Доллар 20% артық бағаланған — Goldman Sachs девальвация қаупін еске салды
Goldman Sachs доллар бұрын екі рет артық бағаланып, бұл девальвациямен аяқталғанын еске салады — бұл туралы банк Oninvest-пен бөліскен баяндамасында жазылған. Банк сарапшылары доллар бағамы төмендейді деп есептейді, ал АҚШ-қа инвестиция тартуға деген сыртқы қызығушылықтың бәсеңдеуі бұл үрдісті үдете түседі.
Доллардың жай-күйі
Бүгінде доллар шамамен 1973 жылдан бергі орташа бағамен салыстырғанда 20%-ға қымбат бағаланып отыр, дейді Goldman Sachs сарапшыларының айтуынша.
«Осындай артық бағаланған деңгейлер 1980-жылдардың ортасында және 2000-жылдардың басында да байқалған еді — бұл кезеңдерден кейін доллар 25–30%-ға дейін құнсызданған», — делінген банк есебінде.
Қазіргі уақытта доллардың нақты құны 1973 жылдан бастап енгізілген еркін айырбас бағамы кезеңіндегі орташа деңгейден шамамен 20%-ға жоғары тұр, деп көрсетеді Goldman Sachs. Соңғы 15 жыл бойы олар америкалық валютаны және активтерді белсенді түрде сатып алып келді. Мұндай инвестициялар орынды таңдау болып көрінді: АҚШ экономикасы көп елмен салыстырғанда жылдамырақ дамыды, ал Big Tech секторы соңғы 10 жылда аса жоғары пайда әкелді. Нәтижесінде америкалық акциялар тарихи көрсеткіштер бойынша 90-процентильден де асып кетті, ал доллардың құны орташа деңгейден екі стандартты ауытқу шегіне (яғни шамамен 20%-ға) дейін көтерілді, делінген есепте.
Бұдан әрі не болады?
Goldman Sachs доллардың әлсіреуіне ықпал етуі мүмкін үш негізгі факторды атап өтті:
— АҚШ-тағы бюджет пен сауда балансының тапшылығы жоғары деңгейде сақталып отыр. Ел ішкі шығындар мен сыртқы сауданы шетелдік капитал ағыны есебінен қаржыландыруда. Бұл тапшылықтар неғұрлым ұзақ сақталса, долларға деген сенімнің әлсіреу қаупі соғұрлым жоғары болады.
— Шетелдік инвесторлардың бұрынғыдай долларлық активтерге инвестиция салуға құлшынысы жоқ. Бұған дейін АҚШ «альтернативасыз» нарық ретінде қарастырылса, енді инвесторлар бағасы қолайлырақ, кірістілігі артып келе жатқан басқа өңірлерге бет бұра бастады.
— Америкалық активтер қазіргі таңда тым қымбат. Нарықтағы мультипликаторлар тарихи максимумға жақындаған кезде, тіпті шағын сыртқы күйзеліс немесе саясаттағы өзгеріс долларды қорғаныш актив ретінде ұстауға деген қызығушылықты төмендетуі мүмкін.
Goldman Sachs-тың бұл ескертуін әлемдегі ең ірі хедж-қор — Bridgewater Associates негізін қалаған Рэй Далио да жанама түрде растады. Ол X (бұрынғы Twitter) желісінде жаңа кітабынан үзінді келтірді: «Елдерде күрделі қарыз мәселелері туындап, ол қарыз өз валютасында берілген жағдайда, олар ақырында сол валютаны құнсыздандыруға мәжбүр болады».
Инвесторлар үшін нені білдіреді?
Goldman Sachs пікірінше, АҚШ экономикасы ұзақ мерзімді әлсіздікке ұшырамайды және капиталдың күрт табыссыздануы екіталай. Алайда бұрынғыдай жоғары табыс деңгейі — әсіресе доллармен есептегенде біртіндеп әлсірей бастады. Инвестициялық банктің сарапшысы ұсынатын негізгі кеңес — тәуекелдерді әртүрлі аймақтар мен салалар бойынша әртараптандыру.
