Көтерме инфляция кенеттен бәсеңдеді. Нарық ФРЖ мөлшерлемені түсіреді деген сенімде
АҚШ-та тамыз айында көтерме баға инфляциясы төрт айда алғаш рет күтпеген жерден төмендеді. Осы жағдай Федералдық резервтік жүйенің пайыздық мөлшерлемені төмендетуіне негіз болатын уәждерді нығайтты.
Егжей-тегжейлі
Еңбек статистикасы бюросы жариялаған есепке сәйкес, өндіруші бағасының индексі (PPI) алдыңғы аймен салыстырғанда 0,1% төмендеді. Сонымен бірге, шілде айындағы деректер төмендеу жағына қайта қаралды. Жылдық мәнде көрсеткіш 2,6% өсті.
Деректер жарияланғаннан кейін АҚШ акцияларына фьючерстер көтерілді. Сол уақытта АҚШ қазынашылық облигацияларының кірістілігі төмендеді. ФРЖ саясатының өзгерістеріне ең сезімтал екі жылдық қағаздардың кірістілігі төрт базистік пунктке төмендеп, 3,52%-ды құрады. Эталондық он жылдық облигациялар бойынша мөлшерлеме екі пунктке төмендеп, 4,07%-ға жетті.
Контекст
Есеп көрсеткендей, компаниялар тамыз айында шығынның президент Дональд Трамптың баж салығынан өсуіне қарамастан, бағаларды күрт қымбаттатудан бас тартты. Шілдедегі айтарлықтай өсімнен кейін төмендеу байқалғанымен, көптеген фирмалар қатты қымбаттау клиенттерді үркітіп жіберуі мүмкін деп қорықты, әсіресе экономикалық белгісіздік сақталып тұрған жағдайда.
Азық-түлік пен энергия ресурстарын есептемегендегі тауар бағасы 0,3% көтерілді. Қызметтер құны 0,2% төмендеді. Осы сегмент ішінде көтерме және бөлшек сатушылардың маржасы 1,7% құлдырады — бұл 2009 жылдан бергі ең ірі төмендеу. Жыл басынан бері бұл көрсеткіш құбылып тұр, ол сауда саясатының баға мен сұранысқа ықпалына қатысты белгісіздікті көрсетеді.
Компаниялар баж салығынан туындайтын шығынды сатып алушыларға қаншалықты аударатыны — биылғы мөлшерлеменің қайда бағытталатынын айқындайтын негізгі факторлардың бірі. ФРЖ жалпы алғанда импорттық баж салығы инфляцияны кемінде 2025 жылдың соңына дейін жоғары қарай итермелейді деп санайды, бірақ бұл бір реттік секіріс пе, әлде ұзақ мерзімді үрдіс пе — әзірге белгісіз.
Трейдерлер ФРЖ мөлшерлмені төмендетеді деген болжамын сақтап отыр, келесі аптадағы реттеуші отырысында 0,25 п. п. қысқарту бағаларға толық енгізілді, деп нақтылайды Bloomberg. Енді назар бейсенбіде жарияланатын тұтынушылық инфляция (CPI) деректеріне ауды, өйткені ол орталық банк үшін маңыздырақ болмақ.
«Бұл келесі аптада мөлшерлемені 25 базистік пунктке төмендетуді іс жүзінде кепілді етеді, — деді NatAlliance Securities компаниясының халықаралық қарыз нарығы бөлімінің басшысы Эндрю Бреннер. — Біз 50 пунктке төмендетуді күтпейміз, тек егер CPI күтпеген жерден болжамнан әлдеқайда төмен болып шықпаса».
