АҚШ ФРЖ 2025 жылы алғаш рет мөлшерлемені төмендетті. Акциялар не болады?
АҚШ-тың Федералдық резерв жүйесі (ФРЖ) 2025 жылы алғаш рет негізгі мөлшерлемені төмендетті. Бұған дейін ол қатарынан бес отырыста өзгеріссіз қалған еді. Бұл шешім экономистер мен инвесторлардың күтуіне сәйкес келді.
Егжей-тегжейі
ФРЖ-ның Ашық нарық комитеті (FOMC) 16–17 қыркүйектегі екі күндік отырыстың қорытындысы бойынша негізгі мөлшерлемені 25 б.п.-қа төмендетті. Енді ол 4–4,25% деңгейінде. CME Group-тың FedWatch құралы да дәл осы шешімді болжап еді.
ФРЖ мәліметінше, жылдың бірінші жартысында экономикалық белсенділік баяулады. Жұмыс орындарының өсуі азайды, жұмыссыздық сәл көтерілді, бірақ әлі де төмен деңгейде. Инфляция өсті және нысаналы межеден жоғары тұр.
Бұл жолы комитет жаңа құрамда дауыс берді. Дональд Трамп ұсынған Стивен Миран тек 25 емес, бірден 50 б.п.-қа төмендетуді жақтап, жалғыз қарсы дауыс берді. Ал Трамп қызметінен кетірмек болған Лиза Кук орнында қалды.
Нарық реакциясы
ФРЖ шешімі шыққаннан кейін АҚШ-тың төрт ірі қор индексінің үшеуі көтерілді.
S&P 500 сәл ғана өсіп, 0,05% қосса, Nasdaq 0,4% төмендеді. Dow Jones шамамен 1%-ға көтерілді. Ал Russell 2000 индексі 0,7%-ға өсті.
Алдағы ықпал
JPMorgan-ның бас стратегы Дэвид Келли ескертеді: егер мөлшерлемені төмендету ФРЖ болжамына емес, саяси қысымға байланысты деп қабылданса, бұл акцияларға, облигацияларға және долларға қауіп төндіреді. Оның айтуынша, нарық «қызып тұр» және саясатты жұмсарту сұранысты күшейтпей, керісінше әлсіретуі мүмкін.
Morgan Stanley және Oppenheimer де абай болуға шақырды. Олар 25 б.п. төмендету еңбек нарығының әлсіздігін шешпейді деп санайды, ал инвесторлар экономиканың баяулау қаупіне назар аударады.
Barron’s жазғандай, шешім қыркүйектің соңына сәйкес келіп тұр, бұл дәстүрлі түрде АҚШ акциялары үшін әлсіз кезең. Bank of America дерегінше, 1928 жылдан бері қыркүйектің кейінгі 10 күні S&P 500 үшін ең нашар кезең болған — орташа есеппен 0,6% төмендеу. Жаңа әкімшілік қызметке кіріскен жылы бұл құлдырау 1,6%-ға жеткен.
Leuthold Group өкілі Дуг Рэмси де ескертті: S&P 500 тарихи максимумнан 1%-дан аз қашықтықта тұрғанда жасалған мөлшерлеме төмендеулері жиі құлдырауға әкеледі. 1996 жылдан бері мұндай алты жағдайдың орташа төмендеуі — 15,3%.
Citigroup сарапшысы Скотт Кронерт болса, мөлшерлемені азайту қысқа мерзімді әлсіздікті көрсетеді дейді. Бірақ ол рецессия емес, баяу болса да тұрақты өсім күтеді. Оның ойынша, ең үлкен пайда өсім акцияларынан — табысын қайта инвестициялап, жылдам дамитын компания қағаздарынан түседі.
UBS Wealth Management директоры Брайан Бутель салыстырмалы түрде оптимистік. Ол да қыркүйек нарық үшін әлсіз ай екенін мойындайды, бірақ мұндай түзетулерді инвесторлар үшін қосымша сатып алу мүмкіндігі деп санайды. Оның пікірінше, ІТ-гиганттардың ЖИ-дағы табысының арқасында 2026 жылға дейін нарық өсуді жалғастырады.
