Трамп Ресейдің экс-президентіне жауап ретінде екі ядролық сүңгуір қайықты көшіреді
АҚШ президенті Дональд Трамп Ресейдің бұрынғы президенті Дмитрий Медведевтің «өте арандатушылық» мәлімдемелеріне жауап ретінде екі ядролық сүңгуір қайықты «тиісті аймақтарға» орналастыруды бұйырғанын хабарлады. Алайда олардың нақты қайда жіберілгенін Трамп нақтыламады.
Егжей-тегжейлі
«Ресейдің бұрынғы президенті, қазіргі уақытта Қауіпсіздік кеңесі төрағасының орынбасары болып отырған Дмитрий Медведевтің аса арандатушы мәлімдемелеріне сүйене отырып, мен екі ядролық сүңгуір қайықты тиісті аймақтарға орналастыруды бұйырдым — егер бұндай ақымақтықпен әрі отқа май құятын мәлімдемелердің астарында бір нәрсе жатқан болса деген сақтықпен. Сөз — өте маңызды, кейде ол күтпеген салдарға алып келуі мүмкін, мен бұл жолы ондай жағдай болмайды деп үміттенемін», — деп жазды Трамп Truth әлеуметтік желісінде.
АҚШ президенті қандай сүңгуір қайықтар туралы сөз болып отырғанын және олардың қайда жіберілетінін нақтылаған жоқ. АҚШ Қорғаныс министрлігі мен Әскери-теңіз күштерінің өкілдері Bloomberg агенттігінің түсініктеме беру туралы сұранысына жауап бермеді. Қорғаныс министрі Пит Хегсет X әлеуметтік желісіндегі парақшасында Трамптың жазбасының скриншотын жариялады, алайда ешқандай жеке пікір қоспады. Кремль өкілдері де Bloomberg-тің сауалына жауап бермеген.
Трамп пен Медведевтің арасындағы келіспеушілік қалай туындады?
Осы аптада Трамп Ресейге Украинадағы атысты тоқтатпаса, 8 тамызда санкциялар енгіземін деп сес көрсетті. Осылайша, АҚШ президенті Кремльге бастапқыда берілген 50 күндік мерзімді қысқартты, деп жазады Bloomberg. Агенттіктің мәліметінше, бұл санкциялар АҚШ-тың Ресейдің энергоресурстарын сатып алатын елдерден импортқа баж салықтарын енгізу түрінде болуы мүмкін.
Бұл мәлімдемеге Медведев жауап қатты. 28 шілдеде Ресейдің бұрынғы президенті X желісінде Трамп Ресейге Украинадағы конфликтті аяқтау үшін мерзім белгілеген кезде, «ультиматуммен ойнап» отыр деп жазды. «Әрбір жаңа ультиматум — бұл қауіп және соғысқа жақындататын қадам. Бірақ ол соғыс Ресей мен Украина арасында емес, өзінің елімен», — деп мәлімдеді Медведев.
31 шілдеде Трамп Truth әлеуметтік желісінде Медведевке «сөзіне абай болу керек» екенін айтты. «Ол өте қауіпті аймаққа аяқ басып жатыр!» — деп жазды АҚШ президенті. Медведев болса, Трамптың реакциясы Ресейдің әрекеттерінің дұрыстығын ғана дәлелдейді деп жауап берді.
Ресей президенті Владимир Путин жұма күні Украинамен келіссөздерге қатысты сұраққа жауап бере отырып: «Кімнен болса да, барлық үмітсіздік шектен тыс күткеннен туындайды», — деп мәлімдеді. Путин ешкімнің атын нақты атамады, бірақ мәселені бейбіт жолмен шешу үшін «жан-жақты әңгімелер жүргізу қажет, оны жұрт алдында емес, келіссөз процесін тыныш жағдайда, сабырмен жасау керек» деп қосты.
