АҚШ апелляциялық соты Трамптың жаһандық баж салығын заңсыз деп таныды
АҚШ федералдық апелляциялық соты жұма күні, 29 тамызда, Дональд Трамптың президенттігі кезінде енгізген жаһандық баж салығының басым бөлігі заңсыз деп таныды, өйткені ол оларды белгілегенде өз өкілеттігін асыра пайдаланған, деп хабарлайды Bloomberg. Соған қарамастан, судьялар бұл тарифтердің күшін іс қайтадан төменгі инстанцияда қаралғанға дейін сақтап қалуға рұқсат берді.
Апелляциялық сот халықаралық сауда жөніндегі соттың бұрынғы шешімін қолдады. Ол шешімге сәйкес, Трамп «айна тәрізді» немесе «өзара» баж салығын енгізу үшін төтенше экономикалық өкілеттіктер туралы заңды дұрыс пайдаланбаған. Трамптың ойынша, өзге елдердің сауда саясаты АҚШ ұлттық қауіпсіздігіне қатер төндіреді. Алайда сот ол заң президентке мұндай ауқымды шараларды жүзеге асыру құқығын бермейтінін мәлімдеген.
Импортқа белгілі бір деңгейде тәуелді бес америкалық компания атынан шағым берілген еді. Алайда халықаралық сауда соты Трамптың жарлықтары «тек талапкерлерге ғана емес, барлығы үшін заңсыз» деп шешті. Апелляциялық сот істі қайтадан төменгі инстанцияға жолдап, нақты осы мәселені — заңсыз деп танылған баж салығы туралы шешім кімдерге таралатынын анықтауды тапсырды.
Іс жүргізу жалғасып жатқанын ескергенде, белгісіздік сақталып отыр, деп жазады Bloomberg. Ақ үй өкілдері өздерінің сауда бастамаларын Жоғарғы сотқа дейін қорғауға дайын екенін мәлімдеді. Ал егер ағымдағы тәсіл бұғатталатын болса, Трамп басқа заңдық тетіктерді іске қосатынын айтқан. Дегенмен, бұл уақытты талап етеді, деп атап өтті Bloomberg.
Ақ үй жұма күнгі шешімге агенттікке жедел түсініктеме бере алмады.
Америкалық жетекші индекстердің фьючерстері төмендеді, деп көрсетеді CNBC. S&P 500 фьючерстері 0,7% минусқа кетті, ал технологиялық Nasdaq Composite бойынша келісімшарттар бірден 1,3% құлдырады.
