АҚШ акциялары сауда шиеленісінің бәсеңдеуіне байланысты өсті. Трамп: «Сатып алыңдар!»
8 мамырда АҚШ қор нарығының негізгі индекстері оң көрсеткішпен жабылды. Бұған сауда қатынастарындағы шиеленістің бәсеңдей бастауы әсер етті. АҚШ алғаш рет тарифтер енгізілгелі бері Ұлыбританиямен ірі келісімге қол қойып, енді Қытаймен де келіссөздер жүргізуге дайындалып жатыр. Дональд Трамп инвесторларға акцияларды қазірден бастап сатып алуға кеңес берді, себебі олар «зымырандай ұшады» деді.
Негізгі деректер:
• Dow Jones индексі 0,6%-ға өсіп, 41 368 пунктке жетті.
• S&P 500 индексі де 0,6%-ға көтеріліп, шамамен 5664 пункт болды.
• Технологиялық сектор индексі Nasdaq Composite 1,1%-ға өсіп, 17 928 пунктке жетті. Бұл өсімге Ақ үйдің Джо Байденнің соңғы күндерінде енгізілген чип экспортына шектеулерді қайта қарауға ниетті екендігі әсер етті. Nvidia акциялары 0,3%-ға, AMD – 1,3%-ға өсті. Google Safari-дегі іздеу сұраныстары азайып жатыр деген қауесетті теріске шығарғаннан кейін, Alphabet акциялары 2%-ға қымбаттады.
• Шағын капиталды компаниялардың Russell 2000 индексі 1,9%-ға көтерілді.
• 10 жылдық мемлекеттік облигациялардың кірістілігі 11 базистік пунктке өсіп, 4,38%-ды құрады.
• Биткойн бірнеше айдан кейін алғаш рет 100 мың доллардан асты. Бұл АҚШ-тағы криптобиржа Coinbase-тің биткойн мен эфирге арналған опциондар бойынша әлемдік жетекші платформа Deribit-ті сатып алғаны туралы жаңалықтан кейін болды.
Нарық неге жанданды?
Bloomberg-тің жазуынша, нарық АҚШ пен оның ірі сауда серіктестері арасындағы шиеленістің азаюынан үміттеніп отыр. 8 мамырда Вашингтон Ұлыбританиямен алғашқы келісім жасалғанын хабарлады. Бұл келісім бойынша:
• Ұлыбритания өнімдеріне 10% базалық баж салығы сақталады;
• кейбір тауарларға салық мүлдем алынып тасталады;
• ал кейбір көліктерге қойылған 25% салық 10%-ға дейін төмендейді.
Оваль кеңседе келісімді жария еткен Трамп алдағы күндері басқа да келіссөздер өтетінін айтты. Оның айтуынша, бұл демалыс күндері Қаржы министрі Скотт Бессент Қытаймен маңызды келіссөздер өткізеді деп күтілуде. Трамптың пікірінше, бұл оң сауда жаңалықтары мен уәде етілген салықтық жеңілдіктер инвесторлардың үмітін арттырады.
Трамп не деді?
«Акциялар сатып алуға дәл қазір барғандарыңыз жөн. Бұл ел зымыран секілді тіке көкке ұшады. Біз бұрын-соңды болмаған сандарды көретін боламыз», — деді ол Barron’s басылымына.
Сарапшылар не дейді?
Bloomberg-ке пікір білдірген Navellier & Associates компаниясының бас инвестициялық директоры Луи Навелье: «Қазір нарықта тәуекелге баруға бейімділік байқалады. Инвесторлар тиімді келісімдерден айырылып қалудан қорқып, акция сатуға асықпай отыр», — дейді.
CFRA компаниясының бас инвестициялық стратегы Сэм Стовалл CNBC-ге: «АҚШ шілденің 9-ына дейін – «айна шаралары» бойынша 90 күндік үзіліс аяқталғанға дейін сауда келісімдерін жасауы мүмкін деген оптимизм артып келеді. Тіпті келіссөздердің басталғанының өзі алдағы уақыттағы басқа серіктестермен мәмілелерге қысымды азайтуы мүмкін», — деді.
Ал City Index пен Forex.com сарапшысы Вакар Разакзада: «Алдағы АҚШ пен Қытай кездесуі нақты серпілістен гөрі дипломатиялық кіріспеге ұқсас болады. Бізді ұзақ келіссөздер кезеңі күтіп тұр, бұл тәуекел активтерінің өсуін тежейтін фактор болуы мүмкін», — дейді.
Principal Asset Management-тің сарапшысы Мартин Франдсен: «АҚШ сауда соғысын бәсеңдетуге бет алған болуы мүмкін. Бірақ белгісіздік әлі де көп. Тұтынушылар мен бизнестің сенімін қалпына келтіру үшін нарыққа анық әрі сенімді дәлелдер қажет болады», — деді ол Bloomberg-ке берген пікірінде.
