АҚШ-та көтерме инфляция энергия мен азық-түліктің қымбаттауынан өсті
АҚШ-та көтерме инфляция қыркүйекте энергия мен азық-түлік бағасының қымбаттауынан қарқын алды. Еңбек статистикасы бюросы мәліметінше, өндіруші бағаларының индексі (PPI) тамыздағы 0,1% төмендеуден кейін қыркүйекте 0,3% өсті. Бұл экономистер болжамымен сәйкес келді, деп хабарлады Bloomberg.
Ал негізігі PPI (азық-түлік пен энергияны есептемейтін) 0,1% өсіп, соңғы үш айдағы ең минималды өсім көрсетті және сарапшылар күткеннен жақсы нәтиже болды. Жылдық мәнде негізгі PPI 2,6% ұлғайды — бұл 2024 жылғы шілдеден бергі ең баяу өсім, деп атап өтті агенттік.
Көтерме сауда сегментіндегі тауар бағалары 0,9% өсті, әрі осы өсімнің шамамен 60%-ын бензиннің қымбаттауы қамтамасыз еткені PPI есебінде көрсетілген. Тауарлар бағасын азық-түлік пен энергияны есепке алмағанда, наурыздан бергі ең әлсіз өсім тіркелді. Қызметтер құны өткен айдағы төмендеуден кейін өзгеріссіз қалды: жабдық пен техниканы сататын көтерме саудагерлердің маржасы қысқарғанымен, азық-түлік жеткізушілерінде керісінше өсті.
Bloomberg атап өткендей, көтерме бағалар статистикасы қыркүйектегі тұтынушылық инфляция (CPI) жарияланғаннан кейін бір айдан соң шықты — ол көрсеткіш күтілгеннен әлсіз болған. PPI деректері компаниялардың импорттық баждардың және кейбір тауарлар категорияларының қымбаттауына қарамастан, сатып алушыларды жоғалтып алмау үшін бағаларды көтеруді барынша тежегенін көрсетеді.
Экономистер мен инвесторлар PPI көрсеткішін жіті қадағалап отырады, себебі оның бірнеше компоненті ФРЖ-ның негізгі инфляциялық индикаторы — жеке тұтыну шығындары индексіне (PCE) кіреді. Экономикалық талдау бюросы (BEA) 5 желтоқсанда қыркүйек айына арналған PCE мәліметтерін табыс пен шығын статистикасымен бірге жариялайтынын хабарлады. АҚШ үкіметінің шатдаунына байланысты статистикадағы кідірістер салдарынан, қыркүйектегі PPI мен PCE есептері ФРЖ-ға 9–10 желтоқсанда өтетін отырысқа дейінгі ең соңғы маңызды инфляциялық сигналдардың бірі болмақ.
«Жалпы, бүгінгі есептер экономика тұрақтылық пен инфляцияда әлсіреу белгілерінің жеткілікті екенін көрсетіп отыр — бұл нарықтың ФРЖ тарапынан келесі айда тағы бір рет мөлшерлемені төмендетеді деген күтулерін күшейтеді», — деп мәлімдеді BMO Capital Markets экономисі Сэл Гуатьери. Оның сөзін Bloomberg келтірді.
Алайда, орталық банкте мөлшерлемені әрі қарай төмендету қажет пе деген мәселеде әлі де ортақ пікір жоқ: кей басшыларды еңбек нарығы алаңдатады, ал инфляция әлі де мақсатты деңгейден жоғары, деп атап өтті Bloomberg.
