АҚШ пен Иран соққысынан кейінгі алғашқы сауда күні нарық өсіммен аяқталды
АҚШ-тың Иранның ядролық инфрақұрылымына жасаған соққылары мен Тегеранның Катардағы американдық әскери базаға жасаған жауабы нарықта құлдырау тудыра ма деген алаңдаушылыққа қарамастан, 23 маусымдағы сауда сессиясы шамамен 1% өсіммен аяқталды. Керісінше, мұнай бағасы күрт төмендеді. Сарапшылардың айтуынша, инвесторларды негізінен мұнай жеткізілімі алаңдатады. Қазір олар Ормуз бұғазының жабылу қаупі азайды, ал қақтығыстың ушығуы шектеулі болады деп санайды.
Егжей-тегжейі
— Кең нарық индексі S&P 500 дүйсенбіде 1%-ға өсіп, 6025 пунктке жетті. Осылайша, жұма күнгі төмендеуді қайтарды.
— Технологиялық сектор индексі Nasdaq Composite те 1%-ға өсіп, 19 631 пунктпен жабылды.
— Dow Jones Industrial Average 0,9%-ға өсіп, 42 582 пунктке жетті.
— Russell 2000 индексі 1,1%-ға өсіп, 2132,7 пункт болды.
— «Керемет жетілік» компанияларының ішінде Amazon мен Alphabet-тен басқасының акциялары өсті. Tesla 8,2%-ға қымбаттады. Жексенбіде ол Техаста алғашқы роботаксиін іске қосты. Chevron мен Exxon Mobil акциялары тиісінше 1,8% және 2,6%-ға арзандады. Қорғаныс саласындағы Lockheed Martin мен Northrop Grumman акциялары 0,4%-ға өсті.
— WTI мұнайы сауда кезінде 9,8%-ға, ал Brent 9,7%-ға бір баррель үшін 70 доллардан төмендеді.
— Bloomberg доллар индексі 0,2%-ға төмендеді, алтын бағасы керісінше өсті.
— Энергия бағасы есебінен инфляция артады деген алаң басылып, қазынашылық облигациялардың кірістілігі төмендеді, деп хабарлайды Bloomberg.
Нарыққа әсер еткен факторлар
АҚШ 22 маусымға қараған түні Ирандағы үш ядролық нысанға соққы жасады. Бұл — дипломатиялық келіссөз жалғасады деп күткен инвесторлар үшін күтпеген жағдай болды, деп жазады CNBC. Дүйсенбі күні таңертең инвесторлар Иранның жауабына байланысты алаңдады: мұнай бағасы күрт көтеріліп, АҚШ фьючерстері арзандады, өйткені Тегеран Ормуз бұғазын жауып тастауы мүмкін деген қауіп болды. Бұл бұғаз арқылы әлемдік мұнайдың төрттен бірі өтеді.
Иран дүйсенбі күні Катардағы АҚШ базасына зымыранмен соққы жасады. Осыдан кейін АҚШ биржалық индекстері өсуін жоғалтып, төмендей бастады, бірақ артынша тез қайтадан өсімге өтті. Катар билігі шабуыл тойтарылғанын, зардап шеккендер жоқ екенін хабарлады. Бұл ақпаратты кейін АҚШ президенті Дональд Трамп растады.
Трамп Truth Social парақшасында: «Иран ядролық нысандарына жасаған шабуылымызға өте әлсіз жауап берді. Біз оған дайын болдық әрі тиімді тойтардық. 14 зымыранның 13-і атып түсірілді, біреуі зиянсыз бағытқа ұшқандықтан тоқтатылмады. Ең бастысы – олар (Иран) эмоциясын шығарды, енді мені алаңдататын жеккөрушілік қалмады деп үміттенемін. Иранға шабуылды алдын ала ескерткені үшін алғыс айтамын. Бұл адам шығынын болдырмауға көмектесті», – деді.
Инвесторлар Иранның жауабын бұрынғыдан әлдеқайда жұмсақ деп бағалады. CNBC мәліметінше, мұнай бағасы арзандады, өйткені трейдерлер шикізат жеткізілімінің ірі үзілуі болмайды деп болжап отыр.
The Wall Street Journal-дың жазуынша, дүйсенбі күні Федералды резерв жүйесінің басқарма мүшесі Мишель Боуман шілде айында пайыздық мөлшерлемені төмендетуге қолдау білдіруі мүмкін екенін айтты. Өткен аптада ФРЖ мүшесі Кристофер Уоллер де осындай «жұмсақ» пікір білдірген. Бұл ФРЖ ішінде ақша-несие саясатын жеңілдетуге қолдау күшейіп келе жатқанын білдіреді.
Сарапшылар не дейді?
— Harris Financial Group компаниясының басқарушы директоры Джейми Кокс CNBC арнасына: «Нарық мұнай жеткізіліміне қатысты кідірістерден ғана қауіптенеді. Егер соның алдын алуға мүмкіндік болса, баға күрт өседі. Президент (Трамп) соққының тиімділігін асыра айтты ма, жоқ па, маңызды емес — Иранның ядролық бағдарламасы ондаған жылға кейін шегерілді», — деді.
— Vital Knowledge сарапшысы Адам Крисафулли CNBC-ге берген пікірінде: «Таяу Шығыстағы геосаяси тәуекелдер, әрине, күшейді. Бірақ біз Иранның әскери әлеуеті мен прокси күштері әлсіреді, Тегеран оқшауланған, ал әлемде мұнай қоры жеткілікті болғандықтан, бұл шиеленістің салдары шектеулі болады деп есептейміз», — деді.
— Morgan Stanley стратегия бөлімінің сарапшылары: «Геосаяси оқиғаларға байланысты биржадағы құлдырау әдетте қысқа мерзімді және орташа сипатта болады. Мұнай бағасы ғана нарықтағы құбылмалылықтың жалғасу-жалғаспауын анықтайды», — деп жазды Bloomberg агенттігіне жолдаған жазбасында.
Morgan Stanley дерегінше, бұған дейінгі геосаяси дағдарыстар биржада қысқа мерзімді өзгерістерге әкелген. S&P 500 индексі оқиғадан кейін бір айда – орташа 2%, үш айда – 3%, бір жылда – 9% өсім көрсеткен.
