АҚШ-та шатдауннан кейінгі алғашқы деректер жұмыс орындарының өсуін көрсетті
АҚШ-та қыркүйек айында ауыл шаруашылығына жатпайтын салаларда 119 мың жаңа жұмыс орны ашылды. Бұл туралы АҚШ-тың Еңбек статистикасы бюросы (BLS) хабарлады. Бюроның мәліметінше, жалпы жұмыс орындарының саны сәуірден бері айтарлықтай өзгермеген. Жұмыссыздық деңгейі 4,4% деп бағаланды.
Егжей-тегжейі
NBC News-тің жазуынша, сарапшылар небары 50 мың жұмыс орны ашылады деп болжаған. Бірақ нақты көрсеткіштер бұдан екі есе жоғары шықты. Bloomberg агенттігі мұны «үлкен тосынсый» деп атады. Бұл дерек 67 түрлі болжамның бәрінен асып түсті. Ең жақын болжам Citigroup-тан болды — 105 мың. Шілде мен тамыздағы көрсеткіштер кейін 33 мың орынға төмендетілгенімен, бұл қыркүйек айының оң нәтижесіне әсер етпейді деп есептейді агенттік.
Жұмыс орындары көбіне көлік, қойма және федералды үкімет салаларында қысқарған. Bloomberg-тің пайымдауынша, бұл нәтижелерді жыл басында Tesla бас директоры Илон Маск басқарған «үкімет тиімділігі департаментінің» (DOGE) жұмысы көрсетіп отыр.
Осы деректер АҚШ-тың Infrastructure Capital компаниясының басшысы Джей Хетфилдтің ФРЖ желтоқсанда пайыздық мөлшерлемені төмендетпейді деген сенімін нығайтты. «Біз желтоқсанда еш өзгеріс болмайды деп күтудеміз. Инфляция біртіндеп төмендеп жатыр. Келесі жылы ФРЖ төрағасы ауысқан соң төрт рет төмендету болуы мүмкін. Сондықтан 10 жылдық мемлекеттік облигациялар 4% шамасында қалады — бұл акциялар үшін жақсы» деді Хетфилд.
Ал трейдерлер, керісінше, желтоқсандағы пайыздық мөлшерлемені төмендету ықтималдығын сәл арттырды. CME FedWatch құралының дерегі бойынша, 0,25 пайыздық пунктке төмендеу мүмкіндігі — 35,6%. Күн бұрын бұл көрсеткіш 30,07% болған.
Нарықтағы жағдай
Нью-Йоркте сауда басталмай тұрып, АҚШ-тың негізгі қор индекстеріне арналған фьючерстер айтарлықтай өсті. S&P 500 индексі бойынша келісімшарттар 15:00 CET уақытымен шамамен 1,6%-ға, Dow Jones — 1%-ға, ал Nasdaq Composite — бірден 2,1%-ға көтерілді.
Инвесторларға сенім берген тағы бір себеп — ЖИ процессорлары нарығының көшбасшысы Nvidia компаниясының есебі. Компания өткен тоқсанда табыс пен пайда бойынша Уолл-стриттің болжамдарынан асып түсті. Сондай-ақ келесі тоқсанға да күтілгеннен жақсырақ болжам жасады. Бұл ЖИ-компаниялардың шамадан тыс бағалануы мен сол саладағы «көпіршік» туралы алаңдаушылықты азайтты.
Контекст
Қыркүйекке қатысты еңбек нарығы деректері бастапқыда 3 қазанда жариялануы керек еді. Бірақ АҚШ үкіметінің рекордтық ұзақ үзілісі салдарынан кешіктірілді. Ал қазан айында жиналған деректер 16 желтоқсанда, қараша айының есебімен бірге жарияланады деп күтілуде.
