АҚШ акциялары мен доллары соңғы айлардағы ең нашар күнін өткерді
АҚШ-тың басты индексі S&P 500 жұма күні 1,6% төмендеп, соңғы бір айдағы ең нашар күнді өткерді. Сонымен бірге тағы үш маңызды индекс те қысқарып, Уолл-стриттің «қорқыныш индексі» 20 пункттік психологиялық шектен асты. Доллар шілдедегі жақсы өсімнен кейін сәуірден бергі ең қатты төмендеуге ұшырады. Бұған екі жағымсыз жаңалық түрткі болды: Дональд Трамп енгізген жаңа баж салығы мен еңбек нарығына қатысты әлсіз статистика. Сарапшылар рецессия қаупі артқанын ескертіп, трейдерлер қыркүйекте ФРЖ-ның мөлшерлемені төмендетуін күтеді.
Егжей-тегжейлі
— 1 сәуір, жұма күнгі сауда қорытындысы бойынша АҚШ-тың басты индексі S&P 500 1,6% төмендеп, 6238,01 пунктке түсті. Бұл — 21 мамырдан бергі ең қатты төмендеуі, деп хабарлады CNBC. Сонымен қатар, Bloomberg мәліметінше, бұл индекс үшін мамыр айынан бергі ең нашар апта болды.
— Dow Jones Industrial Average «көгілдір фишкалар» индексі 1,23% жоғалтып, 43 588,58 пункт деңгейінде жабылды. Бұл — 13 маусымнан бергі ең нашар күн.
— Nasdaq Composite технологиялық индексі 2,24% құлдырап, 20 650,13 пунктке дейін түсті. Бұл — 21 сәуірден бергі ең айтарлықтай күндік құлдырау.
— Dow Jones-тің құрамында қағаздары 8,3% құлдырап ең нашар нәтиже Amazon компаниясына тиесілі болды. Компания пайда мен табыс бойынша Уолл-стриттің болжамдарын артығымен орындағанымен, инвесторлар ағымдағы кезеңге қатысты әлсіз болжамға көңілдері суыды.
— Apple 31 шілдеде сәтті есеп бергенімен, оның акциялары жұма күні 2,5%-ға арзандады. Осы аптада «Керемет жетілік» қатарына кіретін Meta мен Microsoft та мықты есептер жариялады: олардың қағаздары тиісінше 3% және 1,76%-ға түсті. Microsoft капитализациясы $3,9 трлн-нан төмен түсіп кетті. Ал сәрсенбіде ол бір сәтке Nvidia-мен бірге $4 трлн-нан асатын компаниялар клубына қосылған еді.
— Банктердің акциялары қатты зардап шекті. CNBC мәліметінше, инвесторлар экономиканың баяулауы несие беру өсімін тежейді деп қауіптенеді. JPMorgan қағаздары 2%-дан астам, Bank of America мен Wells Fargo акциялары 3%-дан астам төмендеді.
Russell 2000 шағын компаниялар индексі 2% төмендеп, қатарынан бесінші күн құлдырады. Бұл — екі айдан астам уақыттағы ең нашар апта, деп жазды Bloomberg.
— Cboe құбылмалы индексі, яғни «Уолл-стриттің қорқыныш индексі», 22% өсіп, 20,38 пунктке жетті. Бұл көрсеткіш сәуір айындағы жаппай сатылымнан бері алғаш рет психологиялық тұрғыдан маңызды 20 пункт деңгейінен асып түсті.
— Трейдерлер қыркүйектегі ФРЖ отырысында мөлшерлеме төмендейді деген ықтималдылықты күрт арттырды — ол 91%-ға жетті (апта басында небәрі 40% болатын). Бұл төмен мөлшерлеме перспективасы доллардың 1% арзандауына әкелді — бұл сәуірден бергі бір күн ішіндегі ең үлкен құлдырау.
— АҚШ-тың екі жылдық мемлекеттік облигацияларының кірістілігі 2023 жылдың желтоқсанынан бергі ең қатты төмендеуді көрсетті. Инвесторлар қорғаныс активтеріне сұранысты күшейтті.
Нарыққа не әсер етті?
