Уолл-стрит ФРЖ 2025 жылы мөлшерлемені тек екі рет төмендетеді деп күтуде
Инвесторлар АҚШ пен Қытай арасындағы тарифтік жеңілдік туралы келісімнен кейін ФРЖ-ның ақша-несие саясатына қатысты күтулерін қайта қарады. Енді Уолл-стрит 2025 жылы мөлшерлеме төрт емес, екі рет қана төмендейді деп бағаға енгізіп отыр. Сауда соғысының жұмсаруы экономикаға демеу беріп, ФРЖ-ның әрекеттерін ұзаққа шегеруі мүмкін.
Егжей-тегжейлі
Федрезерв отырыстарына арналған деривативтердің бағамына сәйкес нарық қатысушылары негізгі мөлшерлеменің жыл соңына дейін бар болғаны 0,56 пайыздық тармаққа төмендеуін күтуде — бұл өткен аптадағы 75 б.п.-пен салыстырғанда азайған, деп жазады Bloomberg. Алғашқы төмендеу қыркүйекке — 0,25 б.п. деңгейінде болжануда. Опциондар нарығында биыл мөлшерлеме мүлде төмендемейді деген келісімшарттарға қызығушылық артты — CME дерегінше бұл опциондар бойынша ашық позициялар саны 275 мыңнан асты.
Қытаймен сауда соғысының уақытша тоқтауы АҚШ-та рецессия қаупін азайтып, ақша-несие саясатының жедел жұмсару ықтималдығын төмендетеді. Бұл АҚШ Қаржы министрлігінің қазынашылық облигациялары мен өзге де қорғаныш активтердің тартымдылығын азайтады. 12 мамырда пайыздық мөлшерлемеге сезімтал екі жылдық облигация кірістілігі 12 базистік пунктке секіріп, қайтадан 4%-дан асты, деп хабарлайды Bloomberg.
Нарық қатысуышылары не дейді
«Нарықтар әдетте шектен тыс бағалайды, ал қазір капитал ағындары тәуекелді активтерге бағытталуда», — дейді Columbia Threadneedle Investments компаниясының пайыздық мөлшерлеме жөніндегі стратегы Эд Аль-Хусейни Bloomberg агенттігіне. Ол қысқа мерзімді облигацияларды сатуды жөн санайды, себебі оның пікірінше, екі жылдық қазынашылық облигациялардың бағасы тек мөлшерлеме екі реттен аз төмендейтін сценарийде ғана тартымды болады.
Ірі банктердің ФРЖ мөлшерлемесін төмендету жөніндегі болжамдары әлі де алшақ — кейбірі нөлдік, ал кейбірі 100 базистік тармаққа дейін деп күтуде. АҚШ Қытай тауарларына салынатын баж салығын 145%-дан 30%-ға, ал Қытай жағынан — 125%-дан 10%-ға дейін азайтатынын жариялағаннан кейін Citi банкі алғашқы төмендеуді шілде айында, әрі қарай әрбір отырыста 2026 жылдың қаңтарына дейін күтуде.
Контекст
Нарықтағы мөлшерлеме болжамдарының түзетілуі Федрезервтің соңғы отырысының хаттамасы жарияланғаннан кейін және төраға Джером Пауэлл баж салығының инфляция мен экономикалық өсімге әсерін бағалау үшін уақыт керек екенін айтқан соң басталды. Сәуір айында Уолл-стрит маусымнан бастап мөлшерлеме төрт рет 25 б.п.-ке төмендейді деп болжаған болатын — себебі сауда соғысы АҚШ экономикасын әлсіретеді деп қауіптенген. Қазіргі — 2025 жылға екі төмендеу — ФРЖ-ның наурыздағы болжамына жақын, деп түйіндейді Bloomberg.
