АҚШ акциялары қатарынан үшінші күн бойы төмендеді. JPMorgan ізімен жүріп, Wells Fargo өз болжамдарын төмендетті.

Қыркүйектің бірінші күні АҚШ-тың негізгі акциялық индекстері төмендеп жабылды. Кең нарықты қамтитын S&P 500 индексі 0,7 пайызға, технологиялық секторы басым Nasdaq Composite индексі 1 пайызға, ал беделді Dow Jones индексі 0,8 пайызға төмендеді.

MarketWatch мәліметі бойынша, АҚШ пен Иран арасындағы қайта жанданған қақтығыс мұнай бағасын көтергеннен кейін АҚШ акциялары үш күн қатарынан төмендеді, ал әлемдік облигация кірістілігі 2008 жылдан бергі ең жоғары деңгейге жетті. Сонымен қатар, чип өндірушілердің акцияларына тағы бір сатылым толқыны тиді, – деп жазады Bloomberg.

Bloomberg мәліметінше, АҚШ Қаржы министрлігі қайта сатып алу көлемін арттыру туралы шешім қабылдағанға дейінгі деңгейге 30 жылдық АҚШ мемлекеттік облигациялары бойынша кірістілік қайта оралды. Бұл шешім кірістіліктің өсуін тежеуге бағытталған еді. 30 жылдық АҚШ қазынашылық облигациялары бойынша кірістілік сейсенбі күні 5,27 пайызға жетті, Ал 10 жылдық қазынашылық облигациялар бойынша – барлық несие түрлері үшін негізгі эталон – кірістілік 4,8 пайызды құрады, бұл Қаржы министрлігінің араласуынан бұрынғы деңгейден 10 базистік пунктке жоғары.

Жанар-жағар май бағасының өсуі инфляцияның қайта өршуіне әкелуі мүмкін, бұл ақша-несие саясатының қатаңдауы қаупін арттырады. Сонымен қатар, инвесторлар әлемдік облигация кірістілігінің үздіксіз өсуіне алаңдайды, ол белгілі бір дәрежеде мұнай бағасының өсуімен қатар жүреді, – деді Forex.com компаниясының нарықтық талдаушысы Фавад Разақзада Bloomberg агенттігінің есебінде.

Сейсенбі күні, Bloomberg мәліметі бойынша, Wells Fargo осы аптада АҚШ акцияларына қатысты сақтық көзқарастың өсіп келе жатқан толқынына қосылды. Wells Fargo қыркүйекте нарықта «кең тараған сақтық» туралы ескертті, себебі инвесторлар жасанды интеллект бумының тұрақтылығына барған сайын алаңдай бастады: банктің талдаушылар тобы жасанды интеллектіні дамытудың капиталдық шығындарына қатысты алаңдаушылықтың шыңына шығатынын күтеді. Алайда Bloomberg-тің мәліметінше, тамыздың ортасындағы сатылымнан кейін Wells Fargo-ның көңіл-күй индикаторы теріс көрсеткіштерге қарағанда әлі де оң болып отыр.

Бұдан бір күн бұрын JPMorgan-ның сауда бөлімі АҚШ акцияларына қатысты оптимистік, «бұқалық» болжамын тастап, 16 қыркүйектегі Fed отырысы алдында «тактикалық тұрғыдан сақ» ұстаным қабылдады. Дегенмен, JPMorgan акциялар нарығының негізгі көрсеткіштері әлі де мықты екенін мойындады.

«Өсімнің катализаторлары айқын болмай бара жатқан кезде, төмендеудің катализаторлары көбейіп барады», – деп жазды 31 тамызда Citadel Securities компаниясының акциялар мен туынды құралдар стратегиясы бөлімінің басшысы Скотт Рубнер.