АҚШ-та инфляция күшейді. ФРЖ мөлшерлемені төмендете ме?
АҚШ-та базалық инфляция шілдеде 2,9%-ға өсті — бұл ақпан айынан бергі ең жоғары көрсеткіш екенін көрсетті Жеке тұтыну шығындарының индексі (PCE). Бұл — АҚШ Федералдық резерв жүйесі (ФРЖ) ақша-несие саясаты бойынша шешім қабылдауда негізге алатын басты инфляциялық индикатор. Инфляцияның үдеуі байқалса да, сарапшылар қыркүйекте пайыздық мөлшерлеменің төмендеуін күтіп отыр. Алайда, биыл қосымша жұмсарту шараларының болашағына деген сенім әлсіреуі мүмкін.
Егжей-тегжейлі
Азық-түлік пен энергия бағасының құбылмалылығын есепке алмайтын базалық PCE индексі шілде айында жылдық көрсеткіш бойынша 2,9%-ға көтерілді, деп хабарлады АҚШ-тың Экономикалық талдау бюросы. Бұл — ақпан айынан бергі ең жоғары өсім және көрсеткіш үш ай қатарынан өсу үстінде. Маусыммен салыстырғанда базалық PCE 0,3%-ға өсті. Бұл мәліметтер Bloomberg пен MarketWatch келтірген сарапшылар болжамымен толық сәйкес келеді.
«Көктеммен салыстырғанда инфляция өсті, өйткені баж салығы порттардан қоймаларға, кейінірек дүкен кассаларына дейін жетті», — деді Comerica Bank-тың аға экономисі Билл Адамс, деректер жарияланар алдында.
Инфляцияға түзетілген тұтынушылық шығындар шілдеде 0,3%-ға өсті — бұл соңғы төрт айдағы ең жоғары көрсеткіш. Бұл — сұраныстың әлі де берік екенін білдіреді, деп атап өтті Bloomberg.
Нарықтағы жағдай
Бұл мәлімет жарияланған сәтте S&P 500 индексіне арналған фьючерстер 0,35%-ға төмендеді, Dow Jones – 0,31%, ал Nasdaq 100 – бірден 0,6%-ға түсіп кетті.
MarketWatch-тың хабарлауынша PCE индексі шыққаннан кейін АҚШ мемлекеттік облигацияларының кірістілігі оң нәтиже көрсетті, бірақ айтарлықтай өзгеріс байқалмады. 30 және 10 жылдық облигациялар шамамен 3 базистік тармаққа өсіп, тиісінше 4,91% және 4,23%-ды құрады. Ал екі жылдық облигация кірістілігі 1 базистік тармаққа өсіп, 3,6%-ға жетті (FactSet деректері).
Статистика жарияланғанға дейін алтын бағасы төмендеді, ал доллар сәл қымбаттады. Reuters-тің хабарлауынша алтын бағасы алдыңғы күні $3423,16-ға дейін көтерілді — бұл 23 шілдеден бергі ең жоғары көрсеткіш. Тамыз айының басынан бері қымбат металл 3,6%-ға өскен.
Nemo.Money компаниясының аға нарықтық аналитигі Хан Тан Reuters агенттігіне берген пікірінде:
«Доллардың сәл өсуімен қатар, алтын да статистикалық деректерге байланысты $3400 айналасында «гравитациялық күшке» ұшырады. Нарықтар алтынның осы психологиялық шектен қатты ауытқуына жол бергісі келмейді», — деді.
Егер инфляция көрсеткіші күтілгеннен де нашар болмай шықса, алтын $3400 деңгейінен жоғары тұра алады. Бірақ егер PCE деректері ФРЖ-ның пайыздық мөлшерлемені төмендету үмітін әлсіретсе, алтын бағасы бұл деңгейден төмен түсуі мүмкін. Себебі пайыздық табыс әкелмейтін алтын, әдетте, төмен мөлшерлеме жағдайында жақсы нәтиже көрсетеді, деп қосты Reuters.
Бұл мөлшерлемеге қалай әсер етпек?
PCE индексі — ФРЖ инфляцияны бағалауда ең жиі қолданатын көрсеткіш. Сонымен қатар, тұтыну бағалары индексі (CPI) де пайдаланылады. CPI шілдеде 2,7%-ға өсті — бұл маусымдағы көрсеткішпен бірдей және сарапшылар күткеннен төмен.
MarketWatch-тың пікірінше PCE-нің шілдедегі өсуі ставкаларға қысым жасағанымен, оның әсері шектеулі болуы мүмкін. ФРЖ төрағасы Джером Пауэлл өткен аптадағы баяндамасында инфляцияға алаңдауы азайып, еңбек нарығына көбірек көңіл бөлетінін айтқан. Бұл қыркүйекте ставка төмендейді деген болжамды күшейтеді, деп жазды басылым. PCE индексінің өзі бұрын жарияланған тұтынушылық және көтерме баға деректеріне негізделіп есептелетіндіктен, Пауэлл баяндама алдында оның негізгі нәтижелерін білген болуы мүмкін.
Алайда сарапшылар инфляцияның жоғары болуы 2025 жылдың соңына қарай қосымша ставкалық төмендетулерге жол бермеуі мүмкін екенін ескертті. Ал қыркүйектегі шешімге тек тамызда инфляцияның күрт өсуі әсер етуі мүмкін, деп жазды MarketWatch.
Бұдан кейін не болады?
2025 жылдың төртінші тоқсанында базалық PCE 3,2%-ға жетеді деген болжам бар, деп хабарлады Bloomberg 22–27 тамыз аралығында жүргізген сауалнама нәтижесінде. Зерттеуге қатысқан 79 сарапшының пікірінше 2026 жылы инфляция біртіндеп төмендей бастайды, бірақ ФРЖ-ның 2% мақсатынан жоғары болады.
Сонымен қатар, АҚШ ЖІӨ өсімі 2025 жылдың екінші жартысында 1,1%-ға дейін баяулайды деп күтілуде (жылдың бірінші жартысындағы орташа өсім — 1,4%). Бұл ФРЖ-ның баға тұрақтылығына қысым мен экономикалық белсенділіктің әлсіздігі арасында теңгерім табуы қажет екенін көрсетеді, деп жазды Bloomberg.
Дегенмен, сарапшылар алдағы 12 айда рецессия болу ықтималдығын 32% деп бағалады — бұл наурыздан бергі ең төмен көрсеткіш. Сондай-ақ, келер жылы бизнестің инвестициялық белсенділігі артады деген үміт те бар, деп қосты агенттік.
