Uber Түркиядағы тамақ жеткізу қызметін бақылауға алғысы келеді
Uber инвесторларды одан әрі өсу мүмкіндігіне ие екеніне сендіруге тырысып жатыр.
Америкадағы такси шақыру және тамақ жеткізу қызметі Uber түрік қызметі Trendyol Go компаниясының 85% акциясын Alibaba-ның бақылауындағы компаниядан сатып алу жөнінде келісім жасасты. Trendyol Go Түркия бойынша 90 мыңнан астам мейрамхана мен дүкеннен тамақ пен өнімдер жеткізеді. Бұл мәміле Uber-ге АҚШ-тағы негізгі бизнесі орныққандықтан жаңа нарыққа шығуға көмектеседі, деп хабарлайды Reuters.
Егжей-тегжейі
Uber Technologies АҚШ-тың Құнды қағаздар және биржалар жөніндегі комиссиясына (SEC) Trendyol Go түрік тамақ жеткізу қызметінің 85% акциясын 700 миллион долларға сатып алу туралы келісім жасағанын хабарлады. Мәміле қолма-қол ақшамен жүзеге асырылады және қарыздық міндеттемелер жоқ. Мәміленің аяқталуы 2025 жылдың екінші жартысында реттеуші органдардың мақұлдауынан кейін күтілуде.
Trendyol Go Trendyol Group құрамына кіреді. Бұл Түркиядағы ең ірі электронды коммерция ойыншылардың бірі және қытайлық Alibaba Group-тың бақылауында. Uber берген мәліметтерге сәйкес, 2024 жылы қызмет 200 миллионнан астам тапсырыс орындап, брондау көлемі 2 миллиард долларға жеткен. Бұл 2023 жылмен салыстырғанда 50%-дан астам өсу көрсеткішіне ие. Платформа Түркияның бүкіл аумағында қызмет көрсетіп, 90 мыңнан астам мейрамхана мен дүкеннен өнімдер мен тамақ жеткізеді, ал қызметкерлер саны 19 мың курьерді құрайды.
Бұл мәміле Uber-дің дамушы нарықтарға шығу стратегиясын көрсетеді. Себебі Uber Солтүстік Америка нарығына әбден сіңісіп алды. Uber мәміленің өздерінің табыс өсіміне және халықаралық бизнесінің ауқымдылығына оң әсер ететініне үміттеніп отыр, деп хабарлайды компания. Trendyol Go қосымшасы қазіргі атауын сақтап, жұмысын жалғастырады. Бірақ Uber Eats қызметі интеграцияланады, деп жазды Bloomberg.
Uber инвесторлары жаңалыққа сақтықпен қарады. Сейсенбі, 6 мамырда Uber акциялары бір сәтте 0,8%-ға өсіп, 86,13 долларға жетті. Бірақ кейін өсу қарқыны 0,1–0,2%-ға дейін бәсеңдеді. 7 мамырда Uber бірінші тоқсанның қаржылық есебін жариялайды.
Контекст
Uber инвесторларға болашақтағы өсу әлеуеті туралы сендіруге тырысып жатыр. Қазір компания автономды көлік және тамақ жеткізу саласындағы бизнесті кеңейтуде, деп хабарлайды Reuters. Мысалы, 3 мамырда Uber келер жылы Еуропада роботакси қызметін іске қосатынын хабарлады. Бұл жобаны қытайлық Beijing Momenta Technology компаниясымен бірлесіп жүзеге асырады. Ал 6 мамырда компания Pony AI деген тағы бір қытайлық компаниямен серіктестік орнатып, Таяу Шығыста өздігінен жүретін көліктерді іске қосу жоспары бары туралы мәлімдеді.
Сонымен қатар, Uber тамақ жеткізу саласында бәсекелестікке тап болуда. Мысалы, АҚШ-тағы нарықтың көшбасшысы DoorDash оларға бәсекелестік танытуға қауқарлы. 6 мамырда DoorDash британдық Deliveroo тамақ жеткізу қызметін шамамен 2,9 миллиард фунт стерлингке (немесе 3,85 миллиард долларға) сатып алғанын жариялады. Бұл сатып алу DoorDash-ке Еуропадағы нарықтағы үлесін арттырып, Just Eat және Uber Eats-пен белсенді бәсекелесуге мүмкіндік береді, деп жазады Reuters. Сондай-ақ, сол күні DoorDash SevenRooms Inc компаниясын 1,2 миллиард долларға сатып алатынын хабарлады.
Сарапшылар ұсынысы
Uber такси қызметінің акциялары осы жылдың басынан бері 42%-ға өсті. MarketWatch деректеріне сәйкес, 58 сарапшы Uber акцияларына баға берді. олардың көпшілігі (50 аналитик) сатып алуды ұсынады. Қалған сегізі акцияларды ұстай тұруға (Hold) кеңес береді. Сатуды ұсынғандар жоқ.
Уолл-стриттің консенсусы бойынша, Uber акцияларының мақсатты бағасы – 89,4 $. Бұл дүйсенбі күнгі сауда жабылу бағасынан 4,7%-ға жоғары.