АҚШ президенті Дональд Трамп 70-ке жуық ел мен аумаққа қатысты жаңа, жоғары мөлшердегі кедендік тарифтер енгізетін жарлықтарға қол қойды. Бұл алымдар жеті күннен кейін күшіне енеді. Мысалы, Бразилиядан әкелінетін кейбір тауарларға салынатын пошлина 50%-ға дейін, Швейцариядан — 39%-ға, Канададан — 35%-ға, ал Үндістаннан — 25%-ға дейін өседі.
Сондай-ақ, күндіз АҚШ Еңбек статистикасы бюросы шілде айындағы еңбек нарығына қатысты деректерді жариялады: ауыл шаруашылығынан тыс жаңа жұмыс орындарының саны небәрі 73 мыңға өсті — бұл сарапшылар күткен 100 мыңнан әлдеқайда аз. Ал жұмыссыздық деңгейі 4,2%-ға дейін өсті. Bloomberg мәліметінше, бұл пандемиядан бергі ең нашар өсім. Сонымен қатар, мамыр мен маусым айларының көрсеткіштері де төмендетіліп қайта қаралды — жиынтығында 258 мың орынға. Осыдан кейін Трамп Еңбек статистикасы бюросының басшысы Эрика Макэнтарферді отставкаға жіберуге бұйрық берді.
Кешке қарай геосаяси алаңдаушылық та күшейді. Трамп Ресейдің экс-президенті Дмитрий Медведевтің «аса арандатушы» мәлімдемелеріне жауап ретінде екі ядролық сүңгуір қайықты «тиісті аймақтарға» орналастыруды бұйырғанын мәлімдеді. Бұл мәлімдемеге Кремльден жауап жарияланған сәтке дейін түскен жоқ.
Сарапшылар пікірі
Бірнеше ай бойы Уолл-стрит Трамптың сауда соғысы мен «ұзақ уақыт жоғары» қалатын ФРЖ саясатын елемей келді. Инвесторлар АҚШ экономикасы мықты болып қала береді және нарықты әрі қарай алға тартады деп сенді. Алайда осы аптада бұл сенім әлсірей бастады, деп жазады Bloomberg.
«Экономикадағы баяулау баж салықтарымен байланысты болып отыр. Еңбек нарығындағы жұмсара түскен жағдай ФРЖ-ны тығырыққа тіреуі мүмкін. Соңғы жылдары бұл ұйым реакцияшыл мінез танытып келгенін ескерсек, алдағы айларда нақты шаралар қабылдануы ықтимал», — деп атап өтті Allianz Investment Management-тің аға инвестициялық стратегі Чарли Рипли Bloomberg-ке берген пікірінде.
«Көпшілік нарықтан шығуға бой ала бастады. Жұмысбастылық бойынша әлсіз деректер қыркүйекте ставканың төмендеу ықтималдығын арттырды, дегенмен ФРЖ тым ұзақ күтіп отырған болуы мүмкін», — деді Themis Trading компаниясының акциялар трейдингі жөніндегі қосалқы жетекшісі Джо Салуцци.
CNBC-дің хабарлауынша, жұма күнгі нарықтың төмендеуі АҚШ экономикасының өсуіне қатысты алаңдаушылықтың артуымен байланысты. Бұл — нарықтағы шамадан тыс көтерілген бағалардың салдары, дейді Macquarie Group-тың стратегң Тьерри Уизман.
«Жаңа жұмыс орындарының баяу құрылуы мен баж салықтарының теріс әсері алдағы айларда жалақы бойынша жағымсыз статистикамен жалғасуы мүмкін. Бұл рецессия қаупін күшейтеді», — деп ескертті ClearBridge Investments-тің экономикалық және нарықтық стратегия жөніндегі директоры Джефф Шульце.
«Трейдерлер технологиялық компаниялардың есептері жоққа шыққанда, макроқауіптер арта түскенде және маусымдық фактор теріс рөл атқара бастағанда, пайдасын бекітіп жатыр. Сауда диапазон тарылып, бағалаулар созылған, ал қорғаныш позициялау біртіндеп қалыптасуда», — дейді Calamos Investments портфельдік маманы Джозеф Кьюсик.
