АҚШ акциялары төртінші күн қатарынан төмендеуде. S&P 500 шамамен 1% минусқа түсті
18 қарашада АҚШ қор нарығы саудаға айтарлықтай төмендеумен ашылып, нарықтағы сатылым жалғасты.
S&P 500 сауда ашылғаннан көп ұзамай 0,9% төмендеді, ал бір уақытта құлдырау 1,3%-ға жетті. Dow Jones индексі 1,4% түсті, ал технологиялық компаниялар көп шоғырланған Nasdaq Composite 1,9%-дан да көп жоғалтты.
CNBC жазғандай, қор нарығындағы бағамның төмендеуіне жасанды интеллектпен байланысты технологиялық компаниялардың қымбаттауына алаңдаған инвесторлар әсер етуде. Google-дың бас компаниясы Alphabet бас директоры Сундар Пичаи BBC-ге берген сұхбатында ЖИ айналасындағы бум «иррационалды елігу» қаупін туғызатынын және «егер көпіршік жарылса, ешбір компания қорғалмайтынын» айтты.
Жасанды интеллектке арналған процессорлар нарығындағы жетекші компания Nvidia акциялары шамамен 3% төмендеді. Ай басталғалы олардың бағасы 10% шамасында түсіп кетті. Компанияның 19 қарашада жарияланатын үшінші тоқсан нәтижелеріне қатысты күту де қысым жасап отыр. «Керемет жетілік» құрамындағы басқа компаниялар — Amazon мен Microsoft та төмендеді. Олардың акция рейтингтері Rothschild & Co Redburn тарапынан 2022 жылдан бері алғаш рет төмендетілді.
Тәуекелді активтерден қаражаттың кетуі биткоин бағасына да әсер етті. Ол сейсенбі күні қысқа уақытқа $90 000 деңгейінен төмендеді.
Barron’s жазғандай, сейсенбідегі нарық әлсіздігінің бір бөлігі Home Depot компаниясының көңіл көншітпейтін есебіне байланысты болды. Бас директор Тед Декер тұтынушылардағы белгісіздік пен тұрғын үй нарығындағы қысым сұранысты азайтып жатқанын айтты. Үйге арналған тауарлар сататын ритейлер күткеннен төмен пайда жариялап, жылдық болжамын да төмендетті.
