаржылық күйзеліс кезінде кім ұтады
Кішігірім капитализациясы бар сапалы компаниялар ірі компанияларға қарағанда жылдамырақ өседі, деп есептейді Noble Capital Markets брокерлік компаниясы. Мұндай жағдайлар, әдетте, қарызды өтеуге кететін шығындар артқан фискалдық күйзеліс кезеңінде байқалады, дейді сарапшылар.
Егжей-тегжейлі
Noble талдауына сәйкес шағын капитализациялы компаниялар технологиялық алпауыттарды да басып оза алады. Бұл – инвесторлардың мемлекеттік те, корпоративтік те қарыздың тұрақтылығына деген сенімі азайып келе жатқанда мүмкін. Тарихи деректер көрсеткендей, фискалдық күйзеліс пен ұзақ мерзімді облигацияларға арналған табыс сыйақысы өскен кезде small-cap акцияларының өсу қарқыны ірі компанияларға қарағанда 22-70 пайыздық тармаққа жоғары болған.
Ірі компаниялар (large-cap) ұзақ уақыт бойы арзан қарыздармен жұмыс істеді, алайда қазір олар қарыздарын жоғары пайыздық мөлшерлемемен қайта қаржыландырып, соның салдарынан шығындары арта түсті, деп түсіндіреді Noble. Сонымен қатар, олар АҚШ долларының әлсіреуінен туындайтын валюта ауытқуларының әсеріне де ұшырауы мүмкін – бұл сауда соғысы тереңдеп, өзара импорттық баж салығы ұлғайса орын алуы ықтимал. Ал шағын компаниялардың шамамен 80% кірісі АҚШ ішінде қалыптасады, сондықтан олар үшін валюта тәуекелі аса маңызды емес.
Сарапшылар қазіргі жағдай инвесторларға жаңа инвестициялық мүмкіндіктер береді, бірақ бұл инвестиция құю тәсілін өзгертуді талап етеді деп санайды. Соңғы онжылдықта нарық қатысушылары пассивті инвестицияларға – яғни индекстерге қаражат салуға – үйреніп қалған. Бірақ қазір экономикалық өсімнің баяулауы мен жоғары пайыздық мөлшерлемелер бұл стратегияның тиімділігін азайтып отыр. Ал ерекше артықшылықтары бар жеке компанияларға инвестиция салу әлдеқайда жоғары табыс әкелуі мүмкін, дейді Noble.
Өсім қашан басталады
Соңғы бес жылда S&P 500 индексі – АҚШ-тың ең ірі компанияларын қамтитын индекс – 100%-дан астамға өсті. Осы кезеңде S&P 600 индексі – шағын және орта капитализациялы компанияларды қамтитын – 63%-ға ғана көтерілді. Ал Russell 2000 индексі тіпті одан да аз – небәрі 60%-ға жете алмай отыр.
«Инвесторлар Вашингтонның тұрақсыз саясатына қарап қобалжуда. (…) Көбісі қазір нарықтан уақытша алыстай тұру дұрыс деп шешті», – дейді Hodges Capital Management компаниясының негізін қалаушы Крейг Ходжес. Оның ойынша, инвесторлардың көзқарасы өзгерсе, small-cap акциялары «айтарлықтай күрт өсуі» мүмкін.
Алайда Apollo компаниясының бас экономисі Торстен Слек басқа ойда. Ол стагфляция – яғни баяу экономикалық өсім мен жоғары мөлшерлемелер кезеңінде – өсімге бағытталған акциялардан (яғни әлеуеті бар, бірақ кірісі аз компаниялардан) аулақ болу керек дейді. Оның орнына табысты компанияларға инвестиция салу қажет. Себебі Russell 2000 құрамындағы компаниялардың 40%-дан астамы – шығынды. Шағын капитализациялы компаниялар инфляция ұзаққа созылса, ірі компанияларға қарағанда көбірек зардап шегеді, дейді ол. Осы себепті дәл қазір small-cap акцияларына қатысты «қысқа позициялар» – яғни олардың құлдырауына бәс тігулер – соңғы бірнеше жылдағы ең жоғары деңгейде тұр.
Сонымен қатар Bloomberg жасаған консенсус-болжамға сәйкес, 2025 жылдың екінші жартысында шағын компаниялардың акцияларына есептелген кірістің өсуі ірі компаниялардың акцияларынан асып түспек – мұндай жағдай 2022 жылдың соңынан бері алғаш рет қайталанбақ, деп жазады Barron’s.
