АҚШ ФРЖ Трамптың басқарушы мүшелердің бірін қызметтен босату әрекетіне жауап берді
АҚШ-тың Федералдық резерв жүйесі (ФРЖ) президент Дональд Трамптың ФРЖ басқарушылар кеңесінің мүшесі Лиза Кукты жұмыстан босату туралы шешіміне қатысты мәлімдеме жасады. Реттеуші орган кез келген сот шешімін орындайтынын айтты, бірақ сот оның қызметін жалғастыру құқығын растайтынына сенімді екенін жеткізді, деп хабарлайды CNBC.
Егжей-тегжейі
ФРЖ бұл мәлімдемені Трамптың шешімінен кейін таратты. 25 тамыз, дүйсенбі күні Ақ үй басшысы Кукты қызметінен босататынын жариялады. Ол мұны ипотекалық құжаттарды рәсімдеу кезінде заңбұзушылықтарға жол берді деген айыппен түсіндірді. Ал Кук бұл айыптарды жоққа шығарып, сотқа жүгінетінін, ал әзірге жұмысын жалғастыра беретінін мәлімдеді.
ФРЖ өз хабарламасында: «Конгресс қабылдаған заңға сәйкес, басқарушылар белгілі бір мерзімге тағайындалады және оларды президент тек нақты себеппен ғана қызметінен босата алады. Ұзақ мерзімді өкілеттік пен еркінен тыс жұмыстан шығарудан қорғау — ақша-несие саясатының шешімдері тек деректер мен экономикалық талдауларға негізделіп, елдің ұзақ мерзімді мүддесіне сай қабылдануын қамтамасыз ететін маңызды кепілдік. ФРЖ өз міндеттерін заңға сәйкес орындауды жалғастырады», — делінген.
Трамп болса, Куктың тағдырына қатысты кез келген сот шешіміне бағынатынын айтты. Bloomberg дерегінше, Ақ үй әзірге Куктың орнына жаңа үміткер іздеуді бастамайды. Әзірге жоспар — ФРЖ төрағасы Джером Пауэллге мұрагер іздеу процесін жалғастырып, содан кейін басқа бос орындарға сәйкес келетін кандидаттарды қарастыру.
Сарапшылардың айтуынша, соттың Куктың пайдасына шешім шығару ықтималдығы жоғары. Freedom Capital Markets Research өкілі Михаил Денисламовтың пікірінше, егер сот шешімі Трамптың пайдасына шықса, ол ФРЖ басшылығында өзіне адал адамдардың санын арттырып, шешімдерге көбірек ықпал ете алады. Бұл жағдайда қаржы нарықтарындағы құбылмалылық күшейеді.
Нарықтағы жағдай
26 тамыз, сейсенбі күнгі сауда-саттықтың басында АҚШ-тың негізгі биржалық индекстері сәл төмендеді, бірақ күннің ортасында өсім көрсетті. ФРЖ-ның мәлімдемесінен кейін S&P 500 және Nasdaq Composite 0,2%-ға, ал Dow Jones шамамен 0,1%-ға көтерілді.
Vital Knowledge компаниясының негізін қалаушы Адам Криссафулли CNBC-ге берген пікірінде: «Қысқа мерзімде нарықтар Кукке қатысты жаңалықты тез еңсеруі мүмкін, егер бұл оқиға жеке эпизод ретінде қалып, Трамп Пауэллді орнынан алуға тырыспаса. Дегенмен, ФРЖ-ның тәуелсіздігіне күмән туындап отыр. Бұл ұзақ мерзімді жағымсыз салдары бар процесс», — деді.
